.jpg)
មន្ត្រីប៉ូលិសដែលត្រូវបានគេអះអាងថាបាញ់សម្លាប់ខ្លួនថ្ងៃទី ២៣ កញ្ញា នៅខណ្ឌច្បារអំពៅ។ រូបថត KMN
ភ្នំពេញៈ មន្ត្រីនគរបាលម្នាក់ដែលត្រូវបានគេអះអាងថា បាញ់សម្លាប់ខ្លួននៅបុរីប៉េងហួតក្នុងសង្កាត់និរោធ ខណ្ឌច្បារអំពៅកាលពីថ្ងៃទី ២៣ កញ្ញា ត្រូវបានសមត្ថកិច្ចបញ្ជាក់តាមក្រុមគ្រួសាររបស់ជនរងគ្រោះថា មានជំងឺក្រពះដែលវាស្របនឹងមន្ត្រីនគរបាលផ្នែកធ្វើកោសល្យវិច័យ ក៏អះអាងថាជាករណីធ្វើអត្តឃាតខ្លួនឯងដែរ។
លោក មួង សុធា ប្រធាននាយកដ្ឋានបច្ចេកទេសវិទ្យាសាស្ត្រនៃអគ្គស្នងការដ្ឋាននគរបាលជាតិប្រាប់ភ្នំពេញប៉ុស្តិ៍ពីម្សិលមិញថា ករណីមន្ត្រីនគរបាលឈ្មោះ សេង សុវណ្ណ ជានាយរងការិយាល័យនៃនាយកដ្ឋាននគរបាលព្រហ្មទណ្ឌដែលស្លាប់នោះគឺជាករណីអត្តឃាតខ្លួនឯង។
លោកប្រាប់យ៉ាងខ្លីថា៖ «គឺជាអំពើអត្តឃាតដោយអាវុធ ហើយជនរងគ្រោះ បាញ់ត្រូវចំសៀតផ្កាតែ ១ គ្រាប់ទេ»។
ដោយឡែកលោកវរសេនីយ៍ឯក មុំ ចេក នាយសេនាធិការនៃនាយកដ្ឋានព្រហ្មទណ្ឌក្រសួងមហាផ្ទៃឲ្យដឹងថា ពាក់ព័ន្ធការធ្វើអត្តឃាតរបស់មន្ត្រីនគរបាលបាញ់សម្លាប់ខ្លួនឯងនេះ លោកបានចុះទៅដល់ទីតាំងកើតហេតុ និងបានឃើញទិដ្ឋភាពជនរងគ្រោះមែន។ កន្លែងកើតហេតុមានទីតាំងស្ថិតនៅបុរីប៉េងហួតក្នុងសង្កាត់និរោធ ខណ្ឌច្បារអំពៅ។
ពាក់ព័ន្ធនឹងហេតុការណ៍នេះដែរលោកអធិការរងនគរបាលខណ្ឌច្បារអំពៅមួយរូបដែលសុំមិនឲ្យបញ្ចេញឈ្មោះប្រាប់ពីម្សិលមិញថា ជនរងគ្រោះមានឈ្មោះ សេង សុវណ្ណ អាយុ ៣៧ ឆ្នាំជាវរសេនីយ៍ទោមានតួនាទីជានាយរងការិយាល័យគ្រប់គ្រងមុខសញ្ញា និងតាមចាប់នៃនាយកដ្ឋាននគរបាលព្រហ្មទណ្ឌ។
ចំពោះហេតុការណ៍នេះបានកើតឡើងនៅវេលាម៉ោងប្រហែល ៧ យប់ថ្ងៃទី ២៣ ខែកញ្ញា ឆ្នាំ ២០១៩ នៅចំណុចមុខផ្ទះលេខ ១១A ផ្លូវ P០៣ ស្ថិតក្នុងបុរីប៉េងហួត ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។
ជនរងគ្រោះប្រើកាំភ្លើងខ្លី ១ ដើមបាញ់សម្លាប់ខ្លួនឯងនៅក្នុងរថយន្ដហើយមានកាំភ្លើងម៉ាក GLock19AUSTRIA លេខ LLT659 ផលិតនៅប្រទេស អូទ្រីស។ លោកប្រាប់តាមសម្តីសាច់ញាតិរបស់ជនរងគ្រោះថានៅវេលាម៉ោង ៧ យប់ថ្ងៃទី ២៣ កញ្ញា ២០១៩ មុនកើតហេតុ ជនរងគ្រោះ សេង សុវណ្ណ បានទូរស័ព្ទប្រាប់បងប្រុសរបស់ខ្លួនឈ្មោះ សេង សាវឿន ឲ្យទៅយកខ្លួន (ជនរងគ្រោះ) នៅផ្ទះបុរីប៉េងហួត ភូមិបឹងឈូក សង្កាត់និរោធ។
លុះពេលបងប្រុសរបស់ជនរងគ្រោះទៅដល់ផ្ទះរបស់ប្អូនប្រុសហើយក៏ចូលទៅក្នុងផ្ទះ ខណៈនោះគាត់ក៏បានឃើញរថយន្តពណ៌ស ១ គ្រឿង កំពុងចតនៅមុខផ្ទះ និងកំពុងបញ្ឆេះតែគាត់មិនចាប់អារម្មណ៍ព្រោះប្រញាប់ទៅជួបប្អូន។ ពេលចូលដល់ខាងក្នុងផ្ទះ គាត់បានដើររកជនរងគ្រោះតាំងពីជាន់ក្រោមដល់ជាន់ទី ២ តែរកមិនឃើញហើយក៏ចេញទៅមើលក្នុងរថយន្តដែលកំពុងបញ្ឆេះនោះស្រាប់តែឃើញជនរងគ្រោះមានប្រឡាក់ឈាមអង្គុយនៅក្នុងរថយន្តផ្នែកខាងក្រោយ។
លោកបន្តទៀតថាតាមសម្តីបងប្រុសរបស់ជនរងគ្រោះថា ជនរងគ្រោះមានជំងឺប្រចាំកាយជាង ១ ឆ្នាំកន្លងមកហើយគឺជំងឺចំហសន្ទះក្រពះ។ ក្រុមគ្រួសារក៏ធ្លាប់បានយកជនរងគ្រោះទៅព្យាបាលនៅក្នុងប្រទេស និងទៅព្យាបាលនៅប្រទេសវៀតណាម និងប្រទេសថៃទៀតផង តែមិនជា ហើយក្រោយពីដើរព្យាបាលអស់លទ្ធភាពនោះជនរងគ្រោះតែងតែនិយាយប្រាប់បងប្អូនថាគាត់មិនចង់រស់ទៀតទេ៕
