កោះកុងៈ មន្ត្រីមានសមត្ថកិច្ចនៃការិយាល័យប្រឆាំងការជួញដូរមនុស្សនិងការពារអនីតិជនខេត្តកោះកុងបានឃាត់ខ្លួនពលករមានប្រុសមានស្រីចំនួន២៨នាក់កាលពីយប់ថ្ងៃទី២៤ និងព្រឹកថ្ងៃទី២៥ខែមេសាឆ្នាំ២០១៣នេះ នៅពេលដែលពួកគេបម្រុងឆ្លងដែនទៅធ្វើការនៅប្រទេសថៃ។
លោក ស្រី ធុច ប្រធានការិយាល័យប្រឆាំងការជួញដូរនិងការពារអនីតិជនខេត្តកោះកុងបានមានប្រសាសន៍ថា លោកបានធ្វើការទប់ស្កាត់និងនាំពួកគេមកធ្វើការអប់រំនិងប្រគល់ជូនអង្គការ HCC ដើម្បីបញ្ជូនពួកគាត់ទៅស្រុកកំណើតនៅឯខេត្តកំពតវិញ។
លោក ស្រី ធុច បានថ្លែងថា៖ «យើងបានធ្វើការអប់រំ និងបានឲ្យពួកគេធ្វើកិច្ចសន្យាដោយមិនឲ្យមានការឆ្លងដែនជាលើកទីពីរទៀតទេមុននឹងយើងបានបញ្ជូនពួកគេទៅឲ្យអង្គការអេចស៊ីស៊ី (HCC)»។
លោក ស្រី ធុច បានបន្តថាពួកគេទាំងនោះ មកពីខេត្តកំពតនិងខេត្តព្រៃវែង ដោយមានអ្នកខ្លះធ្លាប់បានទៅធ្វើជាកម្មករតាមទូកម្តងរួចមកហើយផងដែរ។
លោកបញ្ជាក់ឲ្យដឹងទៀតថាមានតែពីរករណីនេះទេដែលបានកើតមាននៅក្នុងខេត្តកោះកុងចាប់ពីដើមឆ្នាំ២០១៣រហូតមកដល់ពេលនេះ។
លោក នាង បូរ៉ាទីណូ អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកោះកុងបានឲ្យដឹងថាអ្នកដែលឆ្លងដែនបម្រុងទៅធ្វើការនៅប្រទេសថៃឆ្លងកាត់នៅត្រង់ចំណុចផែអូរប័រ ជាកន្លែងចម្លងស្ថិតនៅសង្កាត់ស្មាច់មានជ័យ ក្រុងខេមរភូមិន្ទ ខេត្ដកោះកុង។
លោក បូរ៉ាទីណូ បានថ្លែងថា៖ «សមត្ថកិច្ចគួរតែធ្វើការពិនិត្យមើលលើកំពង់ផែអូប័រដែលជាកន្លែងពលករធ្វើការឆ្លងដែនទៅប្រទេសថៃ។ ខ្ញុំគិតថា ប្រហែលជាមានការពាក់ព័ន្ធនឹងផែអូប័រទើបពលករទាំងអស់នោះអាចឆ្លងដែនបានគ្រប់ពេល»។
លោកឲ្យដឹងទៀតថាមនុស្ស១២នាក់ ក្នុងចំណោម១៣នាក់ដែលបានធ្វើការឃាត់ខ្លួនកាលពីយប់ថ្ងៃទី២៤ មេសា បានលួចឆ្លងដែនបន្ទាប់ពីពួកគេបានប្រាប់អង្គការនិងសមត្ថកិច្ចថាពួកគេសុខចិត្តនៅស្វែងរកការងារធ្វើនៅក្នុងខេត្តកោះកុង។
ទាក់ទងនឹងករណីនេះលោក ស្រី ធុច ប្រាប់ថាលោកមិនទាន់បានដឹងទេប៉ុន្តែបើមានករណីនេះមែនហើយលោកឃាត់បានជាលើកទី២នោះ លោកនឹងចាត់ការតាមវិធីផ្សេងព្រោះពួកគេចុះកិច្ចសន្យារួចហើយ៕ NR
