ភ្នំពេញៈ សមត្ថកិច្ចខណ្ឌសែនសុខ រាជធានីភ្នំពេញកាលពីម្សិលមិញបានសន្និដ្ឋានជាបឋមថា ករណីបុរសម្នាក់ស្លាប់ដោយចងកលើជណ្ដើរឡើងឡៅតឿ និងកូនស្រី ៣ នាក់ទៀតស្លាប់លើគ្រែនៃបន្ទប់ផ្ទះជួល ១ កន្លែងកាលពីយប់ថ្ងៃពុធ នៅភូមិឧកញ៉ាវាំង សង្កាត់ភ្នំពេញថ្មីនោះគឺជាអំពើឃាតកម្ម ខណៈស្ត្រីជាភរិយារន្ធត់ចិត្តខ្លាំងពេលទើបមកពីធ្វើការថែមម៉ោងពេលយប់។
លោក ហួរ ម៉េងវ៉ាង អធិការខណ្ឌសែនសុខបានប្រាប់ភ្នំពេញប៉ុស្តិ៍កាលពីម្សិលមិញថា លោក ជា សុខជុំ អាយុ ៤០ ឆ្នាំ ជាអ្នករត់ម៉ូតូកង់៣ស្នាក់នៅផ្ទះជួលក្នុងភូមិ-សង្កាត់កើតហេតុខាងលើ រួមទាំងកូនស្រីរបស់គាត់ ៣ នាក់ទៀតដែលរួមមានឈ្មោះ ជុំ ម៉េងជូ អាយុ ១៦ ឆ្នាំ,ជុំ ម៉េងចិន អាយុ ៥ ឆ្នាំ និងឈ្មោះ ជុំ ម៉េងជៀន អាយុ ៤ ឆ្នាំ ត្រូវបានស្ត្រីជាប្រពន្ធ និងសាច់ញាតិប្រទះឃើញស្លាប់ក្នុងហេតុការណ៍ដ៏គួរឲ្យតក់ស្លុតបំផុតកាលពីម៉ោង ៩ យប់ ថ្ងៃពុធ។
លោក ម៉េងវ៉ាង បានបន្តថា នៅកន្លែងកើតហេតុក្រុមសមត្ថកិច្ចជំនាញបានពិនិត្យឃើញសពមនុស្ស ៤ នាក់ [ឪពុក និងកូន ស្រី] ស្ថិតក្នុងទីតាំងផ្សេងៗគ្នាក្នុងនោះសពក្មេងស្រី ២ នាក់អាយុ ៤ និង ៥ ឆ្នាំ ស្ថិតនៅលើគ្រែនៃជាន់ផ្ទាល់ដី ដោយមានស្លាកស្នាមម្រាមដៃជាប់នៅបំពង់ក ខណៈសពក្មេងស្រីវ័យជំទង់អាយុ ១៦ ឆ្នាំម្នាក់ទៀតនៅលើពូកនៃបន្ទប់ឡៅតឿ និងមានស្នាមម្រាមដៃជាប់ត្រង់បំពង់កផងដែរ។ ចំណែកសពបុរសជាឪពុកនោះស្ថិតនៅជាប់កាំជណ្ដើរឡើងឡៅតឿក្នុងស្ថានភាពចងកនឹងក្រមា និងមានស្នាមហូរឈាមតាមច្រមុះ។
លោកបានបញ្ជាក់ថា៖ «យោងចម្លើយរបស់ស្ត្រីជាប្រពន្ធឈ្មោះ ឌីម សុខនាថ អាយុ ៣៨ ឆ្នាំជាកម្មការិនីរោងចក្រ និងលទ្ធផលធ្វើកោសលវិច្ច័យលើសពជនរងគ្រោះទាំង ៤ ក្រុមសមត្ថកិច្ចជំនាញបានសន្និដ្ឋានក្នុងជំហានដំបូងថា ករណីស្លាប់របស់ឪពុក និងកូនស្រីទាំង ៤ នាក់ខាងលើនេះ គឺជាករណីឃាតកម្មបង្កឡើងពីបុរសជាឪពុក ដែលមានចិត្តក្រេវក្រោធឥតពិចារណាហើយដាច់ចិត្តច្របាច់កកូនស្រីទាំង ៣ ឲ្យស្លាប់រួចហើយសម្លាប់ខ្លួនឯងជាក្រោយដោយចងកនឹងក្រមា»។
លោក ម៉េងវ៉ាង បានបន្តថា ក្រោយធ្វើកោសល្យវិច័យសាកសពរួចក្រុមសមត្ថកិច្ចជំនាញបានប្រគល់សពឪពុក និងកូនស្រីទាំង ៤ នាក់នោះទៅឲ្យស្ត្រីជាប្រពន្ធ និងសាច់ញាតិដើម្បីរៀបចំធ្វើបុណ្យតាមប្រពៃណី។
ជុំវិញករណីនេះ ប្អូនស្រីបង្កើតរបស់លោក ជា សុខជុំ គឺអ្នកស្រី ជា ស្រីនាង អាយុ ២៧ ឆ្នាំបានប្រាប់ភ្នំពេញប៉ុស្តិ៍ថា នៅយប់ថ្ងៃកើតហេតុវេលាម៉ោងជិត ៩ យប់ គាត់បានឮសំឡេងបងថ្លៃស្រីគឺអ្នកស្រី ឌីម សុខនាថ ស្រែកទ្រហោយំ។ ពេលនោះគាត់ដែលស្នាក់នៅផ្ទះជួលក្បែរគ្នាបានស្ទុះទៅមើល ក៏ឃើញបងប្រុសស្លាប់ដោយចងក និងក្មួយស្រីតូចៗ ២ នាក់ទៀតស្លាប់នៅលើគ្រែ។
អ្នកស្រី ជា ស្រីនាង បានថ្លែងថា៖ «ខ្ញុំសែនរន្ធត់ចិត្តខ្លាំងណាស់នៅពេលនោះ ហើយមិនដឹងថា ត្រូវធ្វើអ្វីនោះទេក្រៅពីអង្គុយយំ ព្រោះខ្ញុំជាស្រី និងមានផ្ទៃពោះជិតគ្រប់ខែផងនោះ។ បងថ្លៃស្រីខ្ញុំក៏បានស្រែកឲ្យអ្នកជិតខាងមកជួយស្រាយទម្លាក់សពប្ដីរបស់គាត់ចុះមកក្រោម។ បន្ទាប់មកគាត់បានឡើងទៅលើឡៅតឿ ហើយក៏ស្រែកយំខ្លាំងៗម្ដងទៀតថា កូនស្រីច្បងរបស់គាត់អាយុ ១៦ ឆ្នាំក៏ស្លាប់ផងដែរ »។
ចំណែកអ្នកស្រី ឌឹម សុខនាថ ដែលជាប្រពន្ធ និងជាម្ដាយក្មេងរងគ្រោះទាំង ៣ នាក់បានប្រាប់ភ្នំពេញប៉ុស្តិ៍ថា កន្លងមកឲ្យតែមានទំនាស់ពាក្យសម្ដីតិចតួចក្នុងគ្រួសារគឺប្ដីរបស់គាត់តែងតែគំរាមថា នឹងសម្លាប់ខ្លួនព្រមទាំងកូនៗចោលទាំងអស់នៅថ្ងៃណាមួយមិនខានទេ ហើយកាលពីព្រឹកថ្ងៃពុធមុនពេលចេញទៅធ្វើការនៅរោងចក្រ គាត់ក៏បានទាស់សម្ដីតិចតួចនឹងប្ដីរបស់គាត់ម្ដងទៀត។ លុះដល់វេលាម៉ោងប្រមាណ ៨:៣០ នាទីយប់ថ្ងៃពុធពេលត្រឡប់ពីធ្វើការវិញគាត់ក៏ប្រទះឃើញហេតុការណ៍ដ៏រន្ធត់ដែលមិននឹកស្មានដល់គឺប្ដី និងកូនៗទាំងអស់ត្រូវស្លាប់។
អ្នកស្រី ឌឹម សុខនាថ បាននិយាយទាំងខ្សឹកខ្សួលថា៖ «ខ្ញុំមិនដឹងថា វាជាអំពើអមនុស្សធម៌របស់គាត់ឬយ៉ាងណានោះទេ ប៉ុន្តែសមត្ថកិច្ចប្រាប់ថា កូនៗរបស់ខ្ញុំស្លាប់ដោយសារច្របាច់ក ហើយរឿងនេះទំនងជាប្ដីខ្ញុំជាអ្នកសម្លាប់។ ក្រោយសម្លាប់កូនៗអស់ហើយ គាត់បានសម្លាប់ខ្លួនឯងតាមក្រោយដោយចងកនឹងក្រមា»។
ជុំវិញករណីនេះលោក វេជ្ជបណ្ឌិត នង សុវណ្ណរ័ត្ន មន្ត្រីជំនាញផ្នែកកោសល្យវិច័យ អមសាលាដំបូងរាជធានីភ្នំពេញដែលបានចុះធ្វើកោសល្យវិច័យសាកសពឪពុកកូនទាំងនោះបានបញ្ជាក់ប្រាប់ភ្នំពេញប៉ុស្តិ៍ថា យោងតាមការពិនិត្យ និងស្លាកស្នាមដែលបានរកឃើញជាប់នៅផ្នែកបំពង់ករបស់ក្មេងស្រីរងគ្រោះទាំង ៣ បង្ហាញថាជនរងគ្រោះជាកូនទាំង ៣ នាក់បានស្លាប់ដោយសារច្របាច់កដែលជាអំពើរបស់ជនសង្ស័យជាឪពុក។ ចំណែកជនសង្ស័យក្រោយពីធ្វើសកម្មភាពរួចបានធ្វើអត្តឃាតចងកសម្លាប់ខ្លួននៅកន្លែងកើតហេតុតែម្ដង។
ទោះបីយ៉ាងណានៅពេលសាកសួរថា តើអំពើឃាតកម្មនេះមានជាប់ពាក់ព័ន្ធទៅនឹងករណីរំលោភបំពានផ្លូវភេទលើកុមារីទាំង ៣ នោះដែរឬទេ? លោក សុវណ្ណរ័ត្ន បានបញ្ជាក់យ៉ាងខ្លីថា៖ «គ្មាននោះទេ» ៕