The Phnom Penh Post Search

Search form

Logo of Phnom Penh Post newspaper Phnom Penh Post - សមត្ថកិច្ច​ទប់​អ្នក​បាត់​ដី​មិន​ឲ្យ​ទៅ​ក្បែរ​ផ្ទះ​នាយក​រដ្ឋ​មន្ត្រី

សមត្ថកិច្ច​ទប់​អ្នក​បាត់​ដី​មិន​ឲ្យ​ទៅ​ក្បែរ​ផ្ទះ​នាយក​រដ្ឋ​មន្ត្រី

សមត្ថកិច្ច​ទប់​អ្នក​បាត់​ដី​មិន​ឲ្យ​ទៅ​ក្បែរ​ផ្ទះ​នាយក​រដ្ឋ​មន្ត្រី

130423_03
នគរបាលរាជធានី និងក្រុមស្ត្រីអ្នកតវ៉ារុញច្រានគ្នា កាលពីម្សិលមិញ ផា លីណា

ភ្នំពេញៈសកម្មជន​ដី​ធ្លី​ប្រមាណ​៧០​នាក់ មក​ពី​សហគមន៍​ចំនួន​បី កាល​ពី​ព្រឹក​ម្សិល​មិញ​បាន​ប្រឈម​មុខ​ជាមួយ​ក្រុម​សមត្ថកិច្ច​ចម្រុះ នៅ​តាម​វិថី​ព្រះ​នរោត្តម និង​មុខ​ភូមិ​គ្រឹះ​លោក​នាយក​រដ្ឋ​មន្ត្រី​ហ៊ុន សែន ក្បែរ​វិមាន​ឯករាជ្យ ខណៈ​ពួក​គាត់​ស្វែង​រក​កិច្ច​អន្តរាគមន៍​បញ្ហា​វិវាទ​ដី​ធ្លី​ដ៏​រ៉ាំរ៉ៃ​របស់​ពួក​គាត់​។

ការ​ប្រឈម​មុខ​ដាក់​គ្នា​នេះ​បាន​កើត​ឡើង​បន្ទាប់ ពី​ក្រុម​សកម្មជន​ស្ត្រី​ដែល​មក​ពី​សហគមន៍ បឹង​កក់ បុរី​កីឡា និង សហគមន៍​ព្រលាន​យន្ត​ហោះ​ពោធិចិន​តុង បាន​បរាជ័យ​ក្នុង​ការ​ស្វែង​រក​កិច្ច​អន្តរាគមន៍​ពី​ថ្នាក់​ដឹក​នាំ​គណបក្ស​ប្រជាជន​នៅ​ទី​ស្នាក់​ការ​ធំ​គណបក្ស​នេះ​។

ក្រុម​សន្តិសុខ ដែល​យាម​ប្រចាំ​ការ​នៅ​មុខ​គណបក្ស​ប្រជាជន​កម្ពុជា បាន​បិទ​ទ្វារ​និង​បដិសេធ​ភ្លាមៗ​មិន​ទទួល​យក​ញត្តិ របស់​ក្រុម​ស្ត្រី​ទាំង​នោះ។ ដោយ​មាន​ការ​ខក​ចិត្ត ក្រុម​ស្ត្រី​ទាំង​នោះ ក៏​បាន​នាំ​គ្នា​ប្ដូរ​គោល​ដៅ​ត្រឡប់​ទៅ​កាន់​ភូមិ​គ្រឹះ​លោក​នាយក​រដ្ឋ​មន្ត្រី​វិញ ប៉ុន្តែ​ត្រូវ​បាន​រារាំង​ដោយ​កម្លាំង​សមត្ថកិច្ច​ចម្រុះ​ប្រមាណ​ជាង ២០០ នាក់ ដែល​រួម​មាន​នគរបាល កង​រាជ​អាវុធហត្ថ សន្តិសុខ និង មន្ត្រី​ស៊ីវិល ដែល​ខ្លះ​ប្រដាប់​ដោយ​ខែល​និង​ដំបង​ផង​ដែរ​។

អ្នក​ស្រី​ទេព វន្នី ដែល​ទើប​ត្រឡប់​ពី​ទទួល​បាន​ពាន​រង្វាន់​សិទ្ធិ​មនុស្ស នៅ​សហរដ្ឋ​អាមេរិក កាលពី​ដើម​ខែ​នេះ បាន​ប្រាប់​ទៅ​សមត្ថកិច្ច​ថា​បើ​អាជ្ញាធរ​ថ្នាក់​ក្រោម​ដោះស្រាយ​ឲ្យ​បាន​ត្រឹម​ត្រូវ​តាម​ការ​ណែ​នាំ​របស់​ប្រមុខ​រាជ​រដ្ឋាភិបាល​នោះ​គ្មាន​ពលរដ្ឋ​ណា​ម្នាក់​ធ្វើ​ការ​តវ៉ា​ឡើយ​។ អ្នក​ស្រី​បន្ត​ថា៖«ពួក​យើង ចេញ​ដើរ​តវ៉ា​ដូច​សព្វ​ថ្ងៃ​នេះ​គឺ​ព្រោះ​តែ​ចង់​បាន​ដំណោះ​ស្រាយ​ប្រកប​ដោយ​តម្លាភាព ត្រឹម​ត្រូវ និង​យុត្តិធម៌»។

ទោះ​ជា​បែប​ណា​ក្ដី ក្រុម​សមត្ថកិច្ច មិន​ព្រម​បើក​បារ៉ាស់​ឲ្យ​ពួក​គាត់​ធ្វើ​ដំណើរ​តាម​សម្រួល ទៅ​កាន់​ភូមិ​គ្រឹះ​លោក​នាយក​រដ្ឋ​មន្ត្រី​ឡើយ​។ មន្ត្រី​នគរបាល​ម្នាក់​សុំ​មិន​បញ្ចេញ​ឈ្មោះ បាន​និយាយ​ថា​៖«​យើង​មាន​ភារកិច្ច​ការពារ​សុវត្ថិភាព សន្តិសុខ ... យើង​នឹង​មិន​អនុញ្ញាត​ឲ្យ​បង​ប្អូន​ទៅ​ប្រមូល​ផ្ដុំ​នៅ​ទី​នោះ​ទេ»។

នៅ​ខណៈ​នោះ ក្រុម​ស្ត្រី​ប្រមាណ​ជាង ១០ នាក់ បាន​នាំ​គ្នា​ចាប់​លើក​រនាំង​ដែក ដែល​សមត្ថកិច្ច​ដាក់​រាំង​ខ្ទប់​នៅ​លើ​ដង​ផ្លូវ​ព្រះ​នរោត្តម ត្រង់​ចំណុច​ភ្លើង​ស្តុប​ខាង​ត្បូង​វិមាន​ឯករាជ្យ​ហើយ​រុញ​ច្រាន​កម្លាំង​សមត្ថកិច្ច រហូត​បាន​សម្រេច​ដើម្បី​បន្ត​ឆ្ពោះ​ទៅ​ភូមិ​គ្រឹះ​នាយក​រដ្ឋ​មន្ត្រី​។

នៅ​អំឡុង ពេល​នៃ​ការ​រុញ​ច្រាន​គ្នា​ទៅ​មក​នោះ ភាគី​ខាង​ស្ត្រី ពិសេស​អ្នក​ស្រី បូ ឆវី ដែល​មក​ពី​សហគមន៍​បឹង​កក់ បាន​ស្រែក​ខ្លាំងៗ​ថា «​ជួយ​ផង! ជួយ​ផង! សមត្ថកិច្ច​បន្លំ​ចាប់​បៀត​បៀន​កេរ្តិ៍​ខ្មាស​ខ្ញុំ» បន្ទាប់​មក​អ្នក​ស្រី​ក៏​បាន​រុល​ចេញ​មក​ក្រៅ​ហើយ​រត់​ទៅ​មុខ​ប៉ុន្តែ នគរបាល​ប្រឆាំង​កុបកម្ម​ម្នាក់​បាន​ស្រវា​ចាប់​ឱប​គាត់​និង​រុញ​គាត់​ឲ្យ​ត្រឡប់​មក​ក្រោយ​វិញ​។

យ៉ាង​ណា​ក្តី ទីបំផុត ក្រុម​ស្ត្រី​ទាំង​នោះ​បាន​ទៅ​ជួប​ប្រជុំ​គ្នា​នៅ​លើ​សួនច្បារ​វិមាន​ឯករាជ្យ ទល់​មុខ​ភូមិ​គ្រឹះ​លោក​នាយក​រដ្ឋ​មន្ត្រី​ប៉ុន្តែ​នៅ​ទី​នោះ​ជិត​បួន​ម៉ោង ពុំ​ឃើញ​មាន​មន្ត្រី​ខុទ្ទកាល័យ​លោក​នាយក​រដ្ឋ​មន្ត្រី​ណា​ម្នាក់ ចេញ​មក​ជួប​ស្ត្រី​ទាំង​នោះ​ឡើយ។ នៅ​ម៉ោង​ជិត​៣​រសៀល ទើប​ពួក​គាត់​បាន​បំបែក​គ្នា ទៅ​ផ្ទះ​វិញ​។

ដោយ​ឡែក​ប្រជា​ពលរដ្ឋ​នៃ​សហគមន៍​បុរី​កីឡា​មួយ​ក្រុម​ទៀត ចំនួន ៨៧ គ្រួសារ បាន​នាំ​គ្នា​ទៅ​ប្រមូល​ផ្ដុំ​នៅ​មុខ​ទី​ស្ដី​ការ​កាក​បាទ​ក្រហម​កម្ពុជា ដើម្បី​ស្នើ​សុំ​ស្បៀង​អាហារ​ប្រដាប់​ប្រដា​ប្រើ​ប្រាស់​និង​តង់​កៅស៊ូ​សម្រាប់​ប្រក់​ស្នាក់​នៅ​នា​រដូវ​ភ្លៀង​ដែល​ជិត​មក​ដល់​នេះ​។

អ្នក​ស្រី​ឆាយ គឹមហ៊ន តំណាង​ក្រុម​អ្នក​តវ៉ា​នៅ​ក្នុង​សហគមន៍​ក្រី​ក្រ​មួយ​នេះ​បាន​និយាយ​ថា ចាប់​តាំង​ពី​ក្រុមហ៊ុន ផាន​អ៊ីម៉ិច ធ្វើ​ការ​ឈូស​ឆាយ​ផ្ទះ​របស់​អ្នក​ស្រី​ចោល កាលពី​ថ្ងៃ​ទី ០៣ ខែ​មករា ឆ្នាំ ២០១២ មក ពួក​គាត់​រស់​នៅ​ជួប​ការ​លំបាក​យ៉ាង​ធ្ងន់​ធ្ងរ មិន​ដែល​ទទួល​បាន​ជំនួយ​ឧបត្ថម្ភ​ពី​ខាង​កាក​បាទ​ក្រហម​កម្ពុជា​ឬ​អាជ្ញាធរ​ដែន​ដី​ឡើយ​។ អ្នក​ស្រី​បន្ត​ថា៖«យើង​ខ្ញុំ​ត្រូវ​ការ​ចំណី​អាហារ និង​តង់​កៅស៊ូ ប្រក់​ស្នាក់​នៅ​រង់​ចាំ​ដំណោះស្រាយ​ជា​ផ្ទះ​ល្វែង​ពី​រដ្ឋ និង ក្រុមហ៊ុន»។

អ្នក​ភូមិ​បុរី​កីឡា​ទាំង​នេះ​ត្រូវ​បាន លោក​សេង រតនៈ អភិបាល​ខណ្ឌ​ទួល​គោក​ហៅ​ទៅ​ជួប​នៅ​សាលា​ខណ្ឌ​ហើយ​បាន​សន្យា​ថា​នឹង​នាំ​យក​នូវ​សំណើ​សុំ​អន្តរាគមន៍​ជា​ស្បៀង និង​តង់​កៅស៊ូ​របស់​ប្រជា​ពលរដ្ឋ​ទាំង​នេះ ទៅ​ប្រគល់​ជូន​លោក​ស្រី ប៊ុន រ៉ានី ប្រធាន​កាក​បាទ​ក្រហម​កម្ពុជា ដើម្បី​ពិនិត្យ​និង​សម្រេច​តាម​សេចក្ដី​ស្នើ​នេះ៕

អត្ថបទគួរចាប់អារម្មណ៍