.jpg)
ជនសង្ស័យត្រូវសមត្ថកិច្ចចាប់ឃាត់ខ្លួនពាក់ព័ន្ធនឹងគ្រឿងញៀននៅខណ្ឌច្បារអំពៅ។ សហការី
ភ្នំពេញៈ សមត្ថកិច្ចនៅកំពុងបន្តធ្វើការសាកសួរជនសង្ស័យ ៣ នាក់ ដែលត្រូវបានចាប់ខ្លួនកាលពីយប់ថ្ងៃទី ៩ ខែ មេសា ឆ្នាំ ២០១៩ នៅក្នុងខណ្ឌច្បារ-អំពៅពាក់ព័ន្ធនឹងការជួញដូរគ្រឿងញៀន ខណៈដែលលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសបានជំរុញឲ្យមានការផ្តន្ទាទោសឲ្យបានធ្ងន់ធ្ងរ ចំពោះមន្ត្រីណាក៏ដោយដែលប្រព្រឹត្តល្មើសច្បាប់។
លោក ម៉ក់ ជីតូ អគ្គស្នងការរងនគរបាលជាតិទទួលផែនប្រយុទ្ធប្រឆាំងគ្រឿងញៀនបានឲ្យដឹងកាលពីម្សិលមិញថា ការឈានដល់មានការឃាត់ខ្លួនជនទាំង ៣ នាក់នេះ គឺធ្វើឡើងបន្ទាប់ពីមានការស៊ើបអង្កេតយ៉ាងយកចិត្តទុកដាក់ ហើយករណីគ្រឿងញៀននេះក៏កំពុងបន្តនីតិវិធីស៊ើបអង្កេតបន្តទៀត ដើម្បីស្វែងរកមេខ្លោងនៅពីក្រោយខ្នងការជួញដូរគ្រឿងញៀននេះ។ ប៉ុន្តែយ៉ាងណាក្តីលោកជីតូថ្លែងថា ជនសង្ស័យទាំង ៣ នាក់ ដែលត្រូវបានឃាត់ខ្លួនកំពុងស្ថិតក្នុងការសង្ស័យជាមន្ត្រីកងរាជអាវុធហត្ថហើយលោកមិនអាចបង្ហាញអត្តសញ្ញាណបានទេ។
លោកបន្តថា៖ «ជាប់ពាក់ព័ន្ធមន្ត្រីកងរាជអាវុធហត្ថឬនៅ គឺមិនទាន់ច្បាស់លាស់នៅឡើយទេ ព្រោះនេះជាព័ត៌មានដែលយើងកំពុងស៊ើបអង្កេតទេហើយយើងកំពុងធ្វើការបន្តជាមួយព្រះរាជអាជ្ញាកំពុងសិក្សាវាយតម្លៃ រកមេខ្លោង»។
ចំពោះគ្រឿងញៀនវិញ លោក ម៉ក់ ជីតូ ក៏មិនអាចបញ្ជាក់បានដែរថា មានចំនួនប៉ុន្មាន ដោយគ្រាន់តែប្រាប់យ៉ាងខ្លីថា ការងារនេះ គឺស្ថិតក្នុងការសម្ងាត់ ដោយរង់ចាំការស៊ើបអង្កេតចប់ ទើបអាចប្រាប់បាន ចៀសវាងការផ្សាយព័ត៌មានទៅធ្វើឲ្យមានការភ័ន្តច្រឡំ។
ប៉ុន្តែបើយោងតាមការចុះផ្សាយនៅតាមបណ្តាសារព័ត៌មានក្នុងស្រុកមួយចំនួនបានឲ្យដឹងថា ការឃាត់ខ្លួននេះបានធ្វើឡើង នៅយប់ថ្ងៃទី ៩ ខែ មេសា ស្ថិតក្នុងខណ្ឌច្បារអំពៅ រាជធានីភ្នំពេញ ហើយឈានទៅដល់ការចាប់ខ្លួនជនសង្ស័យ ៣ នាក់ ដែលមានឈ្មោះ ហោ រ៉ាពិណាត ជានាយរងការិយាល័យហិរញ្ញវត្ថុនៃបញ្ជាការដ្ឋានកងរាជអាវុធហត្ថលើផ្ទៃប្រទេស ចំណែក ២ នាក់ទៀត មិនទាន់ស្គាល់អត្តសញ្ញាណ។
ទោះយ៉ាងណាលោក មាស វីរិទ្ធិ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់ភ្នំពេញប៉ុស្តិ៍ពីម្សិលមិញថា លោកទទួលបានដំណឹងពីការឃាត់ខ្លួនជន សង្ស័យ ៣ នាក់នេះដែរដែលព័ត៌មានទទួលបានគឺពួកគេជាមន្ត្រីកងរាជអាវុធហត្ថ តែនៅមិនទាន់ច្បាស់ថា ជាមន្ត្រីកងរាជអាវុធហត្ថថ្នាក់ណានៅឡើយទេ។
លោក មាស វិរិទ្ធិ បន្តថា ចំពោះវត្ថុតាងដែលជាគ្រឿងញៀន ត្រូវបានចាប់នៅហ្នឹងកន្លែង ក៏មិនទាន់ច្បាស់ថា មានចំនួនប៉ុន្មានដែរ ព្រោះករណីនេះ អាចរកឃើញបន្តបន្ទាប់ទៀត។
លោកបញ្ជាក់ថា៖ «ជាមន្ត្រីអាវុធហត្ថមែន តែមិនទាន់ច្បាស់ថា នៅកម្រិតណានៅឡើយទេ ព្រោះកំពុងឆែកមើល ហើយពួកគាត់កំពុងឃាត់ខ្លួនបណ្តោះអាសន្ននៅមន្ទីរប្រឆាំងគ្រឿងញៀនភ្នំពេញ ដើម្បីសួរចម្លើយបន្ថែម រកអ្នករួមគំនិត។ តាមនីតិវិធីនេះ គឺក្នុងអំឡុងពេល ៧២ ម៉ោង ទើបយើងបញ្ជូនបន្តទៅតុលាការ»។
ចំណែកលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសក៏បានប្រាប់ភ្នំពេញប៉ុស្តិ៍កាលពីម្សិលមិញដែរថា លោកមិនអាចស្គាល់បុគ្គលគ្រប់រូបក្នុងស្ថាប័នរបស់លោកអស់ទេ តែលោកគាំទ្រចំពោះវិធានការបង្ក្រាបបទល្មើសគ្រឿងញៀននេះ។
លោកបញ្ជាក់ថា បើរកឃើញថា មន្ត្រីណាជាប់ពាក់ព័ន្ធនឹងបទល្មើសគ្រឿងញៀន លោកលើកទឹកចិត្តឲ្យមានការអនុវត្តច្បាប់យ៉ាងតឹងរឹុងលើបុគ្គលរូបនោះ ទោះមានឋានៈអ្វីក៏ដោយ ហើយមិនត្រូវយល់យោគនោះឡើយ។
លោកថ្លែងទៀតថា៖ «មិនបាច់ទៅខ្វល់ច្រើនអ្នកណានាយការិយាល័យ ឬមិននាយការិយាល័យ ស័ក្ដិប៉ុន្មានក៏ដោយ ឲ្យតែមានបទល្មើស គឺត្រូវធ្វើតាមច្បាប់ទៅ ព្រោះនេះគឺជារឿងបុគ្គលរបស់ពួកគេដែលបានទៅប្រព្រឹត្តអំពើបែបហ្នឹង ហើយខ្ញុំស្អប់ ចំពោះបទល្មើសគ្រឿងញៀនហ្នឹងណាស់ ស្អប់ទាំងអ្នកជក់ និងអ្នកជួញដូរ។ ខ្ញុំបានណែនាំរាប់មិនអស់ទេ អ៊ីចឹងបើមានភ័ស្តុតាង ឃើញអាណា ដាក់អាហ្នឹងទៅ ជាប់គុកឲ្យស្រឡះសាធុទៅ»។
កាលពីចុងខែកុម្ភៈថ្មីៗនេះ ក៏មានការបើកប្រតិបត្តិការរឹបអូសគ្រឿងញៀនជិត ៥០ គីឡូក្រាម នៅមជ្ឈមណ្ឌលកម្សាន្តរ៉ុក នឹងឈានដល់ឃាត់ខ្លួនលោក គិត ធាង ដែលជាអ្នកទទួលខុសត្រូវទីតាំងកម្សាន្ត និងអ្នកពាក់ព័ន្ធមួយចំនួនទៀតហើយក្នុងសំណុំរឿងនេះ លោក ស ខេង រដ្ឋមន្ត្រីក្រសួងមហាផ្ទៃ ក៏បានចេញបញ្ជាឲ្យតាមចាប់ខ្លួនមន្ត្រីប៉ូលិសម្នាក់ដែលមានជាប់ពាក់ព័ន្ធក្នុងសំណុំរឿងគ្រឿងញៀននេះផងដែរ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព យល់ថា ការដែលមានមន្ត្រីអ្នកអនុវត្តច្បាប់មួយចំនួនប្រព្រឹត្តបទល្មើសពាក់ព័ន្ធនឹងគ្រឿងញៀនដូច្នេះ ព្រោះតែការអនុវត្តច្បាប់នៅកម្ពុជាមានភាពខ្វះចន្លោះ ដែលងាយឲ្យពួកគេប្រព្រឹត្តសកម្មភាពល្មើស ហើយភាគច្រើននៃពួកគេគ្មានឆន្ទៈក្នុងការទប់ស្កាត់បទល្មើសគ្រឿងញៀននោះទេគឺគិតតែផលប្រយោជន៍ខ្លួនប៉ុណ្ណោះ។
លោកបន្តថា នៅពេលនេះ ដល់ពេលហើយដែលអាជ្ញាធរ ត្រូវបោសសម្អាតមន្ត្រីដែលជាប់ពាក់ព័ន្ធនឹងគ្រឿងញៀន កុំឲ្យទទួលរងនូវការរិះគន់ជាច្រើនបន្តទៀតពីសំណាក់ប្រជាពលរដ្ឋ។
លោកបញ្ជាក់ថា៖ «មន្ត្រីដែលអនុវត្តច្បាប់ហ្នឹង កាលណាមានជាប់ពាក់ព័ន្ធនឹងបទល្មើសគ្រឿងញៀនអ៊ីចឹង ត្រូវតែដាក់ទោសឲ្យបានធ្ងន់ធ្ងរ ហើយទ្វេដង តាមច្បាប់កំណត់ ដោយមិនត្រូវមាន ការ លើកលែងទេ ព្រោះនេះជារឿងមួយដែលសំខាន់កុំឲ្យមន្ត្រីទាំងនោះទៅសមគំនិតរកស៊ីជាមួយអ្នកខុសច្បាប់ទៀត។ ទន្ទឹមគ្នានេះ ជាមួយនឹងការបង្ក្រាបទៅលើឈ្មួញគ្រឿងញៀនធំៗនេះ ត្រូវតែមានវិធានការហ្មត់ចត់ ជាពិសេសពិនិត្យលើមន្ត្រីអ្នកអនុវត្តច្បាប់នេះ ដោយត្រូវលាងសម្អាតមន្ត្រីរបស់ខ្លួនហ្នឹងឲ្យបានល្អប្រសើរ កុំឲ្យជាប់ពាក់ព័ន្ធនឹងគ្រឿងញៀន ទើបទទួលបានជោគជ័យ»៕
