ព្រះសីហនុៈ សមយុទ្ធយោធាឈ្មោះថា ប្រតិបត្តិការត្រៀមជាស្រេចលើផ្ទៃទឹក (CARAT) រវាងកម្ពុជា និងសហរដ្ឋអាមេរិក ដែលបានចាប់ផ្តើមកាលពីថ្ងៃ ទី២៧ រហូតដល់ថ្ងៃ ទី៣០ ខែតុលា ឆ្នាំ២០១៤ ត្រូវបានភាគីមេបញ្ជាការកងនាវានៃប្រទេសទាំងពីរ អះអាងថា បញ្ចប់បានដោយភាពជោគជ័យ និងការយោគយល់ និងការសិក្សាស្វែងយល់ពីគ្នាទៅវិញទៅមក។
សមយុទ្ធដែលមានឈ្មោះថា ប្រតិបត្តិការត្រៀមជាស្រេចលើផ្ទៃទឹក (CARAT) លើក ទី៥ នេះ បានចាប់ផ្ដើមនៅមូលដ្ឋានជើងទឹករាមដោយមានការចូលរួមពីកងទ័ពជើងទឹករបស់សហរដ្ឋអាមេរិកជាង ៤០០ នាក់និងកងទ័ពកម្ពុជា ប្រមាណជាង ២០០ នាក់។ កងទ័ពជើងទឹក និងបុគ្គលិករបស់អាមេរិកត្រូវបានបញ្ជូនមកតាមរយៈនាវាពិឃាតម៉ាស្ទីន (USS MASTIN DDG89) របស់អាមេរិក ដែលចូលមកសំចតលើផ្ទៃសមុទ្រនៃ ខេត្តព្រះសីហនុ កាលពីថ្ងៃ ទី២៥ ខែតុលា ឆ្នាំ២០១៤។
នៅលើសមុទ្រនាវាឈ្មោះ USS Mustin (DDG 89) ដែលមានបុគ្គលិកជាង ៣៥០ នាក់ជាកងនាវាពិឃាតលេខ ៧ និងឧទ្ធម្ភាគចក្រមួយគ្រឿង បានធ្វើការហ្វឹកហ្វឺនជាមួយនាវាល្បាត ២ គ្រឿងរបស់កងទ័ពជើងទឹកកម្ពុជា ដែលមានជាង ៦០ នាក់។ ក្រៅពីការហាត់បើកបរនិងលំហាត់បាញ់កាំភ្លើងលើសមុទ្រចំណុចសំខាន់ៗ រួមមានការផ្លាស់ប្តូរផ្នែកឡើងនាវាឆាកនៃការឡើងកាន់កាប់នាវា លំហាត់ផ្នែករុករក និងការជួយសង្គ្រោះ។
ក្រោយបញ្ចប់កិច្ចសមយុទ្ធនេះ លោក ឯក អ៊ិន សុខេមរា មេបញ្ជាការកងនាវាល្បាតលេខ ៦ របស់កម្ពុជា មានប្រសាសន៍ថា ការហ្វឹកហ្វឺនសមយុទ្ធនេះ គឺជាការរំឭកឡើងវិញនូវមេរៀន និងជំនាញដែលកងទ័ពជើងទឹកកម្ពុជា ធ្លាប់បានរៀនសូត្រកន្លងមក ហើយក៏ជាឱកាសសម្រាប់ការរៀនសូត្រនូវមុខជំនាញប្លែកៗ និងការប្រើប្រាស់ឧបករណ៍ទំនើបៗពីសហរដ្ឋអាមេរិកជារបស់ប្រទេសលោកខាងលិច។
លោកថា៖ «ជុំវិញការទំនាក់ទំនង បើនិយាយពីភាសាយើងជួបការលំបាកខ្លះគ្នា យើងមួយចំនួនរៀនអង់គ្លេសបានច្រើន ប៉ុន្តែពាក់ព័ន្ធលើការងារជំនាញយើងរាងស្ទើរបន្តិច នាវាចរត្រូវការពាក្យពេចន៍នាវាចរច្រើន ដើម្បីស្វែងយល់ ហើយយើងត្រូវតែចេះអ៊ីចឹងបើសិនជាអ្នកធ្លាប់ជួបប្រទះហ្វឹកហ្វាត់ហើយមិនពិបាកទេ តែបើយើងហាត់បានស្ទើរ គឺជួបផលវិបាកហើយ»។
លោក អ៊ិន សុខេមរា បានវាយតម្លៃថា ការហ្វឹកហាត់នេះបានផ្តល់នូវផលប្រយោជន៍ច្រើនដល់កងទ័ពជើងទឹកជំនាញ ដើម្បីពង្រឹងសមត្ថភាព និងផ្លាស់ប្តូរបទពិសោធរវាងគ្នាទៅវិញទៅមក៖ «កងទ័ពជើងទឹកត្រូវតែមានការហ្វឹកហាត់ជានិច្ច...ប្រយោជន៍ដែលទទួលបាន គឺបានជោគជ័យ គ្រប់លំដាប់នៃកម្មវិធីលំហាត់»។
លោកវរនាវីឯក Fred Kacher មេបញ្ជាការនៃកងនាវាពិឃាតក្រុមលេខ ៧ បានឲ្យដឹងដែរថា ការហ្វឹកហ្វឺននេះបានបង្ហាញថា ទាហានជើងទឹកកម្ពុជា និងអាមេរិក សុទ្ធតែបានអនុវត្តកាតព្វកិច្ចប្រកបដោយវិជ្ជាជីវៈ និងមានសមត្ថភាពខ្ពស់។
លោកថា៖ «ទាំងអស់នេះ ធ្វើឲ្យខ្ញុំជឿជាក់ថា ពួកយើងបានឡើងទៅកាន់កម្រិតមួយទៀតនៃកិច្ចសហប្រតិបត្តិការនិងការពង្រឹងសមត្ថភាពទាហានជើងទឺកនៃប្រទេសទាំងពីរ ខ្ញុំសប្បាយចិត្តចំពោះរឿងនេះ ហើយមានជំនឿចិត្តថា ពួកយើងនឹងបន្តកិច្ចសហប្រតិបត្តិការនៅឆ្នាំខាងមុខនិងឆ្នាំបន្តបន្ទាប់ទៀត»។
លោក Fred Kacher បានឲ្យដឹងទៀតថា បញ្ហាប្រឈមនៃកិច្ចហ្វឹកហ្វឺននេះគឺមិនខុសពីកិច្ចសហការជាមួយប្រទេសដទៃនោះទេ ប៉ុន្តែ លោកបានសង្កេតឃើញថា ទាហានជើងទឹកកម្ពុជា គឺប្រឹងប្រែងខ្លាំងនិងមានភាពរួសរាយ «ជាក់ស្តែង ពួកយើងបានជម្នះនូវរបាំងនៃការប្រើប្រាស់ភាសា វប្បធម៌ ក្នុងការទំនាក់ទំនង...វាត្រូវតែមានអ្វីដែលជាឧបសគ្គ ដែលយើងត្រូវតែជម្នះ»។
ចំណុចខុសគ្នាតូចមួយដែលភាគីហ្វឹកហ្វឺនរបស់ប្រទេសទាំងពីររកឃើញនិងត្រូវបានចាត់ទុកថា មានប្រយោជន៍សម្រាប់សិក្សាពីគ្នាទៅវិញទៅមកនោះ គឺការប្រើប្រាស់ភាសាសម្រាប់ការឆ្លើយឆ្លងគ្នាពីនាវាមួយទៅនាវាមួយទៀត ដោយទាហានជើងទឹកកម្ពុជា ប្រើប្រាស់ទង់ដៃ ចំណែកឯទាហានអាមេរិកវិញ គឺប្រើប្រាស់នូវសំឡេង។
កាលពីថ្ងៃ ទី២៧ ខែតុលា ភារធារីស្ថានទូតសហរដ្ឋអាមេរិកប្រចាំកម្ពុជា លោកស្រី ជូលី ជុង មានប្រសាសន៍បើកកម្មវិធីថា សមយុទ្ធយោធា «ការ៉ាត់» នេះនឹងផ្តល់ឲ្យសិក្ខាកាមដែលបានចូលរួមទាំងអស់យល់អំពីការប្រឈមផ្សេងៗដែលកើតមាននៅក្នុងលម្ហសមុទ្រដោយមានការការពារដែនសមុទ្រការការពារតំបន់ធម្មជាតិការពារមិនឲ្យមានការធ្វើនេសាទខុសច្បាប់ ដែលនឹងបង្ហាញឲ្យឃើញពីទំនាក់ទំនងរវាងប្រទេសទាំងពីរ កម្ពុជា-អាមេរិក កាន់តែខ្លាំងក្លាឡើងថែមទៀត។
សមយុទ្ធយោធាសម្រាប់ ឆ្នាំ២០១៤ នេះបាននាំមកនូវកម្មវិធីលំហាត់ហ្វឹកហ្វឺនមានទិដ្ឋភាពចម្រុះរវាងកងទ័ពជើងទឹក កងទ័ពជើងអាកាស កងរាជអាវុធហត្ថ មន្ត្រីអនុវត្តច្បាប់សន្តិសុខសមុទ្រ កងមុជទឹក នាយនាវីផ្នែកពេទ្យ រួមជាមួយមធ្យោបាយគ្រឿងបំពាក់នាវា ឧទ្ធម្ភាគចក្រនិងដំណើរការបាញ់គ្រាប់ពិតផងដែរ។ ការហ្វឹកហ្វឺននេះ ក៏ត្រូវបានរាប់បញ្ចូលផងដែរនូវកិច្ចសហប្រតិបត្តិការឆែកឆេរនាវា ការមុជទឹកកិច្ចការរុករកដើម្បីសង្គ្រោះ និងការសិក្សាផ្នែកច្បាប់សមុទ្រដើម្បីពង្រឹងនូវសមត្ថភាពការពារដែនសមុទ្រ។
សមយុទ្ធយោធា CARAT បានបង្កើតឡើងរយៈពេល ២០ ឆ្នាំមកហើយ ក្នុងការធ្វើសមយុទ្ធរួមគ្នារវាងអាមេរិក ជាមួយបណ្តាប្រទេសក្នុងអាស៊ីប៉ាស៊ីហ្វិក និងអាស៊ីអាគ្នេយ៍ ដែលក្នុងនោះកម្ពុជា បានចូលរួមតាំងពី ឆ្នាំ២០១០ មកដោយអនុវត្តធ្វើជារៀងរាល់ឆ្នាំក្នុងគោលបំណងពង្រឹងកិច្ចសហប្រតិបត្តិការតំបន់កិច្ចសហប្រតិបត្តិការទ្វេភាគី កសាងមិត្តភាពសមត្ថភាពជំនាញអាជីព ពីកម្រិតទ្រង់ទ្រាយតូច និងឈានទៅរកទម្រង់ទ្រង់ទ្រាយកាន់តែទូលំទូលាយ៕
