.jpg)
ភ្នំពេញៈ មន្ត្រីនគរបាលរាជធានីភ្នំពេញកំពុងស៊ើបអង្កេតរកចាប់ខ្លួនជនសង្ស័យឈ្មោះ គីវ ស៊ីថា ជាមន្ត្រីក្រសួងមហាផ្ទៃ និងជាអតីតអធិការរងក្រុងតាខ្មៅ បន្ទាប់ពីរត់គេចខ្លួនក្រោយបំផ្ទុះអាវុធ ៣ គ្រាប់ក្នុងជម្លោះជាមួយមន្ត្រីយោធាកាលពីថ្ងៃ ៤ កុម្ភៈក្នុងខណ្ឌ ៧ មករា រាជធានីភ្នំពេញ។
លោក ឆាយ គឹមខឿន មន្ត្រីនាំពាក្យអគ្គស្នងការនគរបាលជាតិបានប្រាប់ភ្នំពេញប៉ុស្ដិ៍កាលម្សិលមិញថា បុគ្គលដែលបាញ់គំរាមមន្ត្រីយោធានោះគឺជាមន្ត្រីនគរបាលនៅនាយកដ្ឋានសវនកម្ម និងជាអតីតអធិការរងក្រុងតាខ្មៅ ហើយពេលនេះ នគរបាលរាជធានីភ្នំពេញកំពុងតាមចាប់ខ្លួន។
លោកថា៖ «តាមពិតអ្នកបាញ់អ្នករត់នោះ គេកំពុងធ្វើការហើយសូម្បីម្ចាស់កាំភ្លើងក៏ឃាត់ខ្លួនដែរ។ ដើម្បីរឹតតែច្បាស់សួរខាងស្នងការទៅ គេដឹងច្បាស់ជាង»។
ប៉ុន្តែលោក ស ថេត ស្នងការនគរបាលរាជធានីភ្នំពេញបានប្រាប់ថា លោកមិនចង់បកស្រាយច្រើនទេ ដោយសារកំពុងតាមរកចាប់ខ្លួនមន្ត្រីនោះ។ លោកថា៖ «អាការបាញ់បោះដោយគ្មានការអនុញ្ញាតអ៊ីចឹង វាត្រូវ (ទោស) ប្រមាណអីប្រមាណមិនទាន់ដឹងទេ»។
លោក ធឹម សុផា អគ្គនាយកនៃអគ្គនាយកដ្ឋានសវនកម្មក្រសួងមហាផ្ទៃបានទទួលស្គាល់ថា លោក គីវ ស៊ីថាគឺពិតជាមន្ត្រីនៅនាយកដ្ឋានសវនកម្មមែន តែទើបតែផ្លាស់មកពីអធិការដ្ឋានក្រុងតាខ្មៅពីសប្ដាហ៍មុនប៉ុណ្ណោះ ។
កាលពីថ្ងៃទី ៤ កុម្ភៈ ដោយសារកើតជម្លោះជាមួយឈ្មោះ ជា ពេជ្រចិន្តា ជាមន្ត្រីយោធា លោក គីវ ស៊ីថា បានដណ្ដើមកាំភ្លើងពីនគរបាលម្នាក់បាញ់គំរាមមន្ត្រីយោធានោះចំនួន ៣ គ្រាប់ ហើយក្រោយមកក៏គេចខ្លួនបាត់ ។
ក្រោយកើតហេតុ មន្ត្រីកងរាជអាវុធហត្ថបានឃាត់ខ្លួនលោក ជា ពេជ្រចិន្តា ទៅសួរនៅបញ្ជាការដ្ឋានកងរាជអាវុធហត្ថភ្នំពេញ ក្នុងនោះក៏បាននាំខ្លួនមន្ត្រីនគរបាលជាម្ចាស់អាវុធទៅសួរផងដែរ។
ប្រភពមួយចំនួនបាននិយាយថា គូជម្លោះគឺជាអ្នកជិតខាងគ្នា និងធ្លាប់បានឈ្លោះគ្នាយូរមកហើយ ។ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានប្រាប់ថា លោកមិនអាចលម្អិតជុំវិញការសួរមន្រ្តីយោធានោះទេ ខណៈសំណុំរឿងនេះកំពុងស៊ើបអង្កេត៕
