.jpg)
សៀមរាបៈ សមត្ថកិច្ចនគរបាលខេត្តសៀមរាបកំពុងស្វែងរកចាប់ខ្លួនជនសង្ស័យជាឪពុកបង្កើតដែលសង្ស័យកាប់កូនប្រុសស្លាប់ហើយអូសសពចូលក្នុងទឹកស្រះ ប្រព្រឹត្តកាលពីរំលងអធ្រាត្រថ្ងៃទី២៣ ខែវិច្ឆិកា នៅភូមិព្រីង ឃុំ-ស្រុក ជីក្រែង ខេត្តសៀមរាប។
លោក ឌួង សុខា ប្រធានការិយាល័យព្រហ្មទណ្ឌកម្រិតធ្ងន់ខេត្តសៀមរាបប្រាប់នៅថ្ងៃទី២៥ ខែវិច្ឆិកានេះថា ជនសង្ស័យនោះឈ្មោះ ស៊ិន ធុល អាយុ ៥៥ឆ្នាំ រីឯកូនប្រុសរងគ្រោះឈ្មោះ ស៊ុន ថា អាយុ ២៩ឆ្នាំ។ ពួកគេរស់នៅក្នុងភូមិ-ឃុំ កើតហេតុខាងលើ។
លោកថ្លែងថា៖«ករណីនេះសមត្ថកិច្ចខ្ញុំកំពុងស្វែងរកចាប់ខ្លួនជនលើ្មសហើយឯមូលហេតុនៃការកាប់សម្លាប់នេះ សមត្ថកិច្ចខ្ញុំសង្ស័យមកពីជនរងគ្រោះញៀនថ្នាំ»។
ទោះយ៉ាងណា លោក ទីវ ប៊ុនរ៉ា នាយនគរបាលប៉ុស្តិ៍ឃុំជីក្រែង បានថ្លែងថា លោកមិនអាចសន្និដ្ឋានបានទេ ខណៈអ្នកភូមិខ្លះថា ជនរងគ្រោះជាមនុស្សសរសៃប្រាសាទ រីឯសាច់ញាតិថា ជនរងគ្រោះញៀនថ្នាំ។
លោកថា៖« រឿងជនរងគ្រោះញៀនថ្នាំខ្ញុំមិនដឹងប្រាកដទេ ប៉ុន្តែសាច់ញាតិប្រាប់ខ្ញុំថា គេជាមនុស្សញៀនថ្នាំ ប៉ុន្តែយើងមិនអាចសន្និដ្ឋានជាក់លាក់បានទេ តែអ្នកភូមិខ្លះថា ជាមនុស្សវិកលចរិត ខ្លះថា ញៀនថ្នាំ»។
លោក រំឭក ប្រាប់ថា ជនរងគ្រោះកន្លងមកតែងប្រើហិង្សាក្នុងគ្រួសារ វាយបំផ្លាញរបស់របរក្នុងផ្ទះនិងដុតផ្ទះក៏មានដែរ ហើយសមត្ថកិច្ចតែងហៅទៅប៉ុស្តិ៍ដើម្បីអប់រំជារឿយៗ។ ប៉ុន្តែកន្លងមកជនរងគ្រោះធ្លាប់ទៅធ្វើការនៅថៃបាន២ឆ្នាំ លុះត្រឡប់មកផ្ទះវិញជនរងគ្រោះតែងទៅប្រកបរបរជាមួយឪពុកម្តាយ ប៉ុន្តែក្រោយមកក៏កើតមានបញ្ហាសតិមិនល្អតែគ្មានការអះអាងពីគ្រួពេទ្យទេ។
បើតាម លោកទីវ ប៊ុនរ៉ា នៅយប់មុនថ្ងៃកើតហេតុអ្នកជិតខាងបានឮសូរសំឡេងឈ្លោះវាយតប់គ្នានិងឮសំឡេងស្រែកផង តែក្រោយមកក៏ស្ងាត់សំឡេង។ លុះភ្លឺឡើងនៅថ្ងៃទី២៣ វិច្ឆិកា វេលាម៉ោងជាង៤ល្ងាច គេបានឃើញជនសង្ស័យជាឪពុកបណ្តើរម៉ូតូចេញពីផ្ទះទៅបាត់។
លោកប្រាប់ថា ដោយសង្ស័យអ្នកជិតខាងបាននាំគ្នាទៅមើលក្នុងផ្ទះក៏ឃើញមានឈាមហើយក៏រាយការណ៍ប្រាប់សមត្ថកិច្ចតែម្តង។ ក្រោយទទួលបានដំណឹងរូបលោករួមនឹងមន្ត្រីនគរបាលផ្សេងបានទៅពិនិត្យដល់ផ្ទះកើតហេតុក៏ឃើញមានឈាម ពេលនោះលោកបានតាមស្នាមឈាមនោះរហូតដល់ស្រះទឹកមួយនៅខាងក្រោយផ្ទះ ចម្ងាយប្រហែល៧០ម៉ែត្រនិងឲ្យអ្នកភូមិចុះរាវក៏ឃើញសពជនរងគ្រោះតែម្តង។
លោក បញ្ជាក់ថា នៅលើសាកសពសមត្ថកិច្ចរកឃើញមានស្នាមកាប់រយះក្បាល២កន្លែងដោយ១កន្លែងនៅផ្នែកខាងក្រោយ និង ១កន្លែងទៀតនៅផ្នែកខាងលើក្បាល។ គ្រួសារនេះមានកូន៦នាក់ ប៉ុន្តែមានម្នាក់មិនទាន់មានគូស្រករ រីឯជនរងគ្រោះមានប្រពន្ធហើយតែបានលែងលះគ្នា ដោយសារប្រើហិង្សាលើប្រពន្ធស្ទើររាល់ថ្ងៃ។
ជុំវិញបញ្ហានេះ លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពធ្លាប់បានសម្ដែងការយល់ឃើញថា ការកើតមានអំពើហិង្សារហូតដល់សាច់ញាតិឬកូនសម្លាប់ឪពុកម្តាយជាហូរហែមកនេះថា ទី ១ ទាក់ទងនឹងការប្រើសារធាតុញៀនដូចជា គ្រឿងញៀន និងគ្រឿងស្រវឹងជាដើម។
ទី២គឺជួនកាលបុគ្គលនោះមានភាពស្ត្រេសបណ្តាលមកពីបរិយាកាសនៅជុំវិញខ្លួនធ្វើឱ្យជីវិតស្មុគស្មាញ ឈានដល់ធ្លាក់ទឹកចិត្តខ្លាំងហើយក៏មានចិត្តឆេវឆាវកាប់សម្លាប់គ្នា។ រីឯបញ្ហាទី៣ ប្រហែលជាយើងខ្វះនូវការអប់រំតាមផ្លូវចិត្តនិងការអប់រំផ្នែកសីលធម៌ឱ្យបានស៊ីជម្រៅនិងការបញ្ជ្រាបអហិង្សាឱ្យបានជ្រៅទៅក្នុងសហគមន៍។
មួយវិញទៀតលោកថា គឺបុគ្គលមួយចំនួនមានគំនិតបដិសេធរឿងហិង្សាឬក៏ពាក្យសម្តីបង្កើតឱ្យមានហិង្សាដែលគួរតែមានការការពារ ឬមានការបង្ការកុំឱ្យវាកើតមាន។
លោកថា៖«ទាំងអ្នកនយោបាយទាំងបុគ្គលផ្សេងៗទៀតគួរតែនាំគ្នាប្រើភាសាដែលនាំឱ្យមានសន្តិភាពជាភាសាបែបអហិង្សា អាហ្នឹងវាប្រសើរ»៕
