ព្រះសីហនុៈ អង្គការអង្គភាពការពារកុមារ (CPU) និងនគរបាលខេត្តព្រះសីហនុកំពុងស៊ើបករណីឃាតកម្មលើកុមារីអាយុ ១១ ឆ្នាំម្នាក់នៅស្រុកព្រៃនប់ ខេត្តព្រះសីហនុ បន្ទាប់ពីអ្នកភូមិប្រទះឃើញស្លាប់កាលពីថ្ងៃទី ២២ ខែសីហា ហើយត្រូវបានសមត្ថកិច្ចធ្វើកោសល្យវិច័យរកការពិត។
លោក កុល ផាលី ស្នងការរងនគរបាលខេត្តព្រះសីហនុបានប្រាប់ភ្នំពេញប៉ុស្តិ៍កាលពីម្សិលមិញថា សមត្ថកិច្ចខេត្តនៅពេលនេះកំពុងស៊ើបអង្កេតយ៉ាងយកចិត្តទុកដាក់នៅទីតាំងឃាតកម្មនោះ។ ប៉ុន្តែលោកមិនបានបញ្ជាក់ពីការសន្និដ្ឋានរបស់សមត្ថកិច្ចទេ ថ្វីបើមានការធ្វើកោសល្យវិច័យសាកសពរួចក្ដី។
លោក ផាលី បានបញ្ជាក់ថា៖ «នេះវាជាការងារជំនាញរបស់ប៉ូលិស បាទ។ មិនទាន់បានជូនលោកប្អូនបានទេ»។
តាមគណនីហ្វេសប៊ុករបស់ CPU កាលពីថ្ងៃសៅរ៍បានប្រកាសថា សមត្ថកិច្ចខេត្ត និង CPU បានបង្កើតក្រុមការងារមួយឈ្មោះ “LIMA19” ដើម្បីស៊ើបពីឃាតកម្មនេះ។
លោក James McCabe នាយកប្រតិបត្តិការ CPU បានប្រាប់កាលពីម្សិលមិញថា ក្រុមការងារកំពុងស៊ើបពីករណីនេះ។
លោកថា៖ «CPU និងកម្លាំងការងារនេះបានចុះទៅកន្លែងកើតហេតុម្តងទៀតកាលពីម្សិលមិញ (ថ្ងៃសៅរ៍)»។
បើតាមហ្វេសប៊ុក CPU ដែលសហការជាមួយអគ្គស្នងការដ្ឋាននគរបាលជាតិបានឱ្យដឹងថាកាលពីថ្ងៃទី ១៧ សីហា កុមារីឈ្មោះ អឿន ស្រីនុច ត្រូវបានប្រទះឃើញលើកចុងក្រោយនៅជិតផ្ទះនាងក្នុងភូមិព្រៃនប់ ១ ស្រុកព្រៃនប់នៅម៉ោង ៥.៣០ នាទីពេលនាងមកពីកន្លែងលេងទឹកជាមួយមិត្តភក្តិ។ ប៉ុន្តែមួយថ្ងៃបន្ទាប់ក៏បាត់ដំណឹង។
CPU បានបញ្ជាក់ថា៖ «ស្អែកឡើងម្តាយនាងបានរាយការណ៍ប្រាប់ថា ក្មេងស្រីនេះបានបាត់ខ្លួន»។
CPU បន្តថាបន្ទាប់មកនៅថ្ងៃទី ២២ ខែសីហាស្រាប់តែអ្នកភូមិបានប្រទះឃើញសពកុមារីរូបនេះដេកស្លាប់ផ្កាប់មុខក្នុងទឹក ហើយត្រូវបានស្រង់ឡើងលើគោក។
មន្ត្រីជំនាញបានទៅដល់កន្លែងកើតហេតុនៅថ្ងៃទី ២៣ សីហា ហើយបានវះកាត់សាកសព។
បើតាម CPU មន្ត្រីជំនាញបានសន្និដ្ឋានថា ជាអំពើឃាតកម្ម ហើយភិនភាគសាកសពគឺជាកុមារី អឿន ស្រីនុច មែន។
ហ្វេសប៊ុក CPU បញ្ជាក់ថា៖ «ក្នុងពេលបច្ចុប្បន្ន យើងនឹងធ្វើគ្រប់យ៉ាងដើម្បីស្វែងរកការពិតពាក់ព័ន្ធនឹងករណីនេះ»។
ជាមួយគ្នានេះ CPU បានអំពាវនាវដល់សាធារណជនឱ្យទាក់ទងនគរបាលខេត្តព្រះសីហនុ ឬអង្គការ CPU តាមទូរស័ព្ទ 077 247247 បើមានព័ត៌មានបន្ថែមពីកុមារី អឿន ស្រីនុច»៕