ភ្នំពេញ: សមត្ថកិច្ចខណ្ឌសែនសុខបាននិងកំពុងស្រាវជ្រាវកំណត់អត្តសញ្ញាណជនសង្ស័យដែលសម្លាប់កម្មការិនីរោងចក្រម្នាក់ បន្ទាប់ពីគេបានប្រទះឃើញសាកសពនាងដេកស្លាប់នៅក្នុងបន្ទប់ជួល ១ កន្លែង នៅភូមិដូង សង្កាត់អូរបែកក្អម ខណ្ឌសែនសុខ រាជធានីភ្នំពេញកាលពីយប់ថ្ងៃទី ២៧ ខែវិច្ឆិកា ដោយសមត្ថកិច្ចមានការសង្ស័យថា ជាករណីប្លន់សម្លាប់។
លោក ហួរ ម៉េងវ៉ាង អធិការនគរបាលខណ្ឌសែនសុខបានប្រាប់ភ្នំពេញប៉ុស្ដិ៍កាលពីម្សិលមិញថា សមត្ថកិច្ចជំនាញខណ្ឌសែនសុខកំពុងស្រាវជ្រាវរកអត្តសញ្ញាណជនសង្ស័យដែលបានសម្លាប់នារីម្នាក់ឈ្មោះ សឿង ស្រីដា អាយុ ២៣ ឆ្នាំ ជាកម្មការិនីរោងចក្រស្នាក់នៅក្នុងបន្ទប់ជួលក្នុងទីតាំងកើតហេតុខាងលើដែលមានស្រុកកំណើតនៅស្រុកត្បូងឃ្មុំ ខេត្តត្បូងឃ្មុំ។
លោកបានបញ្ជាក់ថា៖ «សមត្ថកិច្ចបានប្រគល់សពជូនទៅឲ្យក្រុមគ្រួសារគាត់នៅខេត្តត្បូងឃ្មុំរួចរាល់ហើយនៅថ្ងៃនេះ [ថ្ងៃព្រហស្បតិ៍ ]ដោយយើងកំពុងស្រាវជ្រាវរកឃាតករ ប៉ុន្ដែនីតិវិធីស្រាវជ្រាវនេះ យើងមិនអាចជម្រាបជូនបានទេ»។
លោក នាង ផល្លី នាយប៉ុស្ដិ៍នគរបាលសង្កាត់អូរបែកក្អមក៏បានថ្លែងដែរថា សមត្ថកិច្ចជំនាញកំពុងស្រាវជ្រាវរកឃាតករ ខណៈសាកសពនារីរងគ្រោះត្រូវបានប្រគល់ជូនទៅក្រុមគ្រួសារយកទៅធ្វើបុណ្យនៅស្រុកកំណើតរបស់គាត់រួចហើយ។
លោកបន្តថា សាកសពនារីរងគ្រោះត្រូវបានមិត្តភក្តិជិតខាងបន្ទប់ជួលសង្ស័យថាស្លាប់នៅក្នុងបន្ទប់ជួលរបស់គាត់ បន្ទាប់ពីធុំក្លិនស្អុយ ហើយនៅពេលទូរស័ព្ទហៅម្ចាស់ផ្ទះជួលឲ្យមកចាក់សោចូលមើលក៏បានប្រទះឃើញសពជនរងគ្រោះដែលមានសភាពស្អុយរលួយតែម្ដង។
លោកបន្ថែមថា នៅជំហានដំបូងសមត្ថកិច្ចបានសន្និដ្ឋានថា ជាករណីប្លន់សម្លាប់ ដោយសារនៅលើសាកសព និងក្បែរនោះមានឃើញស្នាមឈាម និងមានក្រណាត់ភួយគ្របខាងលើមុខសាកសព។ លើសពីនេះសាកសពមានស្នាមរឹតកជាមួយនឹងខ្សែអង្រឹង ហើយមានស្នាមដាច់រលាត់ត្រង់កជនរងគ្រោះបណ្ដាលឲ្យមានឈាមព្រមទាំងបាត់ទ្រព្យសម្បត្តិ គ្រឿងអលង្ការនៅលើខ្លួននាង ១ ចំនួនទៀត។
លោកបានបញ្ជាក់ថា៖ «យើងបានធ្វើកោសល្យវិច័យទៅលើសាកសពហ្នឹង គឺឃើញមានចំណុចសង្ស័យច្រើន ប៉ុន្ដែឥឡូវនេះយើងមិនទាន់អាចដាក់ការសង្ស័យលើនរណាម្នាក់នៅឡើយ គឺយើងនៅបន្តស្រាវជ្រាវលម្អិតសិន ដើម្បីកុំឲ្យមានការភាន់ច្រឡំទៅលើនរណាម្នាក់ដែលគាត់គ្មានកំហុស»។
លោក យឹម រ័ត្ន ចៅសង្កាត់អូរបែកក្អមបានថ្លែងកាលពីម្សិលមិញថា ពិតជាមានករណីឃាតកម្មទៅលើនារីរងគ្រោះម្នាក់មែន ប៉ុន្ដែលោកមិនទាន់បានដឹងពីនីតិវិធីរបស់សមត្ថកិច្ចជំនាញទេ ដោយពួកគាត់កំពុងធ្វើការងារនេះ។
លោកបានបន្តថា តាមការសាកសួរពីមិត្តភក្ដិគាត់ និងភាគីរោងចក្រដែលគាត់ធ្វើការនោះបានរៀបរាប់ប្រាប់សមត្ថកិច្ចថា នារីរងគ្រោះបានខកខានមកធ្វើការតាំងពីថ្ងៃទី ២៤ ខែវិច្ឆិកា ដោយបានបាត់ដំណឹងហើយនៅពេលទាក់ទងតាមទូរស័ព្ទក៏មិនចូល ឬទាក់ទងតាមបណ្ដាញសង្គមហ្វេសប៊ុកក៏មិនឆ្លើយតប ប៉ុន្ដែគ្មានអ្នកសង្ស័យថា នាងស្លាប់ទេ។
លោកបន្ថែមថា៖ «បន្ថែមលើនេះ ខ្ញុំបានសួរទៅអ្នកជិតខាងបន្ទប់នាងទៀត ហើយពួកគាត់បានប្រាប់ខ្ញុំថា ពួកគាត់មិនបានឃើញនារីរងគ្រោះចេញពីបន្ទប់អស់ជាច្រើនថ្ងៃមកហើយ ប៉ុន្ដែបន្ទប់បែរជាចាក់សោទ្វារពីខាងក្រៅជាប់ដោយពួកគាត់មិនបានចាប់អារម្មណ៍អ្វីទេ ទាល់តែមានធុំក្លិនស្អុយចេញពីក្នុងបន្ទប់នោះ ទើបនាំគ្នាសង្ស័យ ហើយក៏សុំឲ្យម្ចាស់ផ្ទះជួលមកចាក់សោមើលក៏ឃើញសាកសពមានសភាពបែបនេះតែម្ដង»៕