.jpg)
សមត្ថកិច្ចពេលអូសឈើចេញពីក្នុងស្រះទឹកថ្មីៗនេះ។ រូបថត ជា ហ៊ាន
កំពង់ស្ពឺ: អាជ្ញាធរខេត្តកំពង់ស្ពឺកំពុងស្រាវជ្រាវរកចាប់ខ្លួនជនសង្ស័យជាមន្ត្រីយោធាម្នាក់ឈ្មោះ ជឿង ថេង ពាក់ព័ន្ធបទល្មើសព្រៃឈើជិត ២០០ កំណាត់ស្មើនឹង ៣៤ ម៉ែត្រគុប បន្ទាប់ពីសមត្ថកិច្ចបានរកឃើញ និងបង្ក្រាបបានបន្តបន្ទាប់នៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ប៉ុន្ដែម្ចាស់ឈើនោះបានរត់គេចខ្លួន។
លោក នៅ ណាក់ អនុប្រធានមន្ទីរបរិស្ថានខេត្តកំពង់ស្ពឺបានថ្លែងពីម្សិលមិញថា ពិតជាមានការរកឃើញឈើជិត ២០០ កំណាត់ស្មើនឹង ៣៤ ម៉ែត្រគុបនោះមែន។ ក្នុងនោះឃាត់រថយន្ដដឹកកុងតឺនឺរ ១ គ្រឿង, រថយន្តតូច ២ គ្រឿង,អេស្កាវ៉ាទ័រ ១ គ្រឿង សម្រាប់លើកឈើដាក់ក្នុងទូកុងតឺនឺរ និងម៉ូតូ ១ គ្រឿង។
លោកថា៖ «បច្ចុប្បន្នវត្ថុតាងទាំងអស់យើងបានប្រគល់ជូនខាងជំនាញបរិស្ថានដែនជម្រកសត្វព្រៃភ្នំឱរ៉ាល់ចាត់ការតាមនីតិវិធីបន្ដ។ យើងកំពុងស្រាវជ្រាវតាមចាប់ខ្លួនជនសង្ស័យម្នាក់គឺយើងស្គាល់អត្តសញ្ញាណហើយ ប៉ុន្ដែខ្ញុំមិនអាចបង្ហាញសាវតារគាត់បានទេ ព្រោះយើងកំពុងតាមចាប់ខ្លួន»។
លោក ហ៊ុល ម៉ារ៉ា អនុប្រធានការិយាល័យដែនជម្រកសត្វព្រៃភ្នំឱរ៉ាល់បានថ្លែងពីម្សិលមិញថា ក្រុមការងារលោកបានទទួលឈើទាំងនោះពីមន្ត្រីចម្រុះរួចហើយ ដោយបានដឹកទៅរក្សាទុកនៅទីស្នាក់ការដែនជម្រកសត្វព្រៃភ្នំឱរ៉ាល់។
លោកថា៖ «ជនសង្ស័យបានយកឈើទាំងអស់ទៅលាក់នៅទីតាំងផ្សេងៗគ្នា ដោយមួយចំនួនកប់ក្នុងដី ខ្លះទម្លាក់ចូលទឹកស្រះ និងមួយចំនួនលាក់ក្នុងព្រៃក្រៅពីទីតាំងស្តុកឈើដែលយើងរកឃើញហ្នឹង។
ឥឡូវនេះយើងកំពុងតាមចាប់ខ្លួនជនសង្ស័យ និងអ្នកពាក់ព័ន្ធផ្សេងៗទៀត»។
លោក ជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACN-CIPO) បានថ្លែងពីម្សិលមិញថា ម្ចាស់ឈើ និងម្ចាស់ទីតាំងឈ្មោះ ជឿង ថេង រស់នៅភូមិផ្សារកន្ទួត ឃុំសង្កែសាទប ស្រុកឱរ៉ាល់ ខេត្តកំពង់ស្ពឺជាមន្ត្រីយោធាភូមិភាគទី ៣ ថ្នាក់អនុសេនីយ៍ឯក។
លោកថា៖ «ជនសង្ស័យជាមុខសញ្ញាឧក្រិដ្ឋជនព្រៃឈើដ៏សកម្មម្នាក់ ហើយត្រូវបានតុលាការខេត្តកំពតចេញដីកាឃុំខ្លួនម្ដងរួចហើយ បន្ទាប់មកជាប់ឃុំខ្លួននៅពន្ធនាគារព្រៃសម្ដងទៀតទាក់ទងបទល្មើសព្រៃឈើដែរ។ លុះចេញមកវិញ ជនសង្ស័យបានប្រព្រឹត្តបទល្មើសព្រៃឈើម្ដងទៀតក្នុងស្រុកឱរ៉ាល់ ខេត្តកំពង់ស្ពឺនេះ ប៉ុន្ដែម្ដងនេះបានរត់គេចខ្លួន»។
តាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺបានឲ្យដឹងពីម្សិលមិញថា នគរបាលប្រឆាំងបទល្មើសសេដ្ឋកិច្ចសហការជាមួយផ្នែកពាក់ព័ន្ធដឹកនាំដោយលោក សុខ ភា អភិបាលរងខេត្តកំពង់ស្ពឺ និងមានការសម្របសម្រួលពីលោក វ៉ិត មឃៈ ព្រះរាជអាជ្ញារងនៃអយ្យការអមសាលាដំបូងខេត្តកំពង់ស្ពឺបានចុះឆែកឆេរទីតាំងលួចលាក់ទុកឈើខុសច្បាប់ ១ កន្លែងកាលពីថៃ្ង ១០ ខែកក្កដា នៅភូមិដំបងវេញ ឃុំសង្កែសាទប ស្រុកឱរ៉ាល់។ ឈើនោះជារបស់ឈ្មោះ ជឿង ថេង ភេទប្រុសអាយុ ៤២ ឆ្នាំ ធ្លាប់ជាប់ពាក់ព័ន្ធរឿងដឹកជញ្ជូនអនុផលព្រៃឈើបំផ្លាញស្ពាន នៅខេត្ដកំពត និងធ្លាប់ជាប់ពន្ធនាគារផងដែរ។
របាយការណ៍បន្តថា ជាលទ្ធផលរកឃើញឈើលេខ ២ ចំនួន ៣០ ដើមបង្កប់ក្នុងស្រះទឹកដោយមន្ត្រីជំនាញកំពុងកសាងសំណុំរឿងបញ្ជូនទៅតុលាការ។ លុះដល់ថ្ងៃ ១៣ កក្កដា សមត្ថកិច្ចបានរកឃើញឈើជ្រុងលេខ ២ ចំនួន ១៦១ កំណាត់បន្ថែមទៀតនៅទីតាំងដដែល រួមទាំងឧបករណ៍ប្រព្រឹត្តល្មើស ហើយបានប្រគល់ជូនខាងជំនាញបរិស្ថានដែនជម្រកសត្វព្រៃភ្នំឱរ៉ាល់ចាត់ការបន្តតាមនីតិវិធីច្បាប់។
លោក ជឿង ថេង មិនអាចទាក់ទងបានទេពីម្សិល៕
