ព្រះសីហនុ: មន្ត្រីនគរបាលខេត្តព្រះសីហនុកំពុងស្រាវជ្រាវរកចាប់ខ្លួនខ្មាន់កាំភ្លើងដែលបាញ់គ្នានៅសង្កាត់លេខ ២ ក្រុង/ខេត្តព្រះសីហនុ បណ្ដាលឱ្យបុរសអ្នករត់រ៉ឺម៉កកង់ ៣ ម្នាក់ស្លាប់ និងមន្ត្រីនគរបាល ២ នាក់របួស ខណៈបុរស ២ នាក់ ត្រូវបានឃាត់ខ្លួន និងកំពុងស្ថិតក្រោមការសាកសួរនៅស្នងការដ្ឋានខេត្ត។
លោក ជួន ណារិន្ទ ស្នងការនគរបាលខេត្តព្រះសីហនុបានប្រាប់ពីម្សិលមិញថា នគរបាលជំនាញខេត្តកំពុងបន្តស្រាវជ្រាវរកជនសង្ស័យជាសន្តិសុខឯកជនដែលយាមនៅហាងកើតហេតុកាលពីរំលងអធ្រាត្រឈានចូលថ្ងៃទី ២៧ ខែកញ្ញា។
ករណីនេះគឺពួកគេបានបាញ់គ្នាទៅវិញទៅមកបណ្ដាលឱ្យត្រូវបុរសអ្នករត់រ៉ឺម៉កកង់ ៣ ម្នាក់ស្លាប់នៅលើរ៉ឺម៉ក និងរងរបួសមន្ត្រីនគរបាល ២ នាក់ ។
លោកថា៖ «ខ្ញុំសុំអធ្យាស្រ័យដែលមិនអាចបង្ហាញព័ត៌មានលម្អិត ព្រោះយើងកំពុងស្រាវជ្រាវ និងកំណត់អត្តសញ្ញាណជនដៃដល់ដែលប្រព្រឹត្តបទល្មើស។ អ៊ីចឹងយើងមិនអាចបង្ហាញពីនីតិវិធីយើងឱ្យជនល្មើសដឹងខ្លួនទេគឺខ្ញុំសុំលាក់ព័ត៌មានខ្លះសិន។ ករណីបាញ់នេះគឺពួកគេជាសន្ដិសុខខ្មែរយើងទេ ប៉ុន្ដែមិនដឹងថា ពួកគេបានកាំភ្លើងពីណាទេ បើចាប់ពួកគេបាន ទើបអាចដឹងរឿងទាំងអស់»។
យ៉ាងណាក្ដីលោក ជួន ណារិន្ទ ឱ្យដឹងថា ករណីនេះសមត្ថកិច្ចបានឃាត់ខ្លួនបុរស ២ នាក់ ប៉ុន្ដែកំពុងស្ថិតក្រោមការសាកសួរនៅស្នងការដ្ឋាននគរបាលខេត្តនៅឡើយ។ ទន្ទឹមនឹងនេះសមត្ថកិច្ចក៏កំពុងស្រាវជ្រាវរកពីមូលហេតុផងដែរ។
លោក សេង ហ៊ត នាយប៉ុស្ដិ៍នគរបាលរដ្ឋបាលសង្កាត់លេខ ២ ក្រុងព្រះសីហនុបានឱ្យដឹងពីម្សិលមិញថា ករណីនេះមិនមែនជនជាតិចិនបង្កទេ តែជាសន្ដិសុខយាមនៅហាងកន្លែងកើតហេតុបាញ់ត្រូវចំទ្រូងជនរងគ្រោះ ប៉ុន្ដែលោកមិនទាន់អាចបញ្ជាក់ពីមូលហេតុបានទេ។
លោកថា៖ «សមត្ថកិច្ចជំនាញយើងកំពុងស្រាវជ្រាវ ប៉ុន្ដែខ្ញុំមិនទាន់ដឹងគេធ្វើដល់ណាហើយទេ។ ចំពោះជនរងគ្រោះដែលស្លាប់គឺយើងប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណីហើយ»។
កាលពីម្សិលមិញ ភ្នំពេញប៉ុស្ដិ៍មិនអាចរកប្រភពទាក់ទងសាច់ញាតិបុរសដែលស្លាប់ដើម្បីសុំការបញ្ជាក់បន្ថែមបានទេ។
ប៉ុន្ដែសារព័ត៌មានក្នុងស្រុកបានដកស្រង់សម្ដីស្ត្រីជាប្រពន្ធជនរងគ្រោះសុំមិនប្រាប់ឈ្មោះថា ប្ដីគាត់ ឈ្មោះ ហែម រិទ្ធ អាយុ ៤៨ ឆ្នាំ រស់នៅខេត្តព្រះសីហនុ មានកូន ៤ នាក់ ត្រូវបានខ្មាន់កាំភ្លើងបាញ់ត្រូវ ១ គ្រាប់ស្លាប់លើរ៉ឺម៉កកង់ ៣ ក្នុងពេលកំពុងអង្គុយចាំដឹកភ្ញៀវ។ អ្នកស្រីមិនដឹងរឿងដែលនាំឱ្យប្ដីអ្នកស្រីគ្រោះថ្នាក់ដល់ជីវិតបែបនេះទេ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធបានថ្លែងពីម្សិលមិញថា ការបាញ់បោះសេរីនេះ បង្ហាញភាពកម្សោយរបស់សមត្ថកិច្ចនៅទីនោះ។ ការកើតឡើងករណីនេះជាការគំរាមកំហែងធ្ងន់ធ្ងរដល់សុវត្ថិភាពពលរដ្ឋក្នុងតំបន់ ក៏ដូចអ្នកប្រកបរបរសេដ្ឋកិច្ចក្រៅប្រព័ន្ធ និងអ្នកទេសចរផងដែរ។
លោកបានស្នើឱ្យរដ្ឋាភិបាលចាត់វិធានកុំឱ្យមានករណីបែបនេះទៀតដើម្បីធានាលើការអនុវត្តគោលនយោបាយភូមិ-ឃុំ មានសុវត្ថិភាពឱ្យមានប្រសិទ្ធភាព។
លោកថា៖ «សមត្ថកិច្ចត្រូវតែចាប់ជនល្មើសមកផ្ដន្ទាទោសឱ្យបាន និងត្រូវផ្តល់សំណងសមរម្យដល់គ្រួសារជនរងគ្រោះឱ្យគាត់ដោះស្រាយជីវភាព»៕