ភ្នំពេញៈ សមត្ថកិច្ចអះអាងថាខ្លួនកំពុងស៊ើបអង្កេតរកមុខសញ្ញាជនសង្ស័យដែលលួងលោមនិងដាក់ថ្នាំក្មេងស្រីអាយុ ៨ ឆ្នាំម្នាក់ពីសាលារៀនក្នុងខណ្ឌទួលគោកដើម្បីយកទៅរំលោភសេពសន្ថវៈ ខណៈសង្គមស៊ីវិលធ្វើការការពារលើកុមារសម្តែងក្តីបារម្ភ ដោយសារករណីបែបនេះធ្លាប់កើតជាបន្តបន្ទាប់ដែល ទាមទារការយកចិត្តទុកដាក់ពីភាគីពាក់ព័ន្ធ។
តាមសេចក្តីប្រកាសព័ត៌មានរបស់អង្គភាពការពារកុមារបានឲ្យដឹងថា កាលពីព្រឹកថ្ងៃ ៥ មីនា មានកុមារីអាយុ ៨ ឆ្នាំម្នាក់ ត្រូវបានអ្នកផ្ទះជូនមកដល់សាលារៀននៅម្តុំទួលគោក ប៉ុន្តែខណៈនាងដើរសំដៅថ្នាក់រៀន ស្រាប់តែមានយុវជនអាយុប្រហែល ១៨ ឆ្នាំម្នាក់ មានសម្បុរស ធាត់ ខ្ពស់ និងមានភ្នែកធំៗពាក់អាវយឺតពណ៌ក្រហមជាមួយខោខូវប៊យ ជិះម៉ូតូម៉ាក Zoomer ពណ៌ក្រហមលាយខ្មៅបានហៅក្មេងស្រីជជែកគ្នាដោយប្រាប់នាងថា ម្តាយគ្រោះថ្នាក់ចរាចរណ៍ ហើយថាខ្លួននឹងជូនកុមារីរងគ្រោះទៅជួបម្តាយ។
សេចក្តីប្រកាសដដែលបានបន្តថា បន្ទាប់មកយុវជននោះបាននាំក្មេងស្រីរងគ្រោះទៅបន្ទប់មួយនៅទីតាំងដែលកុមារីមិនស្គាល់រួចដាក់ថ្នាំនិងរំលោភសេពសន្ថវៈរួចបាននាំនាងមកទម្លាក់ចោលនៅម្តុំបឹងទំពុន ហើយ ១ ម៉ោងក្រោយមកទើបត្រូវបានអាជ្ញាធរមូលដ្ឋានប្រទះឃើញ។
លោក កែវ ធា ប្រធានការិយាល័យប្រឆាំងការជួញដូរមនុស្សនៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍ពីម្សិលមិញថា ករណីនេះ សមត្ថកិច្ចកំពុងកំណត់មុខសញ្ញាជនសង្ស័យ តែលោកថា មិនអាចបញ្ជាក់ពីលទ្ធផលបានទេ។
លោកថា៖ «ខាងប៉ូលិសយើងកំពុងធ្វើការដុតដៃដុតជើងទាំងអាជ្ញាធរថ្នាក់លើដល់ថ្នាក់ក្រោមរហូតដល់គ្រួសារទៀត ហើយខ្ញុំកំពុងតែធ្វើការងារហ្នឹង អ៊ឹចឹងមិនអាចប្រាប់អ្វីបន្ថែមទេ ព្រោះអាចប៉ះពាល់ដល់ការស៊ើបអង្កេត»។
លោក គង់ សុវង្ស អធិការរងខណ្ឌមានជ័យបានប្រាប់ភ្នំពេញប៉ុស្តិ៍ពីម្សិលមិញថា ក្រោយជនសង្ស័យនាំកុមារីរងគ្រោះមកទម្លាក់ចោលនៅម្តុំបឹងទំពុនក្នុងខណ្ឌមានជ័យនោះ ក្រុមជំនាញទាំងក្នុងខណ្ឌមានជ័យ និងខណ្ឌទួលគោក បានបើកការស៊ើបអង្កេតរកមុខសញ្ញាជនសង្ស័យ។
លោកថា៖ «ជំនាញយើងបានបញ្ចូលសំណុំរឿងនិងភ័ស្តុតាងទៅឲ្យជំនាញទទួលបន្ទុកផ្នែកព្រហ្មទណ្ឌនៅខណ្ឌទួលគោកជាអ្នកស្រាវជ្រាវបន្តក្នុងករណីនេះរួចហើយ។ មុខសញ្ញាដែលយើងមាននៅពេលនេះគឺម៉ាកម៉ូតូដែលជនសង្ស័យជិះ និងភិនភាគជនសង្ស័យក្នុងកាមេរ៉ាសុវត្ថិភាព»។
លោក គឹម កូលីដូ នាយប៉ុស្តិ៍នគរបាលសង្កាត់បឹងសាឡាង បានប្រាប់ថា កុមារីរងគ្រោះ មានលំនៅក្នុងសង្កាត់ទឹកថ្លា ហើយគេបានមករៀននៅសាលាបឋមសិក្សាបឹងសាឡាង ក្នុងខណ្ឌទួលគោក។ លោកបន្តថា ក្រោយកើតហេតុសមត្ថកិច្ចបានស៊ើបអង្កេតតាមតម្រុយដើម្បីកំណត់មុខសញ្ញាជនសង្ស័យ។
លោកបញ្ជាក់ថា៖ «ជំនាញកំពុងធ្វើ តែរហូតមកទល់ពេលនេះនៅមិនទាន់ច្បាស់ទេ យើងកំពុងប្រមូលភ័ស្តុតាង និងតម្រុយនានាតាមកាមេរ៉ាយើងហ្នឹងវាមិនសូវច្បាស់ ដូច្នេះយើងពិបាកនឹងសម្គាល់តែយើងមានភិនភាគនិងអត្តសញ្ញាណផ្សេងហើយ»។
បើតាមលោក គឹម កូលីដូ បច្ចុប្បន្នកុមារីក្មេងរងគ្រោះកំពុងស្ថិតក្នុងការថែរក្សាពីអាណាព្យាបាលនិងបានបញ្ចូនទៅមន្ទីរទេព្យពិនិត្យសុខភាពរួចហើយ។
លោកស្រី សោម វឌ្ឍនា ប្រធានផ្នែកផ្តល់សេវាកម្មគាំពារកុមារទូទាំងប្រទេសនៃអង្គភាពការពារកុមារ (child protection unit) បានថ្លែងថា កន្លងមក លោកស្រីធ្លាប់ទទួលបានព័ត៌មានពីការបាត់ក្មេងបែបនេះច្រើនករណីដែរ ដោយជនសង្ស័យបានធ្វើសកម្មភាពស្រដៀងៗគ្នាបន្ទាប់មកប្រព្រឹត្តបទល្មើសលើក្មេងស្រី។លោកស្រីបារម្ភពីសុវត្ថិភាពក្មេងស្រីដែលអាចប្រឈមការរំលោភបំពានតាមរូបភាពផ្សេងៗដូចជាក្នុងករណីនេះបើមិនការពារឲ្យដិតដល់នោះ។
លោកស្រីបានបញ្ជាក់ថា៖ «បច្ចុប្បន្នកុមារីនៅតែប្រឈម មុខច្រើនជាពិសេសនៅតាមទីដាច់ស្រយាលដូចក្នុងករណី នេះ ក្មេងស្រីបានក្លាយជាជនរងគ្រោះពីការរំលោភសេពសន្ថវៈ ដែលវាមិនមែនជារឿងថ្មីទេ។ ដូច្នេះសង្ឃឹមថានឹងមានវិធានការនានាជួយដល់កុមារី។ បើតាម លោកស្រី វឌ្ឍនា ក្នុង១ឆ្នាំៗលោកស្រីទទួលបានបណ្ដឹងពាក់ព័ន្ធនឹងកុមារីនៅទូទាំងប្រទេសប្រមាណ ៣០០ ករណី ក្នុងនោះភាគច្រើនរឿងរំលោភ។
លោក ស្កុត នីសិន (Scott Neeson) ស្ថាបនិកនៃអង្គការមូលនិធិកុមារកម្ពុជា Cambodian Children''s Fund (CCF) បានលើកឡើងតាមបណ្តាញសង្គមរបស់លោកកាលពីថ្ងៃពុធថា ហេតុការណ៍បែបនេះធ្លាប់ត្រូវបានជនសង្ស័យប្រើប្រាស់កន្លងមក ដូច្នេះសូមផ្សព្វផ្សាយដល់អាណាព្យាបាលរបស់កុមារទាំងអស់មិនត្រូវឲ្យកុមារទៅណាជាមួយអ្នកមិនធ្លាប់ស្គាល់និងត្រូវរាយការណ៍ជូនលោកគ្រូ អ្នកគ្រូរបស់ពួកគេចំពោះជនសង្ស័យ ព្រមទាំងហេតុការណ៍ផ្សេងៗដែលអាចផ្តល់ហានិភ័យដល់កុមារ។
លោក ស្កុត អំពាវនាវថា៖ «តាមបណ្តាសាលារៀន គួរមានកាមេរ៉ាសុវត្ថិភាពនិងពិនិត្យដំណើរការរបស់កាមេរ៉ាឲ្យបានល្អ»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានថ្លែងថា ក្រសួងបានយកចិត្តទុកដាក់លើបញ្ហានេះ និងបានដាក់បញ្ហាសុវត្ថិភាពការពារសិស្សជាអាទិភាពក្នុងការងារ។លោកបន្តថា តាមសាលាមួយចំនួនមានកាមេរ៉ាសុវត្ថិភាពរួចហើយ។
ប៉ុន្តែបន្ទាប់ពីទទួលបានព័ត៌មានទាំងនេះ ក្រសួងនឹងពង្រឹងបន្ថែមទៀតនូវវិធានសុវត្ថិភាពនេះ។
លោកបញ្ជាក់ថា៖ «ដូចនេះអាទិភាពទាំងឡាយដែលពាក់ព័ន្ធនឹងសុវត្ថិភាពរបស់កុមារា-កុមារីក៏ដូចជា សិស្សានុសិស្ស និស្សិតទាំងអស់ គឺក្រសួងនឹងបន្តយកចិត្តទុកដាក់ហើយករណីខាងលើនេះ គឺក្រសួងត្រៀមខ្លួនសហការជាបន្តជាមួយគ្រប់ភាគីពាក់ព័ន្ធដើម្បីចូលរួមបន្តពង្រឹងសុវត្ថិភាពគ្រប់បែបយ៉ាងជូនសិស្សានុសិស្ស»៕