The Phnom Penh Post Search

Search form




Logo of Phnom Penh Post newspaper Phnom Penh Post - សមយុទ្ធ​ហនុមាន​មាស​ទី៤ ត្រូវ​បាន​បិទ​បញ្ចប់

សមយុទ្ធ​ហនុមាន​មាស​ទី៤ ត្រូវ​បាន​បិទ​បញ្ចប់

Content image - Phnom Penh Post
ទិដ្ឋភាពនៃការចាប់ផ្ដើមរៀប​​ចំធ្វើសមយុទ្ធហនុមានមាសនៅខេត្តកំពតកាលពីថ្មីៗនេះ។ រូបថត យូសុះ អាប់ឌុលរ៉ាស់ហ៊ីម

សមយុទ្ធ​ហនុមាន​មាស​ទី៤ ត្រូវ​បាន​បិទ​បញ្ចប់

កំពតៈ សមយុទ្ធ​បាញ់​គ្រាប់ពិត​ឈ្មោះ​ហនុមាន​មាស ២០១៩ ដែល​មាន​ការ​ចូល​រួម​ពី​កង​ទ័ព​តាមអង្គ​ភាព​នា​នា​ចំនួន​ ២,៣៣២​ នាក់ និង​មាន​រយៈ​ពេល​ ៦ ថ្ងៃចាប់​ពី​ថ្ងៃ​ទី ៣ ដល់​ទី​ ៨ ឧសភា ​នៅ​ទីលាន​បាញ់​គ្រាប់​ពិត​តេជោ​សែន​ជុំ​គិ​រី​ដែល​ស្ថិត​នៅ​ក្នុង​ភូមិត្រ​ពាំងវែង​ ឃុំ​ត្រពាំង​វែង​ ស្រុក​ជុំ​គិរី​ ខេត្ត​កំពត​នោះ បាន​បិទ​បញ្ចប់​ជា​ផ្លូវ​ការ​ហើយ​កាល​ពី​ម្សិល​មិញ​ ជា​មួយ​នឹង​អ្វី​ដែល​មន្ត្រី​យោ​ធានិយាយ​ថា​ ទទួល​បាន​កម្រិត​ពិន្ទុ​ខ្ពស់។​

យោធា​ដែល​ចូល​រួម​បង្ហាញ​សមត្ថ​ភាព​ក្នុង​សម​យុទ្ធ​លើកនេះគឺ​មក​ពី​តាម​បណ្ដា​អង្គភា​ព​ជំនាញ​នា​នា ​ដូច​ជា​ វិទ្យា​ស្ថាន​កង​ទ័ព​ជើង​គោក បញ្ជា​ការ​ដ្ឋាន​អង្គ​រក្ស ទ័ព​ជើង​អា​កាស ​បញ្ជា​ការ​ដ្ឋាន​ការ​ពារ​អា​កាស ​វិទ្យាស្ថាន​កង​ទ័ព​ជើង​គោក ​បញ្ជា​ការ​ដ្ឋាន​បញ្ជូន​សារ​ កង​ពល​តូច​លេង​ ៧០ កង​ពល​តូច​ទ័ព​ពិសេស​ឆត្រ​យោង​លេខ ៩១១ ​បញ្ជា​ការ​ដ្ឋាន​វិស្វក​ម្មជា​ដើម ​និង​បាន​បាញ់​គ្រាប់​កាំ​ភ្លើង​ធំ​ពិត​ជា​ច្រើន​ប្រភេទ​រួមទាំង​ការ​ប្រើ​ប្រាស់​រថពាស​ដែក ​៩​ គ្រឿង ​រថ​ក្រោះ​ ៩​ គ្រឿង​ រថយន្ត​ពេទ្យ ​រថយន្ត​ពន្លត់​អគ្គិ​ភ័យ​ រ​ថយន្ត​ដឹក​ជញ្ជូន ​និង​ឧទ្ធម្ភាគ​ចក្រ​ជាដើម។

សម​យុទ្ធ​ហនុ​មាន​មាស​នេះ ត្រូវ​បាន​ប្រ​កាស​បើក​ដោយ​លោក​ឧ​ត្ត​ម​សេ​នីយ៍​ឯក ហ៊ុន ម៉ា​ណែត អគ្គមេ​​បញ្ជាការ​រង​នៃ​កង​យោធ​ពល​ខេមរ​ភូមិន្ទ​ និង​ជា​មេ​បញ្ជាកា​រ​នៃ​បញ្ជា​កា​រដ្ឋាន​កង​ទ័ព​ជើង​គោក ​និង​ត្រូវ​បានប្រកា​សបិទ​វិញ​ដោយ​នាយ​ឧ​ត្ត​ម​សេនី​យ៍ ​វង្ស​ ពិ​សេន អគ្គ​មេប​ញ្ជាការ​​នៃកង​យោធ​ពល​ខេមរ​ភូមិន្ទ​ ហើយ​នេះ​​គឺជា​លើក​ទី៤ នៃ​ការធ្វើ​សម​យុទ្ធ​ហនុ​មាន​មាស​ដែល​លើក​ទី១ ​ធ្វើឡើ​ង​ក្នុង​ឆ្នាំ​ ២០១០ លើក​ទី​២ ក្នុង​ឆ្នាំ​ ២០១៣​ និង​លើក​ទី៣ ក្នុង​ឆ្នាំ ២០១៨។

លោក ឈុំ សុជាតិ មន្ត្រី​នាំពាក្យ​ក្រសួង​ការពារ​ជាតិ​ធ្លាប់​បាន​បញ្ជាក់​មុនពេល​បើក​សមយុទ្ធ​ថា សម​យុទ្ធ​ទាំង ៤​ លើក​នេះគឺ​ដើម្បី​លើក​កម្ពស់​សមត្ថ​ភាព គុណ​ភាព និង​ផ្ដល់​ចំណេះ​ដឹង​ទៅ​ដល់​កង​ទ័ព ទាំង​ក្នុង​ពេល​ហ្វឹក​ហ្វឺ​ន និង​ទាំង​ក្នុង​ពេល​ប្រយុទ្ធ​ ប៉ុន្តែ​សម​យុទ្ធ​នេះ មិន​មែន​ដើម្បី​គំរាម​កំហែង​ដល់​នរ​ណា​ឡើយ ក្រៅ​តែ​ពី​ហ្វឹកហ្វឺន​ដើម្បី​ពង្រឹង​សមត្ថភាព​កងទ័ព។

លោក ឈុំ សុជាតិ បាន​ប្រាប់​ភ្នំពេញ​ប៉ុស្ដិ៍​កាលពីម្សិល​មិញ​ទៀត​ថា សម​យុទ្ធ​ហនុ​មាន​មាស​លើក​ទី៤ នេះ គឺមាន​ប្រ​តិបត្តិការ​វាយ​បក​ចូល​ដណ្ដើម​ទីតាំង​ដែល​បាត់​បង់​ទៅ​សត្រូវ​មក​គ្រប់គ្រ​ង​វិញ ហើយ​នេះ​គឺ​ជាការ ខុស​គ្នា​ពី​សម​យុទ្ធ​នាគ​មាស​លើក​ទី៣ ​រវាង​យោធា​កម្ពុជា-ចិន​ ធ្វើឡើង​កាលពី​ខែមីនា ដែលមាន​ប្រតិ​បត្តិការ​ជួយ​សង្គ្រោះ​ចំណាប់​ខ្មាំង​និង​វាយ​សម្រុក​ដណ្ដើម​ទីតាំង​របស់​សត្រូវ។

លោក​បន្ត​ថា សមយុទ្ធ​ដែលបានបញ្ចប់​កាលពីម្សិលមិ​ញ​នេះទទួល​បាន​ការ​ដាក់​ពិន្ទុ​ល្អ​ពី​ ៨០-៩០ ភាគរយ​ពី​ខាង​គណៈ​កម្មកា​រ ហើយ​កា​រដាក់​ពិន្ទុ​គឺ​អាស្រ័យ​ទៅលើ​លទ្ធ​ផល​ចំនួន​ ៣ ​យ៉ាង​ ទី​១ កងទ័ព​បាន​ចេញ​ធ្វើ​ប្រតិ​បត្តិ​ការ​ដោយ​គ្មាន​អ្នករងរបួស ទី២ កងទ័ព​បាន​អនុវត្ត តាម​បទ​បញ្ជា​បាន​ត្រឹម​ត្រូវ​នៅ​ពេល​ចេញ​ប្រតិ​បត្តិការ​ និង​ទី៣​ កង​ទ័ព​ជើង​អា​កាស ​និង​ជើង​គោក​បាន​សហការ​គ្នា​ល្អ​នៅ​ក្នុង​សមរភូមិ។​

លោក​បានបញ្ជាក់ថា៖ «លើក​នេះ​គឺមាន​កម្រិត​ល្អ​ជាង​មុនហ្វឹក​ហ្វឺន​ច្រើន​លើកយើងឃើញ​ថា ការ​សហ​ប្រតិ​បត្តិ​ការ​រវាង​កង​កម្លាំង​ចម្រុះ​ បាន​សហ​ការ​បាន​ល្អ បើ​ស្ទង់​សម​ត្ថភាព​កងទ័ព​យើងគឺ​ធ្វើបាន​រហ័ស ​និង​ធ្វើ​ត្រឹម​ត្រូវ​តាម​ពេលវេលា​ដែល​បាន​កំណត់​ នេះ​គឺ​កម្រិត​មួយ​ដែល​យើង​អាច​វាយ​តម្លៃ​ថា ជា​កម្រិត​រីក​ចម្រើន»។

ទោះ​ជា​យ៉ាង​ណា​ លោក ឈុំ សុជាតិ មិន​អាច​បង្ហាញ​អំពី​ចំនួន​ទឹកប្រាក់​ដែល​ត្រូវ​ចំណាយ​នៅក្នុង​ស​មយុទ្ធ​ទាំង ​៦ ថ្ងៃនេះ​ទេ ហើយ​លោក​ក៏​មិន​ទាន់​បានដឹង​ថា សមយុទ្ធ​ហនុមាន​មាស​លើក​ទី៥ នឹង​ត្រូវ​ធ្វើ​ឡើង​នៅ​ពេល​ណា​ដែរ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។