The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​នៅ​តែ​បន្ត​តាម​រក​តំណាង​កម្មករ​រោងចក្រ ជូហ៊ួយ ដែល​គេច​ខ្លួន

សមត្ថកិច្ច​នៅ​តែ​បន្ត​តាម​រក​តំណាង​កម្មករ​រោងចក្រ ជូហ៊ួយ ដែល​គេច​ខ្លួន

សមត្ថកិច្ច​នៅ​តែ​បន្ត​តាម​រក​តំណាង​កម្មករ​រោងចក្រ ជូហ៊ួយ ដែល​គេច​ខ្លួន

កំពង់ចាមៈ សមត្ថកិច្ច ស្រុក​ជើង​ព្រៃ ខេត្ត​កំពង់ចាម នៅ​តែ​បន្ត​តាម​រក​តំណាង​កម្មករ​ដែល​ត្រូវ​ចោទ​ថា ជា​អ្នក​ញុះ​ញង់​បង្ក​ហិង្សា​នៅ​ក្នុង​ការ​តវ៉ា​នៅ​មុខ​រោងចក្រ ជូហ៊ួយ កាល​ពី​ចុង ខែ​តុលា ដែល​ធ្វើ​ឲ្យ​សមត្ថកិច្ច​និង​កម្មករ​រង​របួស​ធ្ងន់-ស្រាល និង​មាន​កម្មករ ១០ នាក់​ត្រូវ​បាន​ចាប់​ខ្លួន​ឃុំ​ផង។

លោក ហេង វុទ្ធី អធិការ ស្រុក​ជើង​ព្រៃ កាល​ពី​ម្សិល​មិញ​បាន​ឲ្យ​ដឹង​ថា នីតិវិធី​នៅ​តែ​បន្ត​តាម​រក​តំណាង​កម្មករ​ទាំង​នោះ​ដដែល ព្រោះ​ពួក​គេ​ជា​មេ​ខ្លោង​ញុះ​ញង់​ឲ្យ​មាន​ហិង្សា​កើត​ឡើង។

លោក វុទ្ធី ថ្លែង​ថា៖ «វា​ជា​បទ​ល្មើស​ជាក់​ស្តែង​យើង​មាន​ភ័ស្តុតាង មិន​មាន​អ្វី​នៅ​សង្ស័យ មាន​ពិរុទ្ធភាព​ដែល​អាច​ធ្វើ​ឲ្យ​យើង​ចាត់​ការ​តាម​ផ្លូវ​ច្បាប់​បាន»។

លោក ហេង វុទ្ធី បាន​បន្ត​ដោយ​ចោទ​ជា​សំណួរ​ថា តើ​អ្នក​ដែល​គេច​ខ្លួន​ដឹង​អត់​ថា ពួក​គេ​បាន​ប្រព្រឹត្ត​ខុស បើ​មិន​បាន​ធ្វើ​អី​ខុស ហេតុ​អី​ចាំ​បាច់​នាំ​គ្នា​រត់​គេច​ពី​សមត្ថកិច្ច?

លោក ហេង វុទ្ធី បន្ត​ថា៖ «ពួក​គេ​គួរ​តែ​ចេញ​មក​ធ្វើ​ការ​សម្រប​សម្រួល ធ្វើ​ការ​សុំទោស ឬ​ធ្វើ​អ្វី​មួយ​តាម​ដែល​អាច​ធ្វើ​បាន ដើម្បី​បញ្ចប់​បញ្ហា​នេះ។ ការ​ដែល​ពួក​គេ​រត់​គេច​នេះ មិន​មែន​រួច​ខ្លួន​មួយ​ជីវិត​ទេ ច្បាប់​នៅ​តែ​ជា​ច្បាប់»។

លោក វុទ្ធី បញ្ជាក់​ថា លោក​គ្មាន​ដីកា​ចាប់​ខ្លួន​ទេ តែ​លោក​មាន​ដីកា​កោះ​ហៅ ពួក​គេ​ដឹង​ហើយ តែ​ពួក​គេ​មិន​បាន​ទទួល​ដីកា​ទេ។ តែ​សមត្ថកិច្ច​នៅ​បន្ត​ដាក់​កម្លាំង​តាម​ផ្ទះ​ពួក​គេ​រហូត។

តំណាង​កម្មករ​មួយ​រូប អ្នក​នាង ខាន់ កូឡាប អាយុ ៣៦​ឆ្នាំ ដែល​នៅ​លាក់​ខ្លួន​ពី​ភ្នែក​សមត្ថកិច្ច ប្រាប់ ភ្នំពេញ ប៉ុស្តិ៍ តាម​ទូរស័ព្ទ​កាល​ពី​ម្សិល​មិញ​ថា អ្នក​នាង​នៅ​បារម្ភ​ពី​សុវត្ថិភាព​ផ្ទាល់​ខ្លួន ហើយ​នាង​នឹង​ត្រឡប់​មក​ផ្ទះ​វិញ ប្រសិន​បើ​សមត្ថកិច្ច ឬ​សហជីព​ធានា​អះអាង​ពី​សុវត្ថិភាព​គាត់។

អ្នក​នាង ខាន់ កូឡាប និយាយ​ថា៖ «កម្មករ​ដែល​នៅ​តែ​បន្ត​ការ​តវ៉ា​បាន​ប្រាប់​ខ្ញុំ​ថា សមត្ថកិច្ច​មាន​ការ​គុំ​កួន​ជាមួយ​ខ្ញុំ​ខ្លាំង​ណាស់ ដោយ​សារ​គេ​ឃើញ​ខ្ញុំ​ចេញ​មុខ​ការពារ​កម្មករ​ខ្លាំង​ជាង​គេ ប៉ុន្តែ អ្វី​ដែល​យើង​ធ្វើ គឺ​គ្រាន់​តែ​ទាម​ទារ​សិទ្ធិ​សេរីភាព​ជូន​កម្មករ​ប៉ុណ្ណោះ»។

អ្នក​នាង​បន្ត​ថា អ្នក​នាង​មិន​បាន​ធ្វើ​អ្វី​ខុស​ទេ។

លោក ប៊ុត ប៊ុនឈាន មន្រ្តី​ច្បាប់​នៃ​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា បាន​ឲ្យ​ដឹង​ដែរ​ថា លោក​បាន​ព្យាយាម​ធ្វើ​ការ​ពន្យល់​តំណាង​កម្មករ​ដែល​នៅ​តែ​បន្ត​ធ្វើ​ការ​លាក់​ខ្លួន​ដោយ​ប្រាប់​ថា សមត្ថកិច្ច​នឹង​មិន​ចាប់​ខ្លួន​ទេ គឺ​គ្រាន់​តែ​កោះ​ហៅ​សាក​សួរ​តែ​ប៉ុណ្ណោះ ប៉ុន្តែ ពួក​គេ​នៅ​តែ​បារម្ភ​ខ្លាច​មាន​ការ​ចាប់​ខ្លួន​ដដែល។

លោក​ប្រាប់​ថា៖ «ពួក​គេ​នៅ​មាន​ការ​បាក់​ស្មារតី​ដោយ​សារ​សមត្ថកិច្ច​ច្រើន​ប្រើ​ខុស​នីតិវិធី​ច្បាប់។ ទាំង​នេះ​ជា​ការ​ព្រួយ​បារម្ភ​របស់​គាត់»។

លោក ប៊ុនឈាន បន្ត​ទៀត​ថា មក​ដល់​ពេល​នេះ​មាន​បួន​នាក់​ទៀត​ដែល​នៅ​បន្ត​លាក់​ខ្លួន​នៅ​ឡើយ ដែល​ពួក​គាត់​ជា​ប្រធាន លេខា និង​ទីប្រឹក្សា​សហជីព​ប្រចាំ​រោងចក្រ ជូហ៊ួយ។

កាល​ពីព្រឹក​ថ្ងៃ​ចន្ទ កម្មករ​នៅ​តែ​បន្ត​ធ្វើ​ការ​ជួប​ជុំ​គ្នា​នៅ​ខាង​មុខ​រោងចក្រ ជូហ៊ួយ ហើយ​ការ​ជួប​ជុំ​នេះ​នឹង​បន្ត​នៅ​ថ្ងៃ​អង្គារ​ទៀត រង​ចាំ​មើល​នីតិវិធី​របស់​តុលាការ​ថា នឹង​មាន​ការ​ដោះ​លែង​អ្នក​ជាប់​ឃុំ​ទាំង ៥ នាក់​ដែរ​ឬ​យ៉ាង​ណា?

លោក ប៊ុនឈាន បញ្ជាក់​ថា៖ «ប្រសិន​បើ​នៅ​តែ​មាន​ដំណើរ​ការ​ណា​មួយ​មិន​សូវ​ល្អ​សម្រាប់​អ្នក​ជាប់​ឃុំ​ទាំង ៥ នាក់​នេះ នោះ​យើង​នឹង​ធ្វើ​ការ​ប្តូរ​ទិស​ដៅ​ដោយ​ធ្វើ​ដំណើរ​ទៅ​កាន់​តុលាការ​តែ​ម្តង»។

លោក គីម សុជាតិ មេធាវី​ការពារ​ក្តី​មនុស្ស ៥ នាក់​ដែល​កំពុង​តែ​ជាប់​ឃុំ​បាន​ដាក់​លិខិត​ទៅ​តុលាការ ខេត្ត​កំពង់ចាម កាល​ពី​មុន​បុណ្យ​អុំទូក ដោយ​ស្នើ​សុំ​ដោះ​លែង​កូន​ក្តី​លោក​ឲ្យ​នៅ​ក្រៅ​ឃុំ​ជា​បណ្តោះ​អាសន្ន ប៉ុន្តែ​លោក​មិន​ទាន់​បាន​ទទួល​ការ​ឆ្លើយ​តប​ទេ។

លោក​និយាយ​កាល​ពី​ម្សិល​មិញ​ថា លោក​កំពុង​តែ​រង់​ចាំ​មើល​ការ​សម្រេច​របស់​តុលាការ ហើយ​លោក​សង្ឃឹម​ថា កូន​ក្តី​លោក​នឹង​ត្រូវ​បាន​ដោះ​លែង។

សូម​បញ្ជាក់​ថា កាល​ពី​ចុង ខែ​តុលា កន្លង​ទៅ​កម្មករ​នៅ​រោងចក្រ ជូហ៊ួយ ប្រមាណ​រាប់​រយ​នាក់​បាន​ផ្ទុះ​ការ​តវ៉ា​រហូត​ឈាន​ដល់​មាន​អំពើ​ហិង្សា​រវាង​កម្មករ និង​សមត្ថកិច្ច ដែល​ធ្វើ​ឲ្យ​មាន​អ្នក​រង​របួស​ទាំង​សង​ខាង។ ក្នុង​នោះ​ដែរ ក៏​មាន​មនុស្ស ១០ នាក់​ត្រូវ​បាន​សមត្ថកិច្ច​នគរបាល​ចាប់​ឃាត់​ខ្លួន​ធ្វើ​ការ​សាក​សួរ​នៅ​តុលាការ​ខេត្ត​ផង​ដែរ តែ​បន្ទាប់​មក​មាន​កម្មករ ៥ នាក់​ត្រូវ​បាន​ដោះ​លែង​វិញ ដោយ​ពួក​គេ​មិន​មាន​កំហុស ចំណែក ៥ នាក់​ផ្សេង​ទៀត​ត្រូវ​បាន​តុលាការ​បាន​សម្រច​ធ្វើ​ការ​ចោទ​និង​បន្ត​ឃុំ​ខ្លួន៕

អត្ថបទគួរចាប់អារម្មណ៍