បាត់ដំបង/ពោធិ៍សាត់ៈ សមត្ថកិច្ច និងក្រុមគ្រួសារនៅតែបន្តស្វែងរកបុរស ២ នាក់ ដែលបានបាត់ខ្លួនក្នុងគ្រោះជំនន់ទឹកភ្លៀង និងការហូរច្រោះបាក់ដីពីលើភ្នំ ក្នុងស្រុកសំឡូតកាលពីព្រឹកម្សិលមិញ ហើយបានប្រទះឃើញពោះវៀនមនុស្សជាច្រើនកំណាត់ដាច់ជាប់មែកឫស្សីនៅតាមដងអូរ ដែលគេជឿថាជាបំណែកនៃសរីរាង្គរបស់ជនរងគ្រោះដែលបាត់ខ្លួននោះ ខណៈកម្ពស់ទឹកស្ទឹងពោធិ៍សាត់បានហក់ឡើងលើសពីកម្រិតប្រកាសអាសន្ន។
កាលពីព្រឹកថ្ងៃចន្ទជំនន់ទឹកភ្លៀង និង ការហូរច្រោះបាក់ដីពីលើភ្នំនៅស្រុកសំឡូត ខេត្តបាត់ដំបងបានបង្កឲ្យប្រជាពលរដ្ឋយ៉ាងហោចម្នាក់រងរបួសធ្ងន់ និង ២ នាក់ទៀត ដែលរស់នៅភូមិអូរត្រែង ឃុំតាតោក រួមមានឈ្មោះ ឆាង កុល អាយុ ២៥ ឆ្នាំ និងឈ្មោះ ថាន់ វី អាយុ ២០ ឆ្នាំបានបាត់ខ្លួន។
លោក ប៊ុន ហូយ មេភូមិអូរត្រែងបានប្រាប់ភ្នំពេញប៉ុស្តិ៍ថានៅព្រឹកថ្ងៃពុធម្សិលមិញក្រុមគ្រួសារសាច់ញាតិជនរងគ្រោះ និងក្រុមកម្លាំងសមត្ថកិច្ចចម្រុះមូលដ្ឋានស្រុកសំឡូតសរុបជាង ២០ នាក់បានរកឃើញមួក និងស្បែកជើងចំនួន ២ ចំហៀងដែលគេស្គាល់ថា ជារបស់ជនរងគ្រោះដែលបានបាត់ខ្លួននៅក្នុងហេតុការណ៍ដ៏អាក្រក់នោះ។ មិនតែប៉ុណ្ណោះ គេបានប្រទះឃើញពោះវៀនជាច្រើនកំណាត់ ដាច់ជាប់មែកឫស្សីដែលស្ថិតនៅតាមដងអូរនៅចំណុចអូរពាមតា ស្ថិតនៅជាប់ព្រំប្រទល់ដែនថៃ។
លោក ហូយ ថ្លែងថា៖ «យោងតាមលទ្ធផលដែលយើងបានរកឃើញនៅព្រឹក [ថ្ងៃពុធ] នេះ យើងជឿថាពួកគេទាំង ២ បានស្លាប់ដោយសារដីភ្នំរអិលបាក់សង្កត់លើក្នុងគ្រាដែលមានភ្លៀងធ្លាក់ខ្លាំងបង្កជាទឹកជំនន់កាលពីព្រឹកថ្ងៃចន្ទនោះម្ល៉េះ»។
ទោះជាបែបណាក្ដីក្រុមសមត្ថកិច្ច និងក្រុមគ្រួសារជនរងគ្រោះនៅតែបន្តការរុករកពួកគេនៅតាមដងអូរជាប់ព្រំដែនថៃ ខណៈអាកាសធាតុនៅតែបន្តមានភាពអាប់អួ និងមានភ្លៀងធ្លាក់ខ្លាំងនៅភាគខាងលើនៃភ្នំសំកុះ។
ទាក់ទិនបញ្ហាអាកាសធាតុនេះដែរក្រសួងធនធានទឹក និងឧតុនិយមនៅថ្ងៃម្សិលមិញបានប្រកាសជូនដំណឹងដល់ប្រជាពលរដ្ឋ និងអាជ្ញាធរពាក់ព័ន្ធក្នុងខេត្តជាប់មាត់សមុទ្រ និងខេត្តជាប់ព្រំដែនកម្ពុជាថៃ រួមទាំងខេត្តមួយចំនួនដែលស្ថិតក្នុងតំបន់វាលទំនាប បង្កើនការប្រុងប្រយ័ត្នចំពោះជំនន់ទឹកភ្លៀង និងទឹកដែលហូរធ្លាក់ពីលើភ្នំ។
សេចក្ដីជូនដំណឹងនោះគូសបញ្ជាក់ថា ភ្លៀងនឹងបន្តធ្លាក់រាយប៉ាយនៅទូទាំងប្រទេសរហូតដល់ថ្ងៃទី ២៣ ខែកញ្ញាក្នុងកម្រិតពីមធ្យមទៅច្រើន ពិសេសខេត្តដែលស្ថិតនៅក្នុងតំបន់ជួរភ្នំក្រវាញ និងជួរភ្នំដងរែក។ ករណីភ្លៀងធ្លាក់ខ្លាំងនៅផ្នែកខាងលើនៃជួរភ្នំទាំង ២ នេះអាចនឹងបង្កជាទឹកជំនន់នៅផ្នែកខាងក្រោមដែលចាំបាច់ត្រូវមានការត្រៀមបង្ការជាមុនដើម្បីចៀសវាងគ្រោះថ្នាក់ជាយថាហេតុ។
កាលពីម្សិលមិញកម្ពស់ទឹកស្ទឹងពោធិ៍សាត់បានហក់ឡើងផុតពីកម្រិតប្រកាសឲ្យប្រុងប្រយ័ត្ន ០,២៥ ម៉ត្រែ ខណៈកម្រិតប្រុងប្រយ័ត្ន ៥,០០ ម៉ែត្រ និងបានបង្កការជន់លិចផ្លូវមួយចំនួននៅក្នុងក្រុងពោធិ៍សាត់ ប៉ុន្តែនៅមិនទាន់បង្កផលប៉ះពាល់ធ្ងន់ធ្ងរដល់ការរស់នៅរបស់ប្រជាពលរដ្ឋនៅឡើយទេ។ នេះបើតាមលោក ចាប នាង អភិបាលក្រុងពោធិ៍សាត់។
លោកនាងថ្លែងថា៖ «គ្រាន់តែមួយយប់កម្ពស់ទឹកស្ទឹងពោធិ៍សាត់បានជន់ឡើងរហូតដល់ជិតមួយម៉ែត្រធ្វើឲ្យផ្លូវក្នុងក្រុងមួយចំនួនរងការជន់លិចជាបន្តបន្ទាប់។ ប៉ុន្តែក្រុមសមត្ថកិច្ចយើងបានចុះអន្តរាគមន៍ច្រកដីក្នុងបាវហើយទប់ជាទំនប់ដើម្បីជួយសម្រួលដល់ប្រជាពលដើរឆ្លងកាត់»។
ជាមួយគ្នានេះលោក កែវ វ័យ ប្រធានមន្ទីរធនធានទឹក និងឧតុនិយមខេត្តពោធិ៍សាត់បានពន្យល់ថាការហក់ឡើងនៃកម្ពស់ទឹកស្ទឹងពោធិ៍សាត់ដ៏ឆាប់រហ័សនេះគឺបណ្ដាលមកពីមានភ្លៀងធ្លាក់ខ្លាំងជាប់ៗគ្នានៅផ្នែកខាងលើនៃតំបន់ជួរភ្នំក្រវាញធ្វើឲ្យទឹកហូរធ្លាក់ពីលើភ្នំចាក់ចូលទៅក្នុងស្ទឹងពោធិ៍សាត់ តាមរយៈស្ទឹងចំនួន ៣ រួមមានស្ទឹងធំ ស្ទឹងអារ៉ែង និងស្ទឹងព្រៃខ្លុង។
ចំណែកនៅឯខេត្តកោះកុងជំនន់ទឹកភ្លៀងកាលពីថ្ងៃអង្គារបានបង្កឲ្យមានការហូរបាក់ស្រុតកំណាត់ផ្លូវជាតិលេខ ៤៨ ជាច្រើនកន្លែង។
ជាមួយគ្នានេះអាជ្ញាធរខេត្តបានសម្រេចផ្អាកការធ្វើចរាចរណ៍ជាបណ្ដោះអាសន្នឆ្លងកាត់លើកំណាត់ផ្លូវដែលរងការខូចខាតដើម្បីធ្វើការជួសជុលជាបន្ទាន់ឡើងវិញ។ នេះបើតាមលោក ឫទ្ធី កណ្ណារ៉ា អ្នកនាំពាក្យមន្ទីរសាធារណការ និងដឹកជញ្ជូនខេត្តកោះកុងកាលពីម្សិលមិញ៕