.jpg)
កណ្ដាលៈ ក្រុមគ្រួសារ និងសមត្ថកិច្ចឃុំរកាកោង ១ ស្រុកមុខកំពូល ខេត្តកណ្ដាល កំពុងបន្តស្វែងរកយុវតី ២ នាក់ដែលបានបាត់ខ្លួនដោយសារលិចកាណូតក្នុងទន្លេកាលពីថ្ងៃទី ២៦ ខែមករា។
លោក វង្ស សំអែល នាយនគរបាលប៉ុស្តិ៍ឃុំរកាកោង ១ បានប្រាប់ភ្នំពេញប៉ុស្តិ៍ថា យុវតីរងគ្រោះឈ្មោះ យឿន ស្រីពេជ្រ អាយុ ១៨ ឆ្នាំមានលំនៅក្នុងខណ្ឌឫស្សីកែវ រាជធានីភ្នំពេញ និងមិត្តភក្តិនាង ឈ្មោះ ស្រី ណា អាយុ ១៨ ឆ្នាំបានបាត់ខ្លួនភ្លាមៗក្រោយពីកាណូតដែលពួកនាងបានជិះជាមួយមិត្តភក្ដិសរុបគ្នា ១២ នាក់ឆ្ពោះទៅកោះស្នេហា។
លោកថា៖ «ក្រោយឧបទ្ទវហេតុនេះអ្នកភូមិបាននាំគ្នាចុះជួយសង្គ្រោះពួកនាងផងដែរ ប៉ុន្តែដោយសារអ្នករួមដំណើរច្រើនពេកពួកនាងដែលមិនចេះហែលទឹកក៏បានលិចបាត់ទៅក្នុងទន្លេ ហើយទំនងជាត្រូវទឹកហូរកួចទៅកន្លែងផ្សេង...»។
លោក យឿន សម្ភារៈ ជាឪពុកយុវតីរងគ្រោះ យឿន ស្រីពេជ្រ ថាមុនចេញពីផ្ទះនាងបានប្រាប់ថា ទៅលេងកោះស្នេហាដែលជាភូមិកំណើតគូដណ្ដឹងនាង។
លោកថា៖ «ខ្ញុំរន្ធត់ចិត្តណាស់ពេលដឹងថា កាណូតនាងជិះបានលិច ហើយនាង និងមិត្តភក្ដស្រីនាងម្នាក់ទៀតបានបាត់ខ្លួន»។
«ខ្ញុំគ្មានសង្ឃឹមថានាងអាចនៅមានជីវិតទេព្រោះនាងមិនចេះហែលទឹកឡើយ»។
លោកសម្ភារៈបានបន្តថា លោក និងអ្នកភូមិរួមទាំងអាជ្ញាធរមូលដ្ឋាន បាននាំគ្នាមុជទឹករាវរកសពពួកនាងតាំងពីល្ងាចថ្ងៃអាទិត្យរហូតមកទល់ល្ងាចថ្ងៃចន្ទ [ម្សិលមិញ] នេះដោយប្រើប្រាស់ខ្យល់អុកស៊ីហ្ស៊ែនជាជំនួយផង និង ប្រើអួនអូសរកផង រួមទាំងរៀបចំពិធីសែនព្រេនតាមប្រពៃណីផង ប៉ុន្តែនៅតែមិនឃើញទៀត។
ជុំវិញករណីនេះគេនៅមិនទាន់ដឹងថា ម្ចាស់កាណូតទទួលខុសត្រួវ ឬយ៉ាងណាទេ ប៉ុន្តែបើតាមលោក សយ សែ ដែលជាកូនម្ចាស់ទូកឈ្មោះ សន សយ អាយុ ៥១ ឆ្នាំរស់នៅភូមិពាម ឃុំរកាកោង ១ ថា ករណីនេះបង្កឡើងដោយក្រុមជនរងគ្រោះ។
លោកថា៖ «ក្រុមជនរងគ្រោះមានគ្នា ១២ នាក់ (ប្រុស ៨ ស្រី ៤) ពួកគេភាគច្រើនបានស្រវឹងស្រា ហើយឪពុកខ្ញុំគាត់បានបដិសេធដឹកពួកគេ ព្រោះខ្លាចគ្រោះថ្នាក់។ ពុកខ្ញុំ ថែមទាំងរើម៉ាស៊ីនពីទូកយកទៅទុក»។
បើតាមលោក សែ ក្រុមជនរងគ្រោះបានសែងម៉ាស៊ីនកាណូតនោះទៅដាក់លើទូក រួចនាំគ្នាជិះបានជាង ១០ ម៉ែត្រ ក៏ត្រូវលិចចូលទៅក្នុងទន្លេតែម្ដង។ លោកបានបន្តថា កាណូតនោះតាមធម្មតាអាចផ្ទុកមនុស្សបានពី ៦ នាក់ដល់ ១០ នាក់ ប្រសិនបើអ្នកជិះអង្គុយស្ងៀម ប៉ុន្តែក្រុមជនរងគ្រោះមានគ្នាច្រើន លើសពីការផ្ទុករបស់វា៕
