លោក ស ថេត ស្នងការរាជធានីភ្នំពេញ ថ្លែងប្រាប់ភ្នំពេញប៉ុស្ដិ៍ថា សមត្ថកិច្ច បានសម្រេចឃាត់រថយន្ត និងអ្នកបើកបរយកទៅស្នងការដ្ឋាននគរបាលរាជធានីភ្នំពេញដើម្បីចាត់ការតាមនីតិវិធី។
លោកថ្លែងថា៖ «យើងអនុវត្ដទៅតាមការណែនាំរបស់សារាចររាជធានីភ្នំពេញ ដោយបានហាមឃាត់ រថយន្ដធុនធំ និងអ្នកបើកបរនោះ។ ឥឡូវយើងឃាត់ទុកមួយរយៈសិន។ ខ្ញុំអត់ទាន់ដឹងថា ជារថយន្ដរបស់ក្រុមហ៊ុនអីទេ គ្រាន់តែដឹងថា ជារថយន្ដរបស់ក្រុមហ៊ុនដឹកជញ្ជូន»។
ទាក់ទងនឹងបម្រាមហាមរថយន្ដធុនធំបើកចូលក្រុងនៅពេលថ្ងៃ លោក ស ថេត ឲ្យដឹង ថា៖ «កន្លែងខ្លះវាធ្វើបានល្អហើយកន្លែងខ្លះក៏វានៅ ប៉ុន្ដែអាកន្លែងនៅនោះវាយ៉ាងម៉េច ដូចនៅផ្លូវចម្ការដូង និងផ្លូវកប់ស្រូវអីនោះ វាសុទ្ធតែឃ្លាំងសុទ្ធតែអី បើយើងហាមមិនឲ្យគេចូលក៏វាមិនកើតដែរ»។
ទោះជាយ៉ាងណា លោក ស ថេត បានប្រាប់ទៅក្រុមហ៊ុន ក៏ដូចជាអ្នកបើកបររថយន្ដធុនធំទាំងអស់ពេលបើកបរចូលក្នុងរាជធានីភ្នំពេញ ត្រូវគោរពតាមសារាចរណែនាំ និងមើលពេលវេលា ដែលប្រជាពលរដ្ឋមមាញឹកច្រើន។
លោកបន្ដថា៖ «ប៉ុន្ដែអានេះចំពោះតែនៅជាយៗក្រុងទេ ចំពោះក្នុងរាជធានី ត្រូវគោរពតាមសារាចរណែនាំគោរពតាមម៉ោងពេលដដែល»។
លោកបញ្ជាក់ថា ៖«ខ្ញុំដាក់វិធានការតឹងរ៉ឹងណាស់ចំពោះរឿងនេះ ប៉ុន្ដែខ្លាចបងប្អូនយើងឬ មួយយ៉ាងម៉េច នៅខាងក្រោមៗ គាត់ចន្លោះប្រហោង ព្រោះកងកម្លាំង មិនមែនធ្វើតែការងារមួយមុខនេះទេ មានការងារច្រើនមុខណាស់។ ពេលរបូតមួយ ពីរ ចេះតែថា ចំណាត់ការ ទឹកមាត់សាបដូចទឹកទន្លេ ចេះតែប្រៀបធៀបបែបនេះ។ គេធ្វើបានច្រើនយើងអត់មើលឃើញ ចាំតែមើលបំណាំគ្នា ពេលគ្នាខុសតិចតួចនាំឲ្យមានបញ្ហា»។
លោក ស ថេត បញ្ជាក់ថា លោកនឹងបន្ដរឹតបន្តឹងថែមទៀតចំពោះករណីចរាចរណ៍ផ្លូវគោក ពិសេសករណីរថយន្ដធុនធំបើកបរខុសម៉ោងចូលក្នុងក្រុងនេះ។ «ដូចឡានដឹកដី ខ្ញុំប្រាប់ឲ្យគ្របឲ្យជិត ហើយពេលបើកកុំឲ្យបើកលឿន ត្រូវបើកបរប្រកាន់ស្ដាំដោយខ្ញុំជូនដំណឹងទៅទាំងមេក្រុមហ៊ុននិងអ្នកបើកបរមួយចំនួន»។
លោក ម៉េត មាសភក្តី អ្នកនាំពាក្យសាលារាជធានី បានថ្លែងថា ករណីឡានធុនធំនេះ សាលារាជធានីបានកំណត់ជាយន្ដការ «ម៉ោងប៉ុណ្ណេះយើងឲ្យចូល ម៉ោងប៉ុណ្ណោះ យើងមិនឲ្យចូល តាមផ្លូវនេះបើកបរបាន តាមផ្លូវនេះបើកបរមិនបាន គឺយើងមានសារាចរណែនាំអស់ហើយនិងជារឿយៗ យើងក៏មានការណែនាំ តម្រង់ទិសទៅដល់សមត្ថកិច្ចឈរជើងនៅតាមគោលដៅឲ្យយកចិត្ដទុកដាក់ហើយ»។
លោកថា ចំពោះរថយន្ដធុនធំអាចបើកបរនៅក្នុងក្រុងបានតែក្នុងអំឡុងពីម៉ោង ៩ យប់ដល់ម៉ោង ៦ ព្រឹកប៉ុណ្ណោះ ក្រៅពីម៉ោងនេះ មិនអនុញ្ញាតឲ្យបើកបរនៅក្នុងក្រុងទេ។
លោក គឹម បញ្ញា នាយកអង្គការមូលនិធិបង្ការរបួសអាស៊ីបានលើកឡើងថា អាជ្ញាធរគួរតែមានចំណាត់ការតឹងរ៉ឹង និងផាកពិន័យឲ្យបានធ្ងន់ធ្ងរ ចំពោះក្រុមហ៊ុនដែលមានរថយន្ដធុនធំ ដែលនៅតែបន្ដបើកបរចូលក្រុងខុសពេលវេលា និងមិនគោរពច្បាប់។ លោកមើលឃើញថា កន្លងមកនេះ សមត្ថកិច្ចបានមានចំណាត់ការចេញសារាចរណែនាំ និងបង្កើតក្រុមការងារជាបន្ដបន្ទាប់ក្នុងការសម្រួល ដោះស្រាយបញ្ហាកកស្ទះចរាចរណ៍នៅរាជធានីភ្នំពេញ។
កាលពីម្សិលមិញរថយន្តកែច្នៃធុនធំវែង ១ គ្រឿងដោយ មានដឹកទូកុងតឺន័រផងនោះ បានបើកបរពីលិចទៅកើតដល់ចំណុចស្ពានអាកាសស្ទឹងមានជ័យ ក៏បានកឿងជាប់មិនអាចទៅមុខរួចព្រោះទើសនឹងទូកុងតឺន័រ ក៏បើកត្រឡប់ថយក្រោយវិញបណ្ដាលឲ្យប៉ះបង្កាន់ដៃស្ពានមួយផ្នែក ហើយសមត្ថកិច្ចក៏បានឃាត់រថយន្តនេះបញ្ជូនទៅស្នងការដ្ឋាននគរបាលរាជធានីភ្នំពេញ៕