.jpg)
សមត្ថកិច្ចចុះធ្វើកោសល្យវិច័យសាកសពស្រ្តីម្នាក់ ដែលគេប្រទះឃើញនៅក្នុងព្រៃ។ រូបថត នគរបាល
មណ្ឌលគិរី៖ នគរបាលខេត្តមណ្ឌលគិរីកំពុងស្រាវជ្រាវរកអត្តសញ្ញាណសពស្រ្តីម្នាក់ បន្ទាប់ពីពលរដ្ឋប្រទះឃើញក្នុងព្រៃ នៅភូមិចុងផាង ឃុំពូជ្រៃ ស្រុកពេជ្រាដា កាលពីថ្ងៃទី ៤ ខែកក្កដា។
លោក សូ សុវណ្ណ ស្នងការរងទទួលផែនព្រហ្មទណ្ឌខេត្តមណ្ឌលគិរីបានប្រាប់ពីម្សិលមិញថា សពស្រ្តីនោះមានអាយុប្រហែល ៣០ ឆ្នាំ តែលោកមិនទាន់ដឹងថាត្រូវគេសម្លាប់ ឬយ៉ាងណាទេ។ រហូតមកទល់ពេលនេះស្នងការដ្ឋាននគរបាល ខេត្តមណ្ឌលគិរីបានផ្សព្វផ្សាយករណីនេះទៅគ្រប់ស្នងការដ្ឋានទូទាំងប្រទេស ដើម្បីស្វែងរកសាច់ញាតិ។
លោកបន្តថា ទន្ទឹមនឹងនេះមន្រ្តីនគរបាលជំនាញខេត្តក៏បានធ្វើកោសល្យវិច័យលើសាកសពដែរ ក្រែងលោពាក់ព័ន្ធនឹងឃាតកម្ម។ រីឯសាច់ញាតិ និងគ្រួសារសព មិនទាន់មានឃើញទាក់ទងមកសមត្ថកិច្ចទេរហូតមកទល់ពេលនេះ។
លោកថ្លែងថា៖ «គ្រោងឆ្អឹងសាកសពស្រ្តីម្នាក់នោះខាងខ្ញុំបានប្រមូលរក្សាទុកនៅវត្តមួយក្នុងភូមិដែលប្រទះឃើញសាកសពនោះ ដើម្បីធ្វើកោសល្យវិច័យ និងទុកនៅទីតាំងមួយងាយស្រួលសាច់ញាតិគេមករក។
លោក សុ វណ្ណ បានឲ្យដឹងថា សពនេះត្រូវបានអ្នកចូលព្រៃរកបេះផ្លែឈើប្រទះឃើញ ហើយបានរាយការណ៍ប្រាប់នគរបាលប៉ុស្តិ៍ឃុំពូជ្រៃចុះពិនិត្យ ក៏ឃើញមានសភាពស្អុយរលួយនៅសល់តែស្បែក និងគ្រោងឆ្អឹង។
លោកបន្តថា សពនោះពាក់អាវសង្រែកពណ៌ស និងស្លៀកខោជើងខ្លី ពណ៌ខ្មៅ។ តែជើងស្តាំបានរបូតចេញពីដងខ្លួន និងមានពាក់កងដៃប្រាក់ចំនួន ៣ កង និងមានសក់វែង។
លោកបន្តថា រហូតមកទល់ពេលនេះមិនទាន់មានខេត្តណាមួយផ្តល់ព័ត៌មានដល់ស្នងការដ្ឋាននគរបាលខេត្តមណ្ឌលគិរីពីការបាត់សមាជិកគ្រួសារនៅឡើយទេ។ បើតាមសមត្ថកិច្ចជំនាញកោសល្យវិច័យថា ស្ត្រីនេះអាចស្លាប់ប្រហែល ១ ខែមុន។ ប៉ុន្តែសមត្ថកិច្ចក៏មិនទាន់សន្និដ្ឋានថា ជាករណីឃាតកម្មដែរ។
លោកថា៖ «បើជាករណីឃាតកម្មយ៉ាងហោចណាស់ក៏វាមានបាក់បែកឆ្អឹងកន្លែងណាមួយ ឬក៏មានផុងលលាដ៍ក្បាលដែរតែនេះវាអត់មាន»។
លោកបន្តថា គ្រោងឆ្អឹងសពត្រូវយកទៅរក្សាទុកក្នុងវត្តមួយរយៈខ្លីសិន ក្រែងសាច់ញាតិមករក។ តែបើមិនឃើញមានសាច់ញាតិទេ សមត្ថកិច្ចនឹងពិភាក្សាគ្នាទៀតថា តើត្រូវបូជា ឬក៏កប់៕
