.jpg)
ជនរងគ្រោះដែលត្រូវចោរលួចគាស់ផ្ទះលួចទ្រព្យសម្បត្តិអស់ប្រមាណ ៥០ ដុល្លារ។ រូបថត ហ្វេសប៊ុក
ភ្នំពេញ៖ អាជ្ញាធរក្រុងភ្នំពេញ សហការជាមួយកម្លាំងអធិការនគរបាលខណ្ឌទួលគោក ដើម្បីស្រាវជ្រាវរកជនល្មើស ដែលលួចចូលគាស់ផ្ទះប្រជាពលរដ្ឋនៅសង្កាត់បឹងសាឡាង ខណ្ឌទួលគោក ក្នុងអំឡុងពេលម្ចាស់ផ្ទះកំពុងធ្វើចត្តាឡីស័ករយៈពេល ១៤ ថ្ងៃ។
ចំណាត់ការស្រាវជ្រាវនេះធ្វើឡើង បន្ទាប់ពីម្ចាស់ផ្ទះឈ្មោះ Makara Mom ដែលជាអ្នកលក់ឡេអនឡាញ បានធ្វើការឡាយផ្ទាល់ កាលពីយប់ថ្ងៃទី ១១ ឧសភាថា មានចោរបានចូលគាស់ផ្ទះ អំឡុងពេលរូបគាត់ និងក្រុមគ្រួសារកំពុងធ្វើចត្តាឡីស័ក ១៤ ថ្ងៃ នៅមជ្ឈមណ្ឌលម៉ូឌែន ២ សង្កាត់ចាក់អង្រែក្រោម ខណ្ឌមានជ័យ។
អ្នកស្រីថា៖ «សូមជួយខ្ញុំផង ចោរចូលគាស់ផ្ទះអស់ ឥឡូវនេះខ្ញុំមកធ្វើចត្តាឡីស័ក ១៤ ថ្ងៃមួយគ្រួសារ និយាយទៅខណ្ឌខ្ញុំអត់មានប៉ូលិសទៅយាមផ្ទះទេ ដឹងតែផ្ទះខ្ញុំរកស៊ីហើយ ឥឡូវនេះអ្នកណាជួយដោះស្រាយបញ្ហាប្រជាពលរដ្ឋ ឱ្យខ្ញុំមកធ្វើចត្តាឡីស័កមួយគ្រួសារ ៧ នាក់»។
អ្នកស្រីបន្តថា៖ «ឥឡូវចោរគាស់ផ្ទះខ្ញុំ យកទូដែកទៅបាត់ហើយ ក្នុងនោះលុយសុទ្ធជាង ១០ ម៉ឺនដុល្លារ លុយនៅសន្សំក្នុងកូនជ្រូកជាង ២ ម៉ឺនដុល្លារ នៅមានប្លង់ផ្ទះ ប្លង់ដីទាំងអស់ និងគ្រឿងពេជ្រ សរុបទាំងអស់ខ្ទង់ ៥០ ម៉ឺនដុល្លារ លុយទាំងនេះ ខ្ញុំអត់ផ្ញើនៅធនាគារទេ ព្រោះជាលុយទុកសម្រាប់បង្វិលដើមរកស៊ី»។
អ្នកស្រីបានស្នើយ៉ាងទទូចដល់សមត្ថកិច្ចខណ្ឌ និងសមត្ថកិច្ចក្រុងភ្នំពេញ ជួយស្វែងរកជនល្មើសមកផ្តន្ទាទោសតាមច្បាប់ ដើម្បីផ្តល់ភាពយុត្តិធម៌។
លោក គឹម កូលីដូ នាយនគរបាលប៉ុស្តិ៍សង្កាត់បឹងសាឡាងបានប្រាប់ ភ្នំពេញ ប៉ុស្ត៍ថា សមត្ថកិច្ចបានចុះទៅដល់ទីតាំងកើតហេតុស្ថិតនៅសង្កាត់បឹងសាឡាង ដើម្បីធ្វើការស៊ើបអង្កេត។
លោកថា៖ «ពេលចុះដល់ទីតាំងយើងមិនទាន់ចូលផ្ទះនោះភ្លាមទេ រង់ចាំ ខាងការិយាល័យកម្រិតស្រាល សហការជាមួយកម្លាំងខណ្ឌបានបាញ់ថ្នាំសម្លាប់មេរោគឱ្យហើយ។ ក្រោយមកនៅថ្ងៃទី ១២ ឧសភា យើងបានសហការជាមួយសមត្ថកិច្ចពាក់អាវពេទ្យចូលទៅផ្ទះនោះ ដើម្បីធ្វើការស្រាវជ្រាវទី១ ឆែក កាមេរ៉ា តែកាមេរ៉ា ត្រូវបានផ្តាច់អស់ហើយ»។
យ៉ាងណាក៏ដោយលោកបានគូសបញ្ជាក់ថា សមត្ថកិច្ចកំពុងស្រាវជ្រាវរឿងនេះបន្ថែមទៀត ហើយពុំទាន់មានតម្រុយនៅឡើយទេ ដោយរង់ចាំសាកសួរម្ចាស់ផ្ទះបន្ថែមទៀត បន្ទាប់ពីគាត់បញ្ចប់ការធ្វើចត្តាឡីស័ក។
លោកថ្លែងថា៖ «តាមរបាយការណ៍បឋម ហេតុការណ៍នេះកើតឡើងថ្ងៃទី ១០ ឧសភា ព្រោះថ្ងៃទី ១០ ពលរដ្ឋនៅក្បែរនោះ ឃើញទ្វារចំហនៅចន្លោះម៉ោង ៥ ទៅ ៦ ល្ងាច»។
លោក សាន សុខសីហា អ្នកនាំាពាក្យស្នងការនគរបាលរាជធានីភ្នំពេញបានថ្លែងថា សមត្ថកិច្ចក្រុងកំពុងសហការជាមួយសមត្ថកិច្ចជំនាញនៃកម្លាំងអធិការដ្ឋាននគរបាលខណ្ឌទួលគោក លើការងារនេះ។
លោកថា៖ «ខ្ញុំអត់ទាន់បញ្ជាក់អ្វីបន្ថែមលើសពីនេះទេ ដោយសារសមត្ថកិច្ចជំនាញកំពុងស្វះស្វែងធ្វើការងារនេះ និងរង់ចាំជួបម្ចាស់ផ្ទាល់ ដើម្បីបំភ្លឺជាក់ស្តែង រកតម្រុយអីបន្ថែមទៀត ដើម្បីអាចឱ្យយើងឈានទៅរកការស្រាវជ្រាវបន្ថែម»។
លោកថ្លែងថា៖ «យើងយល់ថា ទីតាំងនោះជាតំបន់ហាមឃាត់ ប៉ុន្តែមិនមែនមានន័យថា សមត្ថកិច្ចមិនយាមទេ យើងដាក់កម្លាំងយាម និងកម្លាំងចល័តទៀតផង ប៉ុន្តែយើងដឹងស្រាប់ហើយជនល្មើស ជនសង្ស័យមួយចំនួនដែលគាត់មានគម្រោងគាត់មានវិធីសាស្រ្តអីខ្លះ អីចឹងពួកក្រុមខូចចេះតែមានជំនាញ មានវិធីសាស្រ្តរបស់វា»៕
