ភ្នំពេញៈ ក្រុមចោរឆក់ចំនួន ១១ នាក់ត្រូវបានគេហទំព័រអគ្គស្នងការដ្ឋាននគរបាលជាតិបង្ហាញមុខជាសាធារណៈកាលពីថ្ងៃ ១០ កុម្ភៈដើម្បីឲ្យសាធារណជនស្គាល់ បន្ទាប់ពីនគរបាលខណ្ឌដូនពេញឃាត់ខ្លួនបានជាបន្តបន្ទាប់នៅរាជធានី-ភ្នំពេញ និងនៅខេត្តកណ្តាល ថ្វីបើក្នុងនោះមានខ្លះជាអនីតិជនដែលច្បាប់តម្រូវឲ្យបិទមុខក្ដី។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យ និងជាអគ្គស្នងការរងនគរបាលជាតិបានប្រាប់ភ្នំពេញប៉ុស្តិ៍កាលពីថ្ងៃអង្គារថា ច្បាប់បានចែងឲ្យបិទបាំងមុខចំពោះក្មេងជាអនីតិជនពិតមែនពាក់ព័ន្ធនឹងការផ្សព្វផ្សាយព័ត៌មាន។ ក៏ប៉ុន្តែបើយកសិទ្ធិមកនិយាយច្រើនពេកក៏ពិបាកដែរ ព្រោះជននោះបានបង្កការខាតបង់ដល់ជនរងគ្រោះខ្ពស់។ ប្រសិនបើជនល្មើសជាអនីតិជនឆក់របស់របរនោះវាមិនសូវអីទេ តែជួនកាលធ្វើឲ្យម្ចាស់ទ្រព្យស្លាប់ ឬពិការដែលជាគ្រោះថ្នាក់ធ្ងន់ធ្ងរ។
លោកបន្តថា៖ «បំណងយើងមិនមែនចង់បំពានសិទ្ធិអនីតិជន ចង់បំពានច្បាប់ទេ តែសំខាន់ចង់ឲ្យជននោះរាងចាល ចង់ឲ្យប្រជាពលរដ្ឋចាប់អារម្មណ៍ថាមុខសញ្ញាហ្នឹងធ្លាប់បង្កបញ្ហាអ៊ីចឹងគាត់អាចមានការប្រុងប្រយ័ត្ន...ករណីបងប្អូនសមត្ថកិច្ចបង្ហោះគឺមានន័យអ៊ីចឹង។ នេះបើតាមខ្ញុំយល់ធ្វើបែបនេះកុំឲ្យថ្ងៃក្រោយដើរឆក់គេទៀត»។
លោកបន្តថា ប្រសិនបើសមត្ថកិច្ចមិនធ្វើបែបនេះប្រៀបដូចមិនបានចាប់ជនល្មើស ឬដូចតែចាប់ហើយលែងចោរវិញ ដែលមិនបានធ្វើឲ្យជននោះកែប្រែទេ។
គ្រាន់តែបង្ហោះរូបថតបង្ហាញមុខឲ្យសាធារណជនដឹង និងប្រយ័ត្នគឺមិនមែនធ្វើទារុណកម្មទេ។
លោកបានបញ្ជាក់ថា៖ «ការពិតត្រូវតែមានការបិទមុខពេលផ្សព្វផ្សាយតែបើបិទមុខទៅប្រជាពលរដ្ឋលោកមិនស្គាល់ហើយសមត្ថកិច្ចក៏ចង់ឲ្យប្រជាពលរដ្ឋស្គាល់ជនល្មើសផងដែរ បើយើងស្គាល់មុខ ហើយប្រុងប្រយ័ត្នទៅក៏អត់ផ្តល់ឱកាសឲ្យជនល្មើសឆក់យើងបានដែរ»។
ជុំវិញការឃាត់ខ្លួនក្រុមចោរឆក់កាបូប និងទូរស័ព្ទនេះ លោកវរសេនីយ៍ឯក ទៀង ច័ន្ទសារ អធិការនគរបាលដូនពេញបានប្រាប់កាលពីថ្ងៃអង្គារថា ការបង្ក្រាបនេះគឺបន្ទាប់ពីទទួលបានពាក្យបណ្តឹងពីពលរដ្ឋ។ បន្ទាប់មកសមត្ថកិច្ចជំនាញបានស្រាវជ្រាវឃាត់ខ្លួនជនសង្ស័យបាន ២ នាក់ នៅថ្ងៃទី ៦ ខែកុម្ភៈ ទី១- ឈ្មោះ គឹម ស្រេង ភេទប្រុស អាយុ ២១ ឆ្នាំ ស្នាក់នៅភូមិ ក្រោលគោ សង្កាត់គីឡូម៉ែតលេខ ៦។ ទី២- ឈ្មោះ ឈឹម ហេងឡុង ភេទប្រុស អាយុ ៣០ ឆ្នាំ ស្នាក់នៅសង្កាត់ផ្សារដើមថ្កូវដោយពួកគេធ្លាប់បានឆក់ ២៣ លើក ។
លោកបន្តថាឆ្លងតាមចម្លើយជនសង្ស័យ ២ នាក់នោះនៅយប់រំលងអធ្រាត្រឈានចូលថ្ងៃទី ៨ កុម្ភៈ សមត្ថកិច្ចបានបន្តឃាត់ខ្លួនបាន ៣ នាក់ទៀត និងម៉ូតូ ២ គ្រឿងដែល ទី១- ឈ្មោះ រឿន សុផានិត ភេទប្រុស អាយុ ១៨ ឆ្នាំ ទី២- ឈ្មោះ ស៊ន វាសនា ភេទប្រុស អាយុ ១៨ ឆ្នាំ ទាំង ២ នាក់នេះមានលំនៅមិនពិតប្រាកដ និងទី៣- ឈ្មោះ ថោង បញ្ចបាន ភេទប្រុសអាយុ ១៨ ឆ្នាំ មានលំនៅក្នុងសង្កាត់បឹងទំពុនខណ្ឌមានជ័យ។ ពួកគេទាំង ៣ នាក់បានឆក់ ៣៦ លើក ។
លោកបានបន្តថា លុះដល់ម៉ោង ២៣ និង ៥០ នាទីយប់ថ្ងៃដដែល សមត្ថកិច្ចរបស់លោកក៏បានឃាត់ខ្លួនជនសង្ស័យបាន ៣ នាក់បន្ថែមទៀតដែលទី១- ឈ្មោះ ជី ពេជ្រវាសនា ភេទប្រុស អាយុ ១៨ ឆ្នាំ មានលំនៅមិនពិតប្រាកដ ទី២- ឈ្មោះ គង់ ពុទ្ធា ភេទប្រុសអាយុ ១៨ ឆ្នាំ មានលំនៅមិនពិតប្រាកដ និងទី៣- ឈ្មោះ ផេង សុក្រវីរៈ ភេទប្រុស អាយុ ១៧ ឆ្នាំ ជាសិស្សស្នាក់នៅសង្កាត់បឹងទំពុន ខណ្ឌមានជ័យ ។ អ្នកទាំង ៣ នាក់ធ្លាប់បានឆក់ ៤៧ លើក។
លោក ច័ន្ទសារ ឲ្យដឹងទៀតថា បន្ទាប់ពីចាប់ក្រុមខាងលើ សមត្ថកិច្ចលោកបានសហការជាមួយកម្លាំងអធិការដ្ឋាននគរបាលស្រុកល្វាឯមខេត្តកណ្តាលឃាត់ខ្លួនបានម្នាក់ឈ្មោះ វុទ្ធី វណ្ណនុត ភេទប្រុស អាយុ ១៧ ឆ្នាំកាលថ្ងៃទី ៩ កុម្ភៈ ក្នុងស្រុកល្វាអែម។ រីឯ ២ នាក់ទៀតរួមមាន ឈ្មោះ ពិសិដ្ធ សំណាង ហៅអាពីន ភេទប្រុស អាយុ ១៤ ឆ្នាំ ជាសិស្សស្នាក់នៅផ្ទះលេខ ៤៩E៣Z ផ្លូវ ១៣៦ សង្កាត់ផ្សារកណ្តាល ១ ខណ្ឌដូនពេញឃាត់ខ្លួននៅមុខផ្ទះ និងឈ្មោះ សូត្រ រដ្ឋមុនិន្ទ ហៅ អាមុ ភេទប្រុស អាយុ ១៤ ឆ្នាំជាសិស្សស្នាក់នៅផ្លូវ ៩៣ ភូមិចុងខ្សាច់ សង្កាត់ទួលសង្កែ ១ ខណ្ឌឫស្សីកែវឃាត់ខ្លួនបាននៅខណ្ឌឫស្សីកែវ។ ពួកគេទាំង ៣ នាក់ធ្លាប់បានឆក់ ៦៤ លើក។
លោកបញ្ជាក់ថា ជនសង្ស័យទាំង ១១ នាក់នេះ ជាក្រុមឆក់យ៉ាងសកម្មនៅក្នុងរាជធានីភ្នំពេញ ហើយសមត្ថកិច្ចលោកនឹងបញ្ជូនពួកគេទៅសាលាដំបូងរាជធានីភ្នំពេញក្រោយពីបញ្ចប់នីតិវិធីរួចរាល់៕