ភ្នំពេញៈ សមាគមទីភ្នាក់ងារហត្ថពលកម្មនិងសមាគមទីភ្នាក់ងារជ្រើសរើសពលករកម្ពុជាបានចុះអនុស្សរណៈ ជាមួយសមាគមទំនាក់ទំនង កម្ពុជា-ថៃ ដោយមានកិច្ចសហការជាមួយក្រសួងការងារកម្ពុជាដើម្បីចូលរួមលើកកម្ពស់សិទ្ធិ សុខុមាលភាព និងពារពលករកម្ពុជានៅប្រទេស ថៃ។
ថ្លែងក្នុងពេលចូលរួមជាអធិបតីនៃពិធីនេះកាលពីថ្ងៃពុធលោក អ៊ិត សំហេង រដ្ឋមន្រ្តី ក្រសួងការងារ និងបណ្ដុះបណ្ដាលវិជ្ជាជីវៈថា ការចុះ (MoU) នេះ គឺជាការបង្កើតភាពជាដៃគូមួយទៀត រវាងស្ថាប័នរបស់រដ្ឋជាមួយសមាគម។
លោកបានបញ្ជាក់ថា៖ «យើងធ្វើយ៉ាងណាដើម្បីការពារសិទ្ធិនិងការងារដោយខិតខំស្វែងរកផលប្រយោជន៍លើកិច្ចគាំពារបន្ថែមទៀតស្របតាមច្បាប់ប្រទេស ថៃ»។
ទន្ទឹមនឹងនេះ លោក ក៏ចង់ឲ្យមានផ្ទះស្នាក់នៅបណ្តោះអាសន្ននៅថៃផងដែរសម្រាប់សម្រួលដល់ពលករដែលស្វែងរកការងារនិងអ្នកប្តូរកន្លែងធ្វើការដូចនៅប្រទេស កូរ៉េ។
លោកថា៖«ខ្ញុំសូមសំណូមពរចង់ឲ្យមានផ្ទះស្នាក់នៅបណ្តោះអាសន្នសម្រាប់បងប្អូនពលករយើងជាពិសេសពេលបងប្អូនប្តូរកន្លែងធ្វើការនិងស្នាក់នៅ ដើម្បីប្រឹក្សាយោបល់ ស្វែងរកកន្លែងការងារ ដែលយើងពេញចិត្ត.. »។
បើតាមលោក អ៊ិត សំហេង យុទ្ធនាការរយៈពេល ៤ ឆ្នាំគិតត្រឹម ៣០ មិថុនា ២០១៨ គឺមានកម្មករចំណាកស្រុកមិនស្របច្បាប់ ១ លាន ៨ សែននាក់ត្រូវបានជួយសម្រួលឲ្យភាពស្របច្បាប់ ខណៈមានសេសស់តិចតួច។
លោកស្រី អ៊ឺង ស៊ាងរិទ្ធី ប្រធានសមាគមទីភ្នាក់ងារជ្រើសរើសពលករកម្ពុជា (Assocation of Canmbodin RecuritmentAgencies(ACRA) បានថ្លែងថា ការចុះអនុស្សរណៈយោគយល់នេះដើម្បីបង្កើនសហប្រតិបត្តិការរវាង សមាគមទាំងបីដើម្បីចូលរួមចំណែកលើកកម្ពស់សិទ្ធិសុខុមាលភាព ការការពារកម្មករទេសន្តប្រេវេសន៍ ដែលធ្វើការនៅថៃខណៈដែលកន្លងមក មានពួកគេត្រូវបានគេធ្វើបោកប្រាស់ ពិសេសករណី មិនបើកប្រាក់បៀវត្សរ៍។
លោកស្រីថា៖ «…នាងខ្ញុំសង្ឃឹមយ៉ាងមុតមាំថា បន្ទាប់ពីចុះហេតុលេខាថ្ងៃនេះ…នឹងធ្វើឲ្យកិច្ចសហប្រតិបត្តិការកាន់តែប្រសើរឡើងក្នុងការលើកម្ពស់សិទ្ធិនិងការការពារអត្ថប្រយោជន៍ពលករកម្ពុជាដែលធ្វើការនៅថៃ...»។
លោក ពិន វិរៈ នាយកប្រតិបត្តិសមាគម (ACRA) បានថ្លែងថា កន្លងមក មានកម្មករដែលបម្រើការនៅប្រទេស ថៃ ត្រូវបានមេខ្យល់បោកប្រាស់ទៅធ្វើការនៅថៃ ហើយខ្លះគាត់ចង់ដឹងព័ត៌មាន តែគ្មានលទ្ធភាព ប៉ុន្តែពេលនេះតាម
រយៈសមាគម អាចជួយបាន។
លោក បញ្ជាក់ថា៖ «ឥឡូវយើងមានលទ្ធភាពអាចជួយគាត់បាន ដោយគាត់គ្រាន់តែទូរសព្ទ័មកប្រាប់យើ់ងដែលជាសមាគម។អ្នកណាក៏ដោយឲ្យតែជាកម្មករស្របច្បាប់អាចទាក់ទងមកយើងបានយើងមានក្រុមហ៊ុនផ្សេងទៀត ដែលជាដៃគូ។…ឥឡូវហ្នឹងយើងកំពុងរៀបចំការិយាល័យនៅថៃ»៕