The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ដេញ​និង​រឹបអូស​ផ្កា​ឈប់​ឲ្យ​លក់​នៅ​វត្តភ្នំ




សមត្ថកិច្ច​ដេញ​និង​រឹបអូស​ផ្កា​ឈប់​ឲ្យ​លក់​នៅ​វត្តភ្នំ

សមត្ថកិច្ច​ដេញ​និង​រឹបអូស​ផ្កា​ឈប់​ឲ្យ​លក់​នៅ​វត្តភ្នំ

ភ្នំពេញៈ អ្នក​លក់​ផ្កា​និង​គ្រឿង​សក្ការៈ​នៅ​រមណីយដ្ឋាន​វត្តភ្នំ​ដូន​ពេញ ពី​ព្រឹក​ម្សិលមិញ​ត្រូវ​សន្តិសុខ​រក្សា​សណ្តាប់​ធ្លាប់​ដេញ​ចាប់​និង​រឹបអូស​ផ្កា​ពួក​គាត់​អស់​រាប់រយ​ទង​យក​ដាក់​ឡាន​ដឹក​ចេញ​ទៅ។

លោក គង់ សារឿន អាយុ​៥២​ឆ្នាំ​ជា​ជនពិការ​ស្វិត​ដៃ​ជើង​ដែល​អះអាង​ថា ចិញ្ចឹម​ជីវិត​នឹង​របរ​លក់​ផ្កា​ជាង​១០​ឆ្នាំ​មក​ហើយ ប្រាប់​ថា កង​សន្តិសុខ​ប្រចាំ​ខណ្ឌ​ដូនពេញ​បាន​ដេញ​ចាប់​យក​ផ្កា​ពី​លោក​អស់​៥​បាច់​ធំៗ ហើយ​ហាម​មិន​ឲ្យ​លក់​តទៅ​ទៀត​ទេ។

លោក​ប្រាប់​ថា ការ​ហាម​មិន​ឲ្យ​លក់​ផ្កា​នៅ​លើ​កំពូល​វត្តភ្នំ​ដូនពេញ​នេះ ធ្វើ​ឡើង​ក្រោយ​ពី​មេ​កង​សន្តិសុខ​ថ្មី បាន​៤ថ្ងៃ។

លោក​ថា៖«ខ្ញុំ​ពិការ​ពឹង​តែ​របរ​លក់​ផ្កា​នេះ​គ្រាន់​នឹង​ចិញ្ចឹម​ក្រពះ​បាន​ប្រាក់​បង់​ថ្លៃ​ជួល​ផ្ទះ​និង​ចិញ្ចឹម​កូន​តូច​ពីរ​នាក់ តែ​បើ​គេ​មិន​ឲ្យ​លក់ នោះ​ខ្ញុំ​និង​កូន​មាន​តែ​ដាច់​ពោះ​ស្លាប់​ទេ»។

លោក​ស្នើ​ថា អាជ្ញាធរ​ខណ្ឌ​គួរ​យោគយល់​ទុក​ឲ្យ​ពួក​គាត់​លក់​នៅ​កន្លែង​ណា​មួយ​ក៏​បាន​ដែរ ព្រោះ​ពួក​គាត់់​មិន​មាន​រក​បាន​អី​ច្រើន​ទេ។

អ្នក​ស្រី អិត អាយុ​៣២​ឆ្នាំ​រៀបរាប់​ថា គាត់​លក់​ផ្កា​នៅ​លើ​កំពូល​ភ្នំ​ដូនពេញ ជាង​ដប់​ឆ្នាំ​ហើយ កម្រៃ​បាន​ពី​ការ​លក់​ផ្កា​នេះ​គាត់​យក​ទៅ​ឲ្យ​កូន​រៀន​ថ្លៃ​ជួល​ផ្ទះ គ្រាន់​ដោះស្រាយ​ជីវភាព​ប្រចាំ​ថ្ងៃ មិន​យក​ធ្វើ​មាន​បាន​អី​ទេ តែ​បើ​អាជ្ញាធរ​ដេញ​មិន​ឲ្យ​ពួក​គាត់​លក់​ទេ មាន​តែ​ដាច់​ពោះ​ស្លាប់។ គាត់​ថា ផ្កា​មួយ​ដុំ​លក់​តម្លៃ​១៥០០​រៀល បើ​ថ្ងៃ​បុណ្យ​និង​ថ្ងៃ​សីល លក់​បាន​ចំណេញ​ពី២​ទៅ​៣ម៉ឺន​រៀល​ដែរ។ អ្នក​ស្រី​ថា ពួក​កង​សន្តិសុខ​ប្រាប់ថា ពួក​គេ​ធ្វើ​តាម​ការ​បញ្ជា​របស់​លោក កែប ជុតិមា អភិបាល​រាជធានី​ភ្នំពេញ ដែល​ឲ្យ​អ្នក​លក់​ដើរ​កាន់​ផ្កា​ចល័ត​លក់​វិញ។

មន្ត្រី​ក្រុង​មិន​អាច​ទាក់ទង​បាន​ទេ អភិបាលខណ្ឌ​ពី​ល្ងាច​មិញ​តប​ថា​ច្រឡំ​លេខ ឯ​អភិបាលរង​ខណ្ឌ​ថា ជាប់​រវល់៕

អត្ថបទគួរចាប់អារម្មណ៍