.jpg)
លោក រ៉ុង ឈុន នៅក្នុងសន្និសីទកាលពីម្សិលមិញ។ សហការី
ភ្នំពេញៈ សមាគមគ្រូបង្រៀនកម្ពុជាឯករាជ្យ នៅតែរក្សាជំហរប្រមូលផ្តុំសម្តែងមតិ នៅមុខសាលារាជធានីដដែល ក្នុងការទាមទារឲ្យរដ្ឋាភិបាល ដោះលែងអតីតមេដឹកនាំបក្សប្រឆាំង លោក កឹម សុខា ដើម្បីរក្សា EBA បន្ទាប់ពីអាជ្ញាធររាជធានីភ្នំពេញ បានហាមឃាត់មិនឲ្យមានការប្រមូលផ្តុំតាមការគ្រោងទុកនៅពាក់កណ្តាលខែនេះ។
ថ្លែងក្នុងសន្និសីទកាសែតនៅការិយាល័យសមាគមគ្រូបង្រៀន កាលពីម្សិលមិញ លោក រ៉ុង ឈុន ទីប្រឹក្សាសមាគមគ្រូបង្រៀន និងជាប្រធានសហភាពសហជីពកម្ពុជា បានលើកឡើងថា ជំហរប្រមូលផ្តុំសម្តែងមតិនៅតែរក្សាដដែល ដោយគ្រាន់តែលើកពេលរហូតមានការជូនដំណឹងជាថ្មី ព្រោះតែថ្នាក់ដឹកនាំមានបេសកកម្ម។
ជាមួយនឹងការប្រកាសនេះលោកក៏បង្ហាញការសោកស្តាយចំពោះអាជ្ញាធរដែលបានបដិសេធសំណើរបស់សមាគមដែលសុំជួបជុំសម្តែងមតិរបស់កម្មករក្រុមគ្រូបង្រៀន ដោយចាត់ទុកថា ជាការបិទសិទ្ធិសេរីភាពជាមូលដ្ឋានរបស់ពលរដ្ឋ ដែលមានចែងក្នុងរដ្ឋធម្មនុញ្ញ ជាច្បាប់កំពូលរបស់កម្ពុជា និងប្រាសចាកពីកតិកាសញ្ញាស្តីពីសិទ្ធិមនុស្សសកល។
លោក រ៉ុង ឈុន បញ្ជាក់ថា៖ «យើងទាមទាររកដំណោះស្រាយមួយ រឿង EBA ព្រោះយើងដឹងហើយថា ឱសានវាទ នឹងមកដល់ក្នុងពេលអនាគតដ៏ខ្លីនេះ ដែលសហភាពអឺរ៉ុប គេបានកំណត់ ហើយនៅថ្ងៃទី ១៥ ខាងមុខហ្នឹង គឺជាថ្ងៃបញ្ចប់ ហើយគេនឹងវាយតម្លៃនៅក្នុងការស្រាវជ្រាវ គេនឹងបញ្ចប់របាយការណ៍របស់គេ ដោយគេនឹងចេញសេចក្តីសម្រេចដក មិនដកនៅខែ កុម្ភៈ ឆ្នាំ ២០២០។ ដូច្នេះពេលវេលាហ្នឹងកាន់តែកៀកទៅៗហើយបានជាយើងជូនដំណឺងទៅសាលារាជធានីភ្នំពេញ ថានឹងធ្វើការប្រមូលផ្តុំ ដើម្បីធ្វើការសម្តែងមតិ»។
ក្រៅពីបង្ហាញជំហរប្រមូលផ្ដុំគ្នានេះ កាលពីម្សិលមិញ សមាគមគ្រូបង្រៀនកម្ពុជាឯករាជ្យ ក៏បានចេញសេចក្តីថ្លែងការណ៍មួយដោយបារម្ភចំពោះរដ្ឋាភិបាលដែលនៅបន្តរឹតត្បិតសិទ្ធិសេរីភាពពលរដ្ឋ ការឃុំឃាំងមេដឹកនាំបក្សប្រឆាំង និងបញ្ហាគួបផ្សំជាច្រើនទៀត ដែលធ្វើឲ្យកម្ពុជាប្រឈមកាន់តែខ្លាំងនឹងការកាត់ផ្តាច់ EBA របស់អឺរ៉ុប និង GSP របស់អាមេរិក។
សេចក្តីថ្លែងការណ៍នោះ បានបញ្ជាក់ថា៖ «ធ្វើឲ្យកម្មកររាប់សែននាក់ ទទួលផលវិបាកសង្គម រងគ្រោះដោយផ្ទាល់បាត់បង់ការងារ និងបាត់អត្ថប្រយោជន៍នានា ។ ពលរដ្ឋរាប់លាននាក់ទៀត ក៏ក្លាយជាជនរងគ្រោះដោយប្រយោលពីផលវិបាកសង្គមមួយនេះ។ក្នុងនោះរួមមាន ក្រុមគ្រួសារមន្ត្រីរាជការ កងកម្លាំង និងអ្នកលក់ដូរផងដែរ។ ពេលនោះកម្ពុជា ប្រឈមការបាត់បង់ចំណូលជាតិមួយចំណែកធំ ហើយបញ្ហាសង្គមក៏កាន់តែមានវិបត្តិធ្ងន់ធ្ងរ»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ មិនអាចសុំអត្ថាធិប្បាយបានទេ កាលពីម្សិលមិញ។ ប៉ុន្តែលោក ផៃ ស៊ីផាន អ្នកនាំពាក្យរដ្ឋាភិបាល បានចាត់ទុកថា សកម្មភាពរបស់សមាគមគ្រូបង្រៀនពេលនេះគឺជាចេតនាអាក្រក់ និងមិនមែនជាសកម្ម-ភាពនៃការបញ្ចេញមតិនោះទេ។
លោកថា៖ «មេដឹកនាំរបស់សមាគមនេះ គឺបានធ្វើសកម្មភាពជាច្រើននៅក្រៅប្រទេស ដែលរួមជាមួយសកម្មភាពក្នុងការទាមទារឲ្យមានការផ្លាស់ប្តូរនាយករដ្ឋមន្ត្រី ឬរដ្ឋាភិបាល ដែលកើតចេញពីការបោះឆ្នោតក្នុងពេលថ្មីៗនេះ និងចូលរួមសកម្មភាពដែលធ្វើឲ្យកងកម្លាំងប្រដាប់អាវុធងើបឈរឡើងតតាំងជាមួយរាជរដ្ឋាភិបាលហើយធ្វើឲ្យពលរដ្ឋបះបោរ ដូច្នេះគឺជាសកម្មភាពមួយដែលមិនអាចទទួលយកបានទេ»។
លោកក៏បានព្រមានចាត់វិធានការផងដែរថា៖ «រដ្ឋាភិបាល មានសិទ្ធិគ្រប់គ្រាន់ក្នុងការការពារសណ្តាប់ធ្នាប់សាធារណៈ និងចាត់វិធានការគ្រប់បែបយ៉ាង ដើម្បីធានាសណ្តាប់ធ្នាប់សាធារណៈ សន្តិភាព ស្ថិរភាពរបស់សាធារណៈ។ អ៊ីចឹងជនណាប្រកាសបែបនេះ គឺនឹងចាត់វិធានការបញ្ចូនទៅកាន់តុលាការ» ៕
