.jpg)
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា ថ្លែងក្នុងសិក្ខាសាលានាពេលកន្លងមក។ រូបថត NBC
ភ្នំពេញៈ សមាគមធនាគារ និងសមាគមមីក្រូហិរញ្ញវត្ថុកម្ពុជានៅតែបន្តប្រកាន់ជំហរឲ្យអង្គការចំនួន ៤ កែតម្រូវរបាយការណ៍ដែលពួកគេផ្សាយថា «ការនាំឲ្យមានចំណាកស្រុក ការធ្វើឲ្យខូចខាតទ្រព្យសម្បតិ្តទ្រព្យដាក់បញ្ចាំ និងធ្វើការងាររហូតជំពាក់បំណុលវ័ណ្ឌក» ក្រោយពីអង្គការមិនបានកែតម្រូវ។ ស្ថាប័នហិរញ្ញវត្ថុទាំង ២ ដែលស្នើឲ្យកែតម្រូវនេះចាត់ទុករបាយការណ៍របស់ក្រុមអង្គការ មិនឆ្លុះបញ្ចាំងការពិត។
បន្ទាប់ពីអង្គការទាំង ៤ រួមមានសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) សម្ព័ន្ធសហជីពកម្ពុជា មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស និងសមាគមធាងត្នោតបានចេញផ្សាយរបាយការណ៍ជាបន្តបន្ទាប់ចាប់ពីខែឧសភាឆ្នាំមុន រហូតដល់ខែមិថុនាឆ្នាំនេះ ស្ដីពីបញ្ហាខាងលើមកសមាគមធនាគារ និងសមាគមមីក្រូហិរញ្ញវត្ថុកម្ពុជាបានចេញសេចក្ដីថ្លែងការណ៍រួម និងលិខិតចំហកាលពីថ្ងៃទី ១៣ និង ១៥ ខែកក្កដា ដោយស្នើឲ្យកែតម្រូវឡើងវិញ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជាប្រាប់ភ្នំពេញប៉ុស្ដិ៍ពីថ្ងៃទី ២១ កក្កដា ថា ក្នុងនាមសមាគមមីក្រូហិរញ្ញវត្ថុកម្ពុជាគឺមិនមានអ្វីត្រូវឆ្លើយតបចំពោះការមិនបានកែតម្រូវរបស់អង្គការសង្គមស៊ីវិលទាំង ៤ បែបនេះទេ ព្រោះបានប្រាប់ជំហរតាមរយៈសេចក្ដីថ្លែងការណ៍រួម និងលិខិតចំហរួចហើយ។
លោកថ្លែងថា៖ «យើងបានបង្ហាញប្រាប់ហើយថា ព័ត៌មានដែលយើងបានឃើញ និងសម្ភាសអតិថិជនដោយផ្ទាល់គឺខុសពីអ្វីដែលអង្គការសង្គមស៊ីវិលទាំង ៤ បានធ្វើទាំងស្រុង។ ដូច្នេះយើងអាចប្រាប់ទៅមនុស្សទូទៅថាយើងបានរកឃើញបែបនេះ ហើយវាជាការទទួលខុសត្រូវរបស់ខាងអង្គការសង្គមស៊ីវិលក្នុងការធ្វើរបាយការណ៍នេះ»។
ស្រដៀងគ្នានេះ លោក អ៊ិន ចាន់នី ប្រធានសមាគមធនាគារនៅកម្ពុជាប្រាប់ភ្នំពេញប៉ុស្ដិ៍ពីថ្ងៃទី ២១ កក្កដា ដែរថា លោកមិនមានអ្វីឆ្លើយតបចំពោះអង្គការសង្គមស៊ីវិលទាំង ៤ ដែលមិនបានកែតម្រូវនោះឡើយ។ លោកថា៖ «នៅក្នុងលិខិតរបស់យើងបានបញ្ជាក់សេចក្ដីគ្រប់គ្រាន់ហើយ។ ខ្ញុំមិនចង់អធិប្បាយអ្វីបន្ថែមលើពីខ្លឹមសារដែលចែងក្នុងលិខិតនោះទេ។ លិខិតរបស់យើងបានបញ្ជាក់ច្បាស់ហើយ ខ្ញុំប្រកាន់ជំហរទាំងស្រុងតាមលិខិត»។
តាមសេចក្ដីថ្លែងការណ៍រួមរបស់សមាគមធនាគារ និងសមាគមមីក្រូហិរញ្ញវត្ថុខាងលើលើកឡើងថា៖ «អត្ថបទ [របាយការណ៍របស់អង្គការសង្គមស៊ីវិល] ដែលគ្មានមូលដ្ឋានច្បាស់លាស់មិនគ្រប់ជ្រុងជ្រោយនេះបានផ្ដល់ឱកាសឱ្យជនខិលខូចមួយចំនួនយកទៅផ្សព្វផ្សាយបន្តក្នុងចេតនា ញុះញង់ បង្កចលាចលដល់សង្គមជាតិនាំឱ្យប៉ះពាល់កិត្ដិយស សេចក្ដីថ្លៃថ្នូរ របស់គ្រឹះស្ថានធនាគារ និងហិរញ្ញវត្ថុដែលជាឆ្អឹងខ្នងនៃសេដ្ឋកិច្ចជាតិ ព្រមទាំងសន្ដិសុខជាតិ»។
ប៉ុន្ដែជាការឆ្លើយតបនឹងការស្នើសុំកែតម្រូវរបស់សមាគមធនាគារ និងសមាគមហិរញ្ញវត្ថុកម្ពុជាកាលពីថ្ងៃទី ១៦ ខែកក្កដា អង្គការសង្គមស៊ីវិលទាំង ៤ បានចេញសេចក្តីប្រកាសបដិសេធសំណើនេះ ហើយបានអះអាងថា ព័ត៌មាន និងរឿងរ៉ាវក្នុងរបាយការណ៍ដែលបានចុះផ្សាយនោះគឺនៅតែមានភាពច្បាស់លាស់ ត្រឹមត្រូវដដែលដោយមិនអាចកែប្រែបានទេ។
អង្គការសង្គមស៊ីវិលទាំង ៤ បញ្ជាក់ថា៖ «ជាជំហររួមយើងខ្ញុំសូមបដិសេធសំណើរបស់សមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជាក្នុងការកែប្រែទៅលើរបាយការណ៍ទាំង ៣ ពាក់ព័ន្ធនឹងការរំលោភសិទ្ធិមនុស្ស ក្នុងវិស័យមីក្រូហិរញ្ញវត្ថុ និងកម្ចីឥណទានខ្នាតតូចនៅកម្ពុជា»។
អង្គការសង្គមស៊ីវិលទាំង ៤ អះអាងថា ព័ត៌មាន និងរឿងរ៉ាវរបស់បុគ្គលនៅក្នុងរបាយការណ៍ដែលបានចុះផ្សាយនេះគឺនៅតែមានភាពច្បាស់លាស់ត្រឹមត្រូវដដែលដោយមិនអាចកែប្រែបាន។
អង្គការទាំង ៤ បញ្ជាក់ថា៖ «យើងខ្ញុំនឹងបន្តការពារឯកជនភាពបុគ្គលដែលសម្រេចចិត្តចែករំលែករឿងរ៉ាវរបស់ពួកគាត់ជាមួយក្រុមអ្នកសិក្សាស្រាវជ្រាវយើងខ្ញុំក្នុងលក្ខខណ្ឌលាក់បាំងអត្តសញ្ញាណ។ យើងខ្ញុំសូមលើកទឹកចិត្តសមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជាក៏ដូចជាភាគីពាក់ព័ន្ធឱ្យអានរបាយការណ៍ទាំងនេះឱ្យបានលម្អិតដើម្បីឈ្វេងយល់កាន់តែច្បាស់អំពីគោលបំណង វិធីសាស្ត្រ និងការរកឃើញផ្សេងៗនៅក្នុងរបាយការណ៍»។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ ប្រាប់ពីថ្ងៃទី ២១ កក្កដាថា អង្គការសង្គមស៊ីវិលទាំង ៤ នៅតែរក្សាការស្រាវជ្រាវ និងរបាយការណ៍ដដែល។ ជាមួយនេះលោកលើកទឹកចិត្ដបន្ថែមដល់ស្ថាប័នសមាគមធនាគារ និងហិរញ្ញវត្ថុទាំង ២ និងស្ថាប័នពាក់ព័ន្ធមេត្ដាអាន និងមើលឡើងវិញលើរបាយការណ៍ដែលបានចេញផ្សាយនេះ។
លោកបញ្ជាក់ថា៖ «មើលឱ្យបានដិតដល់ឱ្យយល់បានដឹងអំពីគោលបំណងពិតប្រាកដនៅក្នុងរបាយការណ៍នេះ។ របាយការណ៍យើងមិនមានចរិតញុះញង់មិនបម្រើឱ្យផលប្រយោជន៍គណបក្សនយោបាយណាមួយទេ។ របាយការណ៍យើងចង់បង្ហាញអំពីភាពប៉ះពាល់ទៅលើវិស័យសិទ្ធិមនុស្សមួយចំនួនដែលកើតចេញពីផ្នែកខ្លះនៃកម្ចីមីក្រូហិរញ្ញវត្ថុ»៕
