កំពត: សមត្ថកិច្ចខេត្តកំពត នឹងបញ្ជូនជនសង្ស័យ ២ នាក់ ជាសមាជិកក្រុមប្រឹក្សាស្រុកឈូកម្នាក់ និងសមាជិកក្រុមប្រឹក្សាឃុំតាកែនម្នាក់ ទៅសាលាដំបូងខេត្តកំពតនៅថ្ងៃនេះ បន្ទាប់ពីសមត្ថកិច្ចបានឃាត់ខ្លួន នៅថ្ងៃទី ១៣ ខែ សីហា ដែលពាក់ព័ន្ធក្លែងបន្លំឯកសារប្លង់ដីរបស់ពលរដ្ឋ រស់នៅភូមិវាលក្រសាំង ឃុំតាកែន ស្រុកឈូក ខេត្តកំពត។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ភ្នំពេញប៉ុស្ដិ៍កាលពីម្សិលមិញថា ជនសង្ស័យទាំង ២ នាក់នេះ ត្រូវបានសមត្ថកិច្ចជំនាញកំពុងសាកសួរនៅស្នងការដ្ឋាននគរបាលខេត្តនៅឡើយជុំវិញករណីក្លែងបន្លំឯកសារប្លង់ដីរបស់ពលរដ្ឋនៅទីតាំងខាងលើ ដោយនៅថ្ងៃទី ១៥ សីហានេះ សមត្ថកិច្ចនឹងបញ្ជូនទៅសាលាដំបូងខេត្តកំពត ដើម្បីចាត់ការតាមនីតិវិធីច្បាប់។
ជនសង្ស័យទាំង ២ នាក់នេះ ត្រូវបានកម្លាំងនគរបាលព្រហ្មទណ្ឌខេត្តកំពត បានឃាត់ខ្លួន នៅថ្ងៃទី ១៣ ខែ សីហា នៅភូមិវាលក្រសាំង ឃុំតាកែន ស្រុកឈូក ក្រោយពីពួកគាត់បានឃុបឃិតគ្នាក្លែងបន្លំឯកសារប្លង់ដី ដើម្បីរំលោភយកដីរបស់ពលរដ្ឋមួយគ្រួសារនៅក្នុងភូមិឃុំជាមួយគ្នា។ អំពើក្លែងនេះបានធ្វើឲ្យបាត់បង់ដីធ្លីរបស់ពលរដ្ឋម្នាក់ឈ្មោះ ទ្រួន អេង ជាម្ចាស់ប្លង់ដីពិតប្រាកដ (ប្លង់រឹង) នៅភូមិវាលក្រសាំង ឃុំតាកែន ស្រុកឈូក ខេត្តកំពត។
លោកបញ្ជាក់ថា៖ «ពេលយើងសាកសួររួចរាល់ហើយ គឺនៅថ្ងៃទី ១៥ សីហានេះ យើងនឹងបញ្ជូនទៅតុលាការ ដើម្បីឲ្យស្របតាមនីតិវិធីច្បាប់ ហើយគេសម្រេចយ៉ាងណា ខ្ញុំមិនទាន់ដឹងទេ»។
លោក ខៀវ រិទ្ធិភ័ណ្ឌ អភិបាលស្រុកឈូក កាលពីម្សិលមិញ មិនទាន់អាចស្វែងរកប្រភពទាក់ទងបានទេ។
តាមរបាយការណ៍របស់ស្នងការដ្ឋាននគរបាលខេត្តកំពត បានឲ្យដឹងថា ជនសង្ស័យ ទី១-ឈ្មោះ ហង់ ប៊ូញ ភេទប្រុស អាយុ៤៧ ឆ្នាំ រស់នៅភូមិកោះស្លា ឃុំត្រពាំងភ្លាំង ស្រុកឈូក ខេត្តកំពត មុខរបរសមាជិកក្រុមប្រឹក្សាស្រុកឈូក ខេត្តកំពត។ សមត្ថកិច្ចបានចាប់ខ្លួនពីបទក្លែងលិខិតសាធារណៈ ដែលបានប្រព្រឹត្តនៅភូមិវាលក្រសាំង ឃុំតាកែន ស្រុកឈូក។
ទី២-ឈ្មោះ ឃុត វ៉ាន ភេទប្រុស អាយុ ៤៦ ឆ្នាំ រស់នៅភូមិជ័យតាស្វាយ ឃុំតាកែន ស្រុកឈូក មុខរបរសមាជិកក្រុមប្រឹក្សាឃុំតាកែន ស្រុកឈូក ពីបទក្លែងលិខិតសាធារណៈ ដោយប្រើវិធី (លុប កែទីតាំងដី ពីភូមិកោះស្លា ឃុំត្រពាំងភ្លាំង មកដាក់ជាភូមិវាលក្រសាំង ឃុំតាកែន ស្រុកឈូក រួចបោះត្រា និងឲ្យមេឃុំតាកែន ចុះហត្ថលេខាត្រួតលើលិខិតរបស់មេឃុំត្រពាំងភ្លាំង ដែលបានចុះហត្ថលេខារួចហើយ)៕