ភ្នំពេញៈ នគរបាលព្រហ្មទណ្ឌក្រសួងមហាផ្ទៃបានសុំពន្យារពេលបញ្ជូនបុរសចិន ១១ នាក់ ទៅតុលាការដោយសារត្រូវស៊ើបអង្កេតបន្ថែម បន្ទាប់ឃាត់ខ្លួនពីថ្ងៃ ១៧ កក្កដា នៅផ្ទះលេខ ៣២២ ផ្លូវ ៩៥៦ ភូមិតាងូវ សង្កាត់និរោធ ខណ្ឌច្បារអំពៅ រាជធានីភ្នំពេញករណីជំរិតទារប្រាក់បុរសជនជាតិចិនដូចគ្នាម្នាក់ ខណៈការឃុំខ្លួនត្រូវបញ្ចប់នីតិវិធីត្រឹមថ្ងៃម្សិលមិញ។
លោក មុំ ចេក នាយការិយាល័យនីតិវិធីនៃនាយកដ្ឋានព្រហ្មទណ្ឌក្រសួងមហាផ្ទៃបានប្រាប់ពីម្សិលមិញថា ករណីជនជាតិចិន ១១ នាក់នោះសមត្ថកិច្ចលោកបានសួរចប់អស់ហើយ។ ក៏ប៉ុន្តែដោយសារសង្ស័យថាអាចជាប់ពាក់ព័ន្ធនឹងមនុស្សផ្សេងទៀតទើបលោកស្នើសុំគោលការណ៍ទៅថ្នាក់លើ និងសាលាដំបូងរាជធានីភ្នំពេញ ដើម្បីបន្តនីតិវិធីឃុំពួកគេទុក ២៤ ម៉ោងទៀតសិន។
លោកបន្តថា តាមនីតិវិធីការឃុំខ្លួននោះគឺផុតកំណត់ថ្ងៃទី ១៩ កក្កដា ប៉ុន្តែដោយសារសមត្ថកិច្ចនៅសង្ស័យទើបសុំពន្យារពេលបញ្ជូនទៅតុលាការ។
លោកថា៖ «តាមនីតិវិធីគឺពួកគេត្រូវដល់ថ្ងៃកំណត់បញ្ជូនទៅតុលាការនៅថ្ងៃនេះ ប៉ុន្តែដោយសារបទឧក្រិដ្ឋអ៊ីចឹងយើងស៊ើបមិនទាន់បានជុំនៅឡើយ ក៏ស្នើសុំទៅតុលាការដើម្បីពន្យារការឃុំខ្លួន ២៤ ម៉ោងទៀត»។
ពាក់ព័ន្ធករណីនេះដែរ លោក ហែម បូណា ប្រធានការិយាល័យព្រហ្មទណ្ឌកម្រិតធ្ងន់នៃនាយកដ្ឋានព្រហ្មទណ្ឌក្រសួងមហាផ្ទៃបានឲ្យដឹងពីម្សិលមិញដែរថា មុនពេលបង្ក្រាបគឺខាងនាយកដ្ឋានព្រហ្មទណ្ឌបានទទួលពាក្យបណ្តឹងពីបុរសជនជាតិចិនម្នាក់ជាមិត្តភក្ដិជនរងគ្រោះរឿងចាប់ជំរិតជនជាតិចិនដូចគ្នា នៅក្នុងផ្ទះលេខ ៣២២ ផ្លូវ ៩៥៦ ភូមិតាងូវ សង្កាត់និរោធ ខណ្ឌច្បារអំពៅរាជធានីភ្នំពេញ។
លោកបន្តថា បន្ទាប់ពីទទួលបានពាក្យបណ្តឹងនេះ ឧត្ដមសេនីយ៍ត្រី ជាវ វិបុល អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃដោយមានការសម្របសម្រួលផ្នែកផ្លូវច្បាប់ពីតំណាងអយ្យការសាលាដំបូងរាជធានីភ្នំពេញបានដឹកនាំចុះបង្ក្រាបជាក់ស្តែងកាលពីល្ងាចថ្ងៃទី ១៧ ខែកក្កដា ក្នុងភូមិ-សង្កាត់ខាងលើ។
លោកថា ប្រតិបត្តិការនោះសមត្ថកិច្ចបានឃាត់ខ្លួនជនសង្ស័យ ១១ នាក់សុទ្ធតែមនុស្សប្រុស និងរំដោះជនរងគ្រោះជាជនជាតិចិនម្នាក់ដែលក្រុមជនសង្ស័យជំរិតទារប្រាក់ពីជនរងគ្រោះចំនួន ១០ ម៉ឺនយន់។
លោកឲ្យដឹងតាមសម្តីជនរងគ្រោះថា មុនកើតហេតុគឺបុរសរងគ្រោះបានមកប្រទេសកម្ពុជាដើម្បីរកការងារធ្វើ។ គាប់ជួនពេលឆែកមើលនៅតាមអនឡាញក៏ឃើញក្រុមជនសង្ស័យប្រកាសរកបុគ្គលិកធ្វើការនៅកម្ពុជា។ ពេលនោះបុរសរងគ្រោះបានទាក់ទងតាមអាសយដ្ឋានក្នុងអនឡាញនោះហើយបានធ្វើដំណើរទៅជួបក្រុមជនសង្ស័យនៅទីតាំងកើតហេតុខាងលើក៏ត្រូវក្រុមជនសង្ស័យចាប់ដាក់ខ្នោះ ហើយបង្ខំឲ្យទូរស័ព្ទទៅក្រុមគ្រួសារនៅប្រទេសចិនឲ្យផ្ញើលុយមកលោះ។ តែត្រូវក្រុមគ្រួសារជនរងគ្រោះពឹងមិត្តភក្ដិរបស់កូនគាត់ ឲ្យមកប្តឹងសមត្ថកិច្ចនៅក្រសួងមហាផ្ទៃទើបឈានដល់ការបង្ក្រាបនេះ។
លោកបានបញ្ជាក់ថា ពេលសមត្ថកិច្ចចូលទៅរំដោះនៅផ្ទះកើតហេតុនោះលោកបានឃើញដៃរបស់ជនរងគ្រោះជាប់ខ្នោះ តែនៅលើខ្លួនប្រាណមិនមានស្លាកស្នាមអីទេតែគាត់ភ័យតក់ស្លុតខ្លាំង និងញ័រខ្លួន។ មុនដំបូងជនរងគ្រោះគិតថា សមត្ថកិច្ចជាក្រុមតែមួយរបស់ជនសង្ស័យ។ ប៉ុន្តែលុះមានសមាគមជនជាតិចិនប្រចាំកម្ពុជាជួយសម្របសម្រួលទើបជនរងគ្រោះដឹង និងមានសភាពប្រក្រតីឡើងវិញ។
លោកថា៖ «ពេលនេះគាត់មានអារម្មណ៍និយាយទូរស័ព្ទបានធម្មតា និងមានអារម្មណ៍ល្អឡើងវិញហើយ»៕