ភ្នំពេញៈ ទោះបីជាមានបញ្ហាជាច្រើនកើតឡើង បន្ទាប់ពីការរំលាយគណបក្សសង្គ្រោះជាតិក្តី ប៉ុន្តែចំនួនអ្នកនយោបាយជាស្ត្រីនៅក្នុងគណបក្សកាន់អំណាចបានកើនអាសនៈនៅក្រុមប្រឹក្សាឃុំ សង្កាត់ ទោះបីជាវានៅតែមានកម្រិតទាបក្តី ហើយអង្គការការពារសិទិ្ធស្ត្រីទាមទារឱ្យមានការកែលម្អឲ្យមាននិរន្តរភាពលើបញ្ហានេះ។
យោងតាមលទ្ធផលដែលបានចេញផ្សាយកាលពីចុងសប្តាហ៍មុនបានឲ្យដឹងថា មានសមាជិកព្រឹទ្ធសភាជាស្ត្រីតែ ៨ រូបប៉ុណ្ណោះក្នុងចំណោមសមាជិកព្រឹទ្ធសភា ៥៨ រូបដែលទើបជាប់ឆ្នោតថ្មី។
បន្ទាប់ពីគណបក្សសង្គ្រោះជាតិត្រូវបានរំលាយកាលពីខែវិច្ឆិកាឆ្នាំមុនអាសនៈក្រុមប្រឹក្សាឃុំ សង្កាត់ ស្ទើរតែទាំងអស់ចំនួន ៥០០៧ របស់អតីតគណបក្សប្រឆាំងបានទៅលើគណបក្សប្រជាជនកម្ពុជា។
យោងតាមតួនាទី និងចំនួនភាគរយនៃក្រុមប្រឹក្សាឃុំ សង្កាត់ជាស្ត្រីគឺបានកើនឡើងពីចំនួន ១៩៤០ នាក់បន្ទាប់ពីការបោះឆ្នោតឃុំ សង្កាត់កាលពីឆ្នាំមុនដល់ ២៣២៣ នាក់ បន្ទាប់ពីការរំលាយគណបក្សសង្គ្រោះជាតិ។ នេះបើយោងតាមចំនួនមិនទាន់ចេញផ្សាយរបស់ គ.ជ.ប ដែលភ្នំពេញប៉ុស្តិ៍ទទួលបានកាលពីថ្ងៃអាទិត្យ។
ប៉ុន្តែតួលេខនេះនៅតែមានកម្រិតទាបនៅឡើយគឺមានត្រឹមតែ ២០,០៧ ភាគរយប៉ុណ្ណោះ។ នៅក្នុងឆ្នាំ ២០១២ មានសមាជិកក្រុមប្រឹក្សាឃុំ សង្កាត់ជាស្ត្រីចំនួន ២០៣៨ នាក់។ លើសពីនេះទៀតចំនួននេះគួរតែខ្ពស់ជាងនេះនៅក្នុងលេខរៀងទី ១ ។
ស្ត្រីមួយចំនួនបានប្រាប់ភ្នំពេញប៉ុស្តិ៍នៅមុនពេលបោះឆ្នោតឃុំ សង្កាត់ថា ពួកគាត់ត្រូវបានគេរុញឲ្យចុះឈ្មោះនៅលេខរៀងក្រោមគេនៅលើបញ្ជីឈ្មោះបេក្ខជនឈរឈ្មោះបោះឆ្នោតពីសមភាគីបុរសដែលជាបេក្ខជនដូចពួកគេដែរ ធ្វើឲ្យចំនួនស្ត្រីមានការប្រែប្រួលនៅក្នុងការបោះឆ្នោតនោះ។
ម្នាក់ក្នុងចំណោមនោះគឺលោកស្រី ថុង សំអឿន ដែលជាបេក្ខជនមកពីគណបក្សប្រជាជនកម្ពុជានៅឃុំគគីរ ស្រុកកៀនស្វាយ ខេត្តកណ្តាល។ បន្ទាប់ពីឈ្មោះលោកស្រីត្រូវបានគេទម្លាក់ពីលេខរៀងទីមួយនៅលើបញ្ជីបោះឆ្នោតនោះ នៅទីបំផុតលោកស្រីបានត្រឹមក្លាយជាសមាជិកក្រុមប្រឹក្សាឃុំ សង្កាត់ធម្មតាប៉ុណ្ណោះ បន្ទាប់ពីការបោះឆ្នោតឃុំ សង្កាត់ កាលពីខែមិថុនា ឆ្នាំ ២០១៧។
លោកស្រី សំអឿន រៀបរាប់ថាប៉ុន្តែទោះយ៉ាងណាក៏ដោយនៅពេលដែលគណបក្សសង្គ្រោះជាតិត្រូវបានរំលាយ លោកស្រីបានឡើងឋានៈទៅជាជំទប់ឃុំ ទទួលបន្ទុកផ្នែកសន្តិសុខ និងសណ្តាប់ធ្នាប់នៅក្នុងឃុំរបស់លោកស្រី។
លោកស្រីលើកឡើងថា៖ «ដោយសារតែមន្ត្រីគណបក្សសង្គ្រោះជាតិ ២ រូបមកពីឃុំនោះបានលាលែងពីតំណែងឥឡូវនេះខ្ញុំបានចូលទៅកាន់តំណែងនោះ»។
លោកស្រីមិនអាចទទួលបានតំណែងជាមេឃុំទេ ប៉ុន្តែបើលោកស្រីនៅឈរលេខរៀងទីមួយក្នុងបញ្ជីឈ្មោះបេក្ខជននោះលោកស្រីនឹងទទួលបានតំណែងជាមេឃុំ។
ប៉ុន្តែទោះជាយ៉ាងណាក៏ដោយបើក្រឡេកមើលមុខតំណែងខ្ពស់ៗជាងនេះគេឃើញថាចំនួនមេឃុំជាស្ត្រីស្ទើរតែមិនមានអ្វីផ្លាស់ប្តូរនោះទេ គឺបន្ទាប់ពីការបោះឆ្នោតឃុំ សង្កាត់ កាលខែមិថុនាឆ្នាំមុនមានចំនួន ១២៨ នាក់ហើយបន្ទាប់ពីការំលាយគណបក្សសង្គ្រោះជាតិមានតែ ១៣០ នាក់ ប៉ុណ្ណោះដែលស្មើនឹង ៧,៩ ភាគរយ។
លោកស្រី រស់ សុភាព នាយិការអង្គការយេនឌ័រ និងអភិវឌ្ឍន៍ដើម្បីកម្ពុជាបានថ្លែងថា គំនិតរបស់អ្នកនយោបាយបុរសត្រូវតែផ្លាស់ប្តូរ ដើម្បីដាក់បញ្ចូលស្ត្រីតាំងតែពីដំបូង។
លោកស្រីថ្លែងថា ជាញឹកញាប់ស្ត្រីត្រូវបានគេប្រគល់តំណែងទាបៗឲ្យគឺមិនមែនតំណែងដែលមានឋានៈខ្ពស់ៗនោះទេ។ ហេតុដូចនេះហើយនៅពេលដែលគណបក្សសង្គ្រោះជាតិត្រូវបានរំលាយនោះ ស្ត្រីកាន់តែច្រើនដែលមកពីតំណែងទាបៗអាចបំពេញតំណែងនោះបាន។
លោកស្រីថ្លែងថា៖ «យើងមិនចង់រង់ចាំឱកាសទេ ប៉ុន្តែយើងចង់ឃើញឱកាសសមរម្យសម្រាប់ស្ត្រី»។
អ្នកនយោបាយជាស្ត្រីម្នាក់ទៀតគឺលោកស្រី ជួង សៅនី បានរៀបរាប់ថា លោកស្រីមិនបានជាប់ឆ្នោតទេនៅក្នុងការបោះឆ្នោតកាលពីខែមិថុនា ប៉ុន្តែឥឡូវនេះលោកស្រីបានក្លាយជាជំទប់ឃុំគោកបន្ទាយ ក្នុងស្រុករលាប្អៀរ ខេត្តកំពង់ឆ្នាំង។ ស្ត្រីដែលទើបមានអាយុ ២៨ ឆ្នាំរូបនេះបានរៀបរាប់ថា៖ «ខ្ញុំពិតជារីករាយណាស់។ ខ្ញុំមិនខ្វល់ថា ខ្ញុំទទួលបានតំណែងនេះដោយសារតែគណបក្សសង្គ្រោះជាតិត្រូវបានរំលាយអីនោះទេដរាបណាខ្ញុំអាចចូលរួមអភិវឌ្ឍឃុំរបស់ខ្ញុំបាន»។
លោកស្រី សៅនី បានពន្យល់ថាលោកស្រីទទួលខុសត្រូវលើផ្នែកអប់រំ និងសុខភាពហើយលោកស្រីនឹងប្រមែប្រមូលយុវជននៅក្នុងឃុំរបស់លោកស្រីឲ្យចូលរួមដោយផ្អែកលើបទពិសោធរបស់លោកស្រីដែលធ្លាប់ធ្វើការជាមួយអង្គការក្រៅរដ្ឋាភិបាលនៅក្នុងឃុំនេះ។
លោកស្រី ធីតា ឃឹះ នាយិកាអង្គការសីលការបានថ្លែងថា ការកើនឡើងនេះគឺមានសារៈសំខាន់ណាស់ជាពិសេសនៅថ្នាក់មូលដ្ឋានដើម្បីតំណាងផលប្រយោជន៍របស់ស្ត្រី និងកុមារ។ លោកស្រីសន្មតថា ការកើនឡើងនេះក៏ដោយសារតែការធ្លាក់ចុះ ការប្រកួតប្រជែងពីសមភាគីបុរសដែលមិនចង់ធ្វើឲ្យមានគម្លាត។
លោកស្រីឲ្យដឹងថា៖ «ឥឡូវនេះស្ត្រីមានការប្រកួតប្រជែងកាន់តែតិចជាងមុន ខណៈដែលឥឡូវនេះមានគណបក្សកំពុងកាន់អំណាចតែមួយនោះ»។ ប៉ុន្តែលោកស្រីបានចង្អុលបង្ហាញថាទោះបីជាចំនួននេះបានកើនឡើងនៅថ្នាក់ឃុំ សង្កាត់មួយចំនួនក្តី ប៉ុន្តែវាក៏បានថយចុះនៅថ្នាក់ជាតិ និងព្រឹទ្ធសភា។
ជាក់ស្ដែងយោងតាមតួលេខដែលបានចេញផ្សាយដោយគណៈកម្មាធិការជាតិរៀបចំការបោះឆ្នោតកាលពីថ្ងៃសៅរ៍បានបង្ហាញថាមានសមាជិកព្រឹទ្ធសភាជាស្ត្រីតែ ៨ រូបប៉ុណ្ណោះក្នុងចំណោមសមាជិកព្រឹទ្ធសភាទើបជាប់ឆ្នោតថ្មីចំនួន ៥៨ រូបបើប្រៀបធៀបទៅអាណត្តិមុន គឺស្ត្រីមានចំនួន ១០ រូប។
លោកស្រី សឺន កេតសិរីលក្ខណ៍ មន្ត្រីអង្គការឃ្លាំមើលការបោះឆ្នោត ខុម ហ្វ្រែល បានស្វាគមន៍ចំពោះការកើនឡើងសមាជិកក្រុមប្រឹក្សាឃុំ សង្កាត់ជាស្ត្រីនេះថា វាជាការចាំបាច់។
លោកស្រីបានថ្លែងថា៖ «ខ្ញុំមិនសប្បាយចិត្តទៅនឹងអ្វីដែលបានកើតឡើងពាក់ព័ន្ធទៅនឹងការរំលាយគណបក្សសង្គ្រោះជាតិនោះទេ ប៉ុន្តែក្រុមស្ត្រីរបស់យើងនឹងនៅតែបន្តធ្វើដំណើររបស់យើងទៅមុខទៀតដើម្បីធ្វើការតស៊ូមតិនឹងដើម្បីលើកកម្ពស់ស្ត្រីនៅក្នុងការធ្វើការសម្រេចចិត្ត»។
លោកស្រី សិរីលក្ខណ៍ ក៏បានលើកឡើងផងដែរថាការកើនឡើងនេះនៅមិនទាន់គ្រប់គ្រាន់នោះទេ ដោយលោកស្រីបានលើកឡើងថា ស្ត្រីជាច្រើនត្រូវបានរើសអើងនៅកន្លែងធ្វើការរបស់ពួកគេ ឧទាហរណ៍ពួកគេមិនត្រូវបានអនុញ្ញាតឲ្យទទួលខុសត្រូវ និងប្រើសិទ្ធិអំណាចដែលជាទូទៅពួកគេត្រូវមាននៅក្នុងតួនាទីនោះ។ លោកស្រីបញ្ជាក់ថា៖ «យើងព្រួយបារម្ភអំពីករណីនេះ»៕ NS