.jpg)
ប្រធានសមាគមគ្រូបង្រៀនកម្ពុជាឯករាជ្យលោកស្រី អ៊ុក ឆាយាវី កាលពីកន្លងមក។ រូបថត ហ្វេសប៊ុក
ភ្នំពេញៈ សមាគមគ្រូបង្រៀនដ៏លេចធ្លោនៅកម្ពុជានៅថ្ងៃទី ១៤ ខែមីនានេះ បានអំពាវនាវដល់អង្គការអន្ដរជាតិនានា ឱ្យជួយធ្វើអន្តរាគមន៍ក្នុងរឿងអតីតសមាជិកគណបក្សប្រឆាំង ១៣ រូប ដែលត្រូវបានបាត់បង់ការងារដោយសារក្រសួងអប់រំលុបឈ្មោះពួកគេដោយគ្មានមូលហេតុត្រឹមត្រូវ។
លោកស្រី អ៊ុក ឆាយាវី ប្រធានសមាគមគ្រូបង្រៀនកម្ពុជាឯករាជ្យហៅកាត់ថា(CITA) បានហៅការបញ្ឈប់នេះថា ជា«រឿងនយោបាយ»។ នេះបើតាមលិខិតមួយដែលបានផ្ញើទៅសហភាពសហជីពអន្តរជាតិ (ITUC) អង្គការពលកម្មអន្តរជាតិនិងអង្គការអប់រំអន្តរជាតិ។
លោកស្រី ឆាយាវី បានបញ្ជាក់នៅក្នុងលិខិតនោះថា៖«ស្រដៀងគ្នានេះគ្រូបង្រៀន ក៏បានបញ្ជាក់ថា [ក្រសួងអប់រំ] មិនបានហៅពួកគេទៅសាកសួរនោះទេ ប៉ុន្តែគឺបានបញ្ឈប់ពួកគេដោយគ្មានហេតុផលច្បាស់លាស់តែម្តង»។លោកស្រីបានបន្ថែមថា ការបញ្ឈប់នេះគឺជា«ការសងសឹកនយោបាយ» ដោយសារតែអ្នកទាំងនោះជាអតីតមន្ត្រីរបស់គណបក្សប្រឆាំងនិងជាសមាជិកសហជីព។
អ្នកនាំពាក្យក្រសួងអប់រំលោក រស់ សាលីន មិនអាចទាក់ទងបានទេ កាលពីព្រឹកមិញ។
បើតាមលោកស្រី ឆាយាវី ទាំងក្រសួងអប់រំ និងខុទ្ទកាល័យនាយករដ្ឋមន្ត្រីមិនបានឆ្លើយតបទៅនឹងការអំពាវនាវរបស់សហគម CITA ឲ្យទទួលយកពួកគេធ្វើការវិញនោះទេ។ ប៉ុន្តែនៅថ្ងៃពុធនេះ លោកស្រី ឆាយាវី បានឲ្យដឹងថា សមាជិកនឹងព្យាយាមម្តងទៀតដើម្បីឲ្យទទួលបានការឆ្លើយតបពីក្រសួង។
លោកស្រីបានថ្លែងថា៖«ប្រសិនបើវានៅតែមិនអាចដោះស្រាយបានទេ នោះយើងនឹងប្រមូលផ្តុំគ្នានៅមុខផ្ទះរបស់លោកនាយករដ្ឋមន្ត្រី ហ៊ុន សែន ដើម្បីស្នើសុំឲ្យគាត់ជួយអន្តរាគមន៍»។
ជាញឹកញាប់សមាគម CITA តែងតែរិះគន់គោលនយោបាយរបស់រដ្ឋាភិបាលនៅក្នុងវិស័យអប់រំហើយសមាជិករបស់ខ្លួនក៏តែងតែត្រូវបានចោទប្រកាន់ពីគណបក្សកាន់អំណាចថាជាអ្នកគាំទ្រគណបក្សសង្គ្រោះជាតិ។
លោកស្រី Monina Wong មន្ត្រីរបស់អង្គការ ITUC ប្រចាំតំបន់អាស៊ី-ប៉ាស៊ីហ្វិក បានថ្លែងតាមរយៈសារមួយថា ទាំងសហភាពសហជីពអន្តរជាតិITUC និងដៃគូអប់រំអន្តរជាតិ«គាំទ្រ»ឲ្យមានការទទួលយក [គ្រូ] ទាំងនោះត្រឡប់ចូលធ្វើការវិញ»៕ NS
