.jpg)
ភ្នំពេញៈ ជនសង្ស័យពាក់ព័ន្ធគ្រឿងញៀនមួយក្រុម ដែលមានគ្នារហូតដល់ ៥៨ នាក់ ដែលត្រូវបានឃាត់ខ្លួនកាលពីយប់ថ្ងៃទី ១៩ ខែមករា នៅក្នុងក្លិបយីហោ PROKTVPRO ស្ថិតនៅតាមបណ្តោយមហាវិថីព្រះមុនីវង្សកំពុងតែត្រូវសាកសួរនៅមន្ទីរប្រឆាំងគ្រឿងញៀនក្រសួងមហាផ្ទៃ ខណៈដែលជនសង្ស័យជួញដូរគ្រឿងញៀនទម្ងន់ជាង ២ គីឡូក្រាមម្នាក់ ត្រូវនគរបាលខេត្តស្ទឹងត្រែងបញ្ជូនទៅតុលាការ។
យោងតាមរបាយការណ៍ដែលចុះផ្សាយនៅលើគេហទំព័ររបស់អគ្គស្នងការនគរបាលជាតិឲ្យដឹងថា សមត្ថកិច្ច (ក ៨ និង ក៣ ) នៃមន្ទីរប្រឆាំងគ្រឿងញៀនក្រសួងមហាផ្ទៃ កាលពីយប់រំលងអាធ្រាត្រឈានចូលថ្ងៃទី ១៩ ខែមករា ឆ្នាំ ២០១៩ បានចុះប្រតិបត្តិការបង្ក្រាបករណីជួញដូរគ្រឿងញៀន និងផ្តល់ទីតាំងឲ្យជួញដូរ និងប្រើប្រាស់គ្រឿងញៀន នៅក្នុងក្លិបយីហោឈ្មោះ PROKTVPRO ស្ថិតនៅតាមបណ្តោយមហាវិថីព្រះមុនីវង្ស ក្នុងភូមិ ៧ សង្កាត់បឹងត្របែក ខណ្ឌចំការមន។ ក្នុងប្រតិបត្តិការនោះ សមត្ថកិច្ចបានឃាត់ខ្លួនជនប្រើប្រាស់គ្រឿងញៀន ៥៨ នាក់ក្នុងនោះ មានជនជាតិចិន ២៩ នាក់ (ស្រី ៥ នាក់) កូរ៉េម្នាក់ វៀតណាម ២៣ នាក់ (ស្រី ១៥ នាក់) ថៃ២ នាក់ និងខ្មែរ ៣ នាក់ (ស្រី ១ នាក់)។
ក្រោយឃាត់ខ្លួនសមត្ថកិច្ចបានធ្វើតេស្តទឹកនោមរកឃើញថា ជនសង្ស័យចំនួន ៥២ នាក់ មានជាប់សារធាតុញៀនក្នុងទឹកនោម និង ៦ នាក់ទៀត គ្មានសារធាតុញៀនក្នុងទឹកនោមទេ។ ក្នុងចំណោមជនសង្ស័យទាំង ៥៨ នាក់ខាងលើមានម្នាក់ជាអនុប្រធានក្រុមហ៊ុនជាម្ចាស់ទីតាំងកើតហេតុឈ្មោះ ChaCheongmin ជាជនជាតិកូរ៉េ និងមានមេការរបស់ក្លិប PROKTVPRO ២ នាក់ទៀតឈ្មោះ Nguyen Tuanna ជាជនជាតិវៀតណាម និងឈ្មោះហ៊ត ជឿង ជាជនជាតិខ្មែរ។ ចំពោះវត្ថុតាងដែលសមត្ថកិច្ចរឹបអូសបាន មានថ្នាំអ៊ិចស្តាស៊ីគ្រាប់ទម្ងន់ ២,០៥ ក្រាម,ម្សៅកេតាមីនទម្ងន់ ៦,៥៨ ក្រាម និងម្សៅអ៊ិចស្តាស៊ីទម្ងន់ ៩៧,០។
លោក អ៊ិន សុង អនុប្រធានមន្ទីរប្រឆាំងគ្រឿងញៀនក្រសួងមហាផ្ទៃ បានប្រាប់ភ្នំពេញប៉ុស្តិ៍ ថា គិតរហូតមកដល់ថ្ងៃម្សិលមិញជនសង្ស័យទាំង ៥៨ នាក់នោះគឺកំពុងត្រូវបានបន្តសាកសួរនៅមន្ទីរប្រឆាំងគ្រឿងញៀន។
ចំណែកលោក សាន និមល ស្នងការរងទទួលផែនបទល្មើស ខេត្តស្ទឹងត្រែងបានប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យដែលសមត្ថកិច្ចបានឃាត់ខ្លួនជាមួយគ្រឿងញៀនជាង ២ គីឡូក្រាមកាលពីថ្ងៃទី ១៩ ខែមករា មានឈ្មោះ ផល កុសល អាយុ ២៩ ឆ្នាំរស់នៅភូមិ-ឃុំសេកុង ស្រុកសៀមប៉ាង។ «បុរសនោះ ត្រូវបានសមត្ថកិច្ចយើងចាប់គាត់ ហើយនៅនឹងខ្លួនរបស់គាត់មានគ្រឿងញៀនក្នុងថង់ប្លាស្ទិកចំនួន ២ ដុំ ស្មើ ២ គីឡូក្រាម។ យើងបានបញ្ជូនគាត់ទៅសាលាដំបូងខេត្តស្ទឹងត្រែងពីព្រឹកមិញ (ថ្ងៃទី ២០ មករា)»។
លោកថា៖ «យោងចម្លើយរបស់ជនសង្ស័យ ក្រោយយើងឃាត់ខ្លួន គាត់ប្រាប់យើងថា គ្រឿងញៀននេះ គាត់យកបន្តពីមនុស្សម្នាក់ តែគាត់ក៏មិនបានប្រាប់យើងថា នាំចូលពីប្រទេស ឡាវ ដែរ»។
ជាមួយគ្នានេះដែរ ក្នុងកិច្ចប្រជុំបូកសរុបការងារឆ្នាំ ២០១៨ និងលើកទិសដៅការងារសម្រាប់អនុវត្តឆ្នាំ ២០១៩ ដែលធ្វើឡើងនៅសាលាខេត្តស្ទឹងត្រែង កាលពីថ្ងៃទី ៩ ខែមករា បង្ហាញថា ពេញមួយឆ្នាំ ២០១៨ នៅក្នុងខេត្តជាប់ព្រំដែនឡាវមួយនេះ បានធ្វើការបង្ក្រាបគ្រឿងញៀនបាន ៥៦ ករណី ដោយឃាត់ខ្លួនជនសង្ស័យបានចំនួន ១១៤ នាក់ (ស្រី ៨ នាក់) ក្នុងនោះមានខ្មែរ ១០៧ នាក់ (ស្រី ៨ នាក់) ឡាវ ៥ នាក់ និងវៀតណាម ២ នាក់។ ជាមួយគ្នានេះសមត្ថកិច្ចក៏បានរឹបអូសថ្នាំញៀនប្រភេទមេតំហ្វេតាមីន (ICE) បានទម្ងន់ ១៦៤០៧៤,៣៨ ក្រាម ថ្នាំញៀនប្រភេទមេតំហ្វេតាមីន (WY) ១១៩៩៥ គ្រាប់ ថ្នាំញៀនប្រភេទកេតាមីនទម្ងន់ ២២៨៥៧,៨២ ក្រាម ព្រមទាំងបានរឹបអូសទ្រព្យសម្បត្តិមួយចំនួនធំ៕
(កែសម្រួល សូ វិសាល)
