.jpg)
គ្រឿងញៀនបម្រុងឆ្លងទៅវៀតណាមពេលសមត្ថកិច្ចចាប់បាន។ ប៉ូលិស
ស្វាយរៀងៈ នគរបាលប្រឆាំងបទល្មើសគ្រឿងញៀនខេត្តស្វាយរៀង កំពុងបន្តសហការជាមួយសមត្ថកិច្ចវៀតណាមដើម្បីស្រាវជ្រាវរកអត្តសញ្ញាណមេខ្លោងជួញគ្រឿងញៀន បន្ទាប់ពីចាប់បានមេតំហ្វេតាមីនជាង ១៦ គីឡូក្រាម នៅក្បែរព្រំដែនអន្តរជាតិបាវិតខណៈជនសង្ស័យម្នាក់យួរវ៉ាលិសគ្រឿងញៀនគេចពីសមត្ថកិច្ចបម្រុងឆ្លងដែនទៅវៀតណាមកាលពីយប់ថ្ងៃ ទី ១៣ ខែ មិថុនា ឆ្នាំ ២០១៩។
លោក កាន កេន នាយការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តស្វាយរៀងបានប្រាប់កាលពីម្សិលមិញថា គ្រឿងញៀនដែលជនសង្ស័យទម្លាក់ចោលហើយសមត្ថកិច្ចចាប់បាននោះមាន ១៧ កញ្ចប់ទម្ងន់ជាង ១៦ គីឡូក្រាម។ បច្ចុប្បន្នសមត្ថកិច្ចកំពុងសហការជាមួយភាគីវៀតណាម ដើម្បីស្រាវជ្រាវរកមេខ្លោងជាម្ចាស់គ្រឿងញៀននោះ។
លោកបន្តថា គ្រឿងញៀននោះជាប្រភេទមេតំហ្វេតាមីនដែលជនសង្ស័យបានវេចខ្ចប់ចំនួន ១៧ កញ្ចប់ ដាក់ក្នុងវ៉ាលិសហើយទំនងបម្រុងនាំឆ្លងដែនចូលប្រទេស វៀតណាម តែដោយសារជនសង្ស័យឃើញសមត្ថកិច្ចកម្ពុជាកំពុងល្បាតតាមព្រំដែនក៏ទម្លាក់វ៉ាលិសនោះចោល ហើយរត់គេចខ្លួនបាត់។
លោកប្រាប់ថា៖ «នៅយប់កើតហេតុនោះមានភ្លៀងធ្លាក់ហើយជនសង្ស័យរត់ចូលព្រៃចម្ការដើមប្រេងខ្យល់បាត់ហើយយើងបានរុករកដែរ តែរកមិនឃើញ។ បញ្ហានេះយើងបានទាក់ទងជាមួយអាជ្ញាធរវៀតណាមហើយដើម្បីស្រាវជ្រាវរកជនសង្ស័យ»។
លោក កាន កេន បានរំឭកប្រាប់ថា នៅយប់កើតហេតុកម្លាំងវរសេនាតូចនគរបាលការពារព្រំដែនលេខ ៦១១ នៃស្នងការដ្ឋាននគរបាលខេត្តស្វាយរៀងបានចេញល្បាតនៅចំណុចចន្លោះបង្គោលព្រំដែនលេខ ១៧០ និង ១៧១ ខាងជើងច្រកទ្វារអន្តរជាតិបាវិត ចម្ងាយប្រហែល ៥០០ ម៉ែត្រ។ ខណៈកំពុងដើរល្បាតនោះសមត្ថកិច្ចបានឃើញជនសង្ស័យម្នាក់កំពុងយួរវ៉ាលិសស ១ ដើរកាត់ស្រែបំណងឆ្លងដែនចូលប្រទេសវៀតណាម។
លោកបានបញ្ជាក់ថា ដោយមានការសង្ស័យសមត្ថកិច្ចក៏បានហៅឲ្យជននោះឈប់ដើម្បីសាកសួរតែត្រូវជនសង្ស័យទម្លាក់វ៉ាលិសនោះចោលហើយរត់គេចខ្លួនចូលចម្ការប្រេងខ្យល់បាត់។ លុះសមត្ថកិច្ចបានយកវ៉ាលិសនោះ មកពិនិត្យស្រាប់តែឃើញម្សៅពណ៌សថ្លាចំនួន ១៧ កញ្ចប់ ហើយក្រោយពីធ្វើកោសល្យវិច័យទើបដឹងថាជាគ្រឿងញៀនប្រភេទមេតំហ្វេតាមីន មានទម្ងន់សរុបជាង ១៦ គីឡូក្រាម៕
