.jpg)
សំរាមឡើងពេញខាប់នៅក្នុងប្រឡាយទឹកមួយក្នុងសង្កាត់ស្ទឹងមានជ័យកាលពីឆ្នាំ ២០១៨។ ហេង ជីវ័ន
ភ្នំពេញ: សមាគមធាងត្នោត បានចេញរបាយការណ៍មួយ អំពីការគ្រប់គ្រងកាកសំណល់ ក្នុងសហគមន៍ក្រីក្រក្នុងរាជធានីភ្នំពេញ ដោយផ្តល់អនុសាសន៍ ឲ្យមានការកែលម្អអភិបាលកិច្ច ដើម្បីបម្រើសហគមន៍ក្រីក្របានប្រសើរជាងមុនក្នុងការប្រមូលសំរាមនិងក៏បានលើកឡើងពីការស្លាប់របស់កម្មករក្រុមហ៊ុនស៊ីនទ្រី ១៤ នាក់ក្នុងពេលដែលពួកគេកំពុងបំពេញការងារ។
របាយការណ៍ដែលមាន ៤០ ទំព័រ ជាភាសាអង់គ្លេសនេះ គឺជាលទ្ធផលនៃការចុះសិក្សាស្រាវជ្រាវ ដែលធ្វើឡើង នៅក្នុងខណ្ឌចំនួន ១២ ក្នុងរាជធានីភ្នំពេញ តាមរយៈកម្រងសំណួរ ការសម្ភាស ការពិភាក្សាទៅលើក្រុមគោលដៅ និងការសម្ភាសមនុស្សសំខាន់ៗ មន្រ្តីសង្កាត់និងការពិនិត្យឯកសារ។
របាយការណ៍ដែលមានចំណងជើងថា «អភិបាលកិច្ចទីក្រុង: ការគ្រប់គ្រងកាកសំណល់នៅក្នុងរាជធានីភ្នំពេញ» បានផ្តោតពិសេសទៅលើសហគមន៍ក្រីក្រ ក្នុងរាជធានីភ្នំពេញ។ របាយការណ៍នេះ បានរកឃើញថា ៩៩ នៃសហគមន៍ក្រីក្រចំនួន ២៧៧ ក្នុងទីក្រុង ឬស្មើនឹង ៣៥,៧% ក្នុងរាជធានីភ្នំពេញ នៅមិនទាន់ទទួលបានការគ្រប់គ្រងកាកសំណល់។
របាយការណ៍នេះ បានរកឃើញថា បុព្វហេតុសំខាន់ នៃការគ្រប់គ្រងកាកសំណល់នៅមានកម្រិតខ្សោយសម្រាប់សហគមន៍ក្រីក្រ គឺដោយសារការខ្វះតម្លាភាព សមធម៌ គណនេយ្យភាពភាពអាចឆ្លើយតប។ របាយការណ៍នេះ ក៏បានរកឃើញការខ្វះការគោរពជីវិតរបស់កម្មករ កិច្ចសន្យារបស់ក្រុមហ៊ុនស៊ីនទ្រី ដែលបាននាំឲ្យមានការស្លាប់ ១៤ នាក់ក្នុងរយៈកាល ៤ ឆ្នាំចុងក្រោយនេះ។
របាយការណ៍ បានបន្តថា៖ «ប្រសិនបើមិនមានអភិបាលកិច្ចឆ្ពោះទៅមុខប្រសើរជាងមុន អាជ្ញាធរមូលដ្ឋាន រាជរដ្ឋាភិបាលកម្ពុជា និងក្រុមហ៊ុនស៊ីនទ្រី នឹងបន្តធ្វើឲ្យប្រជាពលរដ្ឋនិងកម្មករមានគ្រោះថ្នាក់ ហើយបន្ទាបលទ្ធភាពរបស់ពួកគេក្នុងការផ្តល់សេវាប្រមូលសំរាម»។
លោក Isaac Daniels ទីប្រឹក្សាកម្មវិធីរបស់សមាគមធាងត្នោត បានថ្លែងថា ការសិក្សាស្រាវជ្រាវនេះត្រូវបានធ្វើឡើងដើម្បីរកឲ្យឃើញអំពីមូលហេតុអ្វី ដែលការគ្រប់គ្រងកាកសំណល់ មិនមានប្រសិទ្ធភាពនៅក្នុងសហគមន៍ក្រីក្រជិត ១០០ សហគមន៍ក្នុងរាជធានីភ្នំពេញ។
លោកបញ្ជាក់ថា៖ «យើងចង់ដឹងថា តើវាជាបញ្ហាបច្ចេកទេស ឬបញ្ហាអភិបាលកិច្ច។ ការសិក្សាស្រាវជ្រាវរបស់យើងបង្ហាញថា បញ្ហាជាច្រើនជាមួយការគ្រប់គ្រងកាកសំណល់ គឺពាក់ព័ន្ធនឹងអភិបាលកិច្ច»។
របាយការណ៍នេះលើកឡើងថា ផ្ទះមួយបង់ប្រាក់ចំនួន ១ដុល្លារ ក្នុង ១ ខែ ដែលភ្ជាប់ទៅនឹងវិក្កយបត្រអគ្គិសនី ប៉ុន្តែ អ្នកប្រើប្រាស់ជាច្រើនបានបដិសេធមិនព្រមបង់ថ្លៃសេវារបស់ក្រុមហ៊ុនស៊ីនទ្រី។ ក្រុមហ៊ុនស៊ីនទ្រីមានបុគ្គលិកចំនួន ២៣៥៩ នាក់ ក្នុងនោះកម្មករចំនួន ១៦៧៨ នាក់ជាអ្នកប្រមូលសំរាមតាមមូលដ្ឋាន។
ក្រុមហ៊ុនមានរថយន្តចំនួន ៤២៦ គ្រឿង និងរទេះចំនួន ២៧៣។ ជាងនេះទៀត កម្មករក្រុមហ៊ុនស៊ីនទ្រីចំនួន ១៤ នាក់ បានស្លាប់នៅកន្លែងការងារក្នុងរយៈកាល ៤ ឆ្នាំចុងក្រោយនេះ ហើយរបាយការណ៍នេះបន្តថា ក្នុងរយៈកាល ៣ ឆ្នាំចុងក្រោយនេះ មានឧប្បត្តិហេតុរបួសចំនួន ៣៨០ ករណី ក្នុងនោះគ្រោះថ្នាក់ពីរថយន្តដល់កម្មករចំនួន ២៨៥ ករណី ហើយរបួសជិត ៩០ ករណីបណ្តាលមកពីការរលាត់ស្បែក ការរលាក និងការដួល។
របាយការណ៍នេះ បានលើកឡើងនូវអនុសាសន៍មួយចំនួន សម្រាប់សាលាក្រុងដូចជា ការចេញរបាយការណ៍វឌ្ឍនភាព ការវាយតម្លៃ ព័ត៌មានថវិកា និងកិច្ចសន្យាជាមួយក្រុមហ៊ុនស៊ីនទ្រី ការអប់រំសាធារណជនអំពីរបៀបរៀបចំកាកសំណល់ សម្រាប់ការប្រមូល ក្នុងចំណោមចំណុចដទៃៗទៀត។ របាយការណ៍នេះបានផ្តល់អនុសាសន៍ឲ្យក្រុមហ៊ុនស៊ីនទ្រី មានលក្ខណៈឆ្លើយតបជាងមុន នៅក្នុងសហគមន៍ក្រីក្រក្នុងទីក្រុង ប្រើប្រាស់រទេះសំរាម នៅក្នុងសហគមន៍ណា ដែលរថយន្តមិនអាចចូលបាន ធានាឲ្យមានការប្រើប្រាស់សម្លៀកបំពាក់ការពារសម្រាប់កម្មករ។
លោក Daniels បានថ្លែងថា៖ «អ្វីដែលយើងបានរកឃើញគឺថា វិធីមួយដើម្បីកែលម្អអភិបាលនៃការគ្រប់គ្រងសំរាម គឺឲ្យរដ្ឋាភិបាលកែលម្អការប្រាស្រ័យទាក់ទងរបស់ខ្លួននិងការផ្តល់លទ្ធភាពទៅដល់សហគមន៍ក្រីក្រក្នុងទីក្រុង ដើម្បីស្វែងរកដំណោះស្រាយជាមួយគ្នា។ អភិបាលកិច្ចត្រូវកែលម្អនៅក្នុងវិស័យមួយចំនួន ជាពិសេសតម្លាភាព ដោយសារមិនមានលទ្ធភាពទទួលបានព័ត៌មាន អំពីកិច្ចសន្យា និងរបាយការណ៍ វានៅតែពិបាកខ្លាំងណាស់ក្នុងការវាយតម្លៃការគ្រប់គ្រងកាកសំណល់ឲ្យបានគ្រប់ជ្រុងជ្រោយ»។
លោក ខៀវ វុទ្ធី តំណាងក្រុមហ៊ុនស៊ីនទ្រី ដែលទទួលបន្ទុកនៅក្នុងប្រតិបត្តិការប្រមូលសំរាមនៅក្នុងខណ្ឌទាំង ១២ បានឲ្យដឹងថា ក្រុមហ៊ុនរបស់លោកធ្លាប់ចែកអាវចំណាំងប្លាតពេលយប់ដល់កម្មករ ប៉ុន្តែពួកគេមិនពាក់។ ប៉ុន្តែនៅដើមឆ្នាំនេះ ក្រុមហ៊ុនផ្តល់សម្លៀកបំពាក់ដល់ពួកគេម្តងទៀត បន្ទាប់ពីការលើកកម្ពស់ការយល់ដឹង។
លោកបានថ្លែងថា ក្រុមហ៊ុន ក៏បានផ្តល់ម៉ាស់និងស្បែកជើងដល់ពួកគេ ប៉ុន្តែកម្មករចូលចិត្តធ្វើតាមវិធីផ្ទាល់ខ្លួនរបស់ពួកគេ។ សម្រាប់សហគមន៍ក្រីក្រ លោកបានថ្លែងថា ក្រុមហ៊ុនមានរថយន្តប្រចាំការ ២ លើកក្នុងមួយសប្តាហ៍ ដោយចុចស៊ីផ្លេឲ្យប្រជាពលរដ្ឋក្នុងសហគមន៍នោះយកសំរាមមកដាក់ចូលរថយន្តនៅពេលរថយន្តទៅដល់។
លោកបានថ្លែងថា៖ «ឥឡូវនេះ សហគមន៍ដែលយើងមិនអាចមានលទ្ធភាពទៅដល់ គឺសហគមន៍អណ្តូង។ ឥឡូវនេះ យើងមានកន្លែងមួយសម្រាប់ពួកគេ ប៉ុន្តែពួកគេមិនដាក់សំរាមនៅទីនោះ។ ដូច្នេះ យើងមានរថយន្តប្រចាំការ។ ក្នុង ១ សប្តាហ៍ យើងប្រចាំការ ២ ដង។ នៅពេលយើងទៅ ដល់ យើងចុចស៊ីផ្លេ ហើយពួកគេបានយកសំរាមមក។ នេះអាចកាត់បន្ថយការបោះសំរាមចោលអនាធិបតេយ្យ។ យើងរង់ចាំរហូតដល់ប្រជាពលរដ្ឋគ្រប់គ្នាយកសំរាមមកដាក់នៅក្នុងរថយន្ត»។
លោក វុទ្ធី ថ្លែងថា ក្រុមហ៊ុនស៊ីនទ្រី ធ្វើការជិតស្និទ្ធជាមួយសាលារាជធានី និងមន្រ្តីរបស់សាលារាជធានីដើម្បីតាមដានសេវារបស់ក្រុមហ៊ុន និងពន្យល់ប្រជាពលរដ្ឋ ឲ្យយល់បន្ថែមទៀតអំពីកាកសំណល់ និងពិន័យអ្នកដែលបំពានច្បាប់ស្តីពីកាកសំណល់។
ពាក់ព័ន្ធនឹងការស្លាប់កម្មករនៅកន្លែងការងារ លោក វុទ្ធី មិនបានបដិសេធ ហើយបានបន្ទោសទៅលើបញ្ហាចរាចរណ៍។ «ទី១ ខណៈពួកគេកំពុងធ្វើការ នៅលើដងផ្លូវ ម៉ូតូ ឡានបុកពួកគេ បើទោះបីជាមានការដាក់រនាំងសម្រាប់ពួកគេក៏ដោយ»។
លោកបញ្ជាក់ថា គ្រោះថ្នាក់ភាគច្រើនបំផុត គឺនៅចន្លោះពីពាក់កណ្តាលយប់ ដល់ម៉ោង ៥ ព្រឹក។ លោកថ្លែងថា៖ «ចាប់តាំងពីខ្ញុំធ្វើការនៅ ទីនេះ មិនតិចជាង ៣០ ឬ ៤០ នាក់ទេ ដែលបានស្លាប់។ ទី ១ អ្នកបើកបរចេញពីបារ៍ស្រវឹង។ ទី ២ អ្នកបើកបរបើកក្នុងល្បឿនលឿនពេក ឬប្រហែស»។
លោក មេត មាសភក្តី អ្នកនាំពាក្យសាលារាជធានី បានថ្លែងថា លោកមិនអាចធ្វើអត្ថាធិប្បាយពីមុនពេលអានរបាយការណ៍នោះបានទេ៕
