អ្នកស្រី សំ សុខា ដែលគប់ស្បែកជើងលើស្លាក CPP ត្រូវចាប់បញ្ជូនពីថៃមកកម្ពុជាសប្តាហ៍មុន។ រូបថត សហការី
ភ្នំពេញៈ ឥស្សរជនគណបក្សប្រឆាំងរបស់កម្ពុជាដែលកំពុងស្វែងរកសិទ្ធិជ្រកកោននៅក្នុងប្រទេសថៃត្រូវបាននគរបាលថៃចុះទៅត្រួតពិនិត្យក្នុងរយៈកាលប៉ុន្មានថ្ងៃថ្មីៗនេះ ដោយបង្កឲ្យមានការភ័យខ្លាចអំពីការចាប់បញ្ជូនមកកម្ពុជាវិញ។
អ្នកនយោបាយកម្ពុជារាប់សិបនាក់បានគេចចេញពីប្រទេសកម្ពុជា ក្រោយពីគណបក្សសង្គ្រោះជាតិរបស់ពួកគេត្រូវបានរំលាយទាំងបង្ខំកាលពីថ្ងៃទី ១៦ ខែវិច្ឆិកា ឆ្នាំ ២០១៧ បន្ទាប់ពីការចាប់ខ្លួនលោក កឹម សុខា ដែលជាប្រធានគណបក្សប្រឆាំងដ៏ធំមួយនេះ។
សកម្មជនម្នាក់ក្នុងចំណោមពួកគេគឺលោក គង់ ម៉ាស់ ដែលនឹងត្រូវធ្វើជាបេក្ខជនសម្រាប់តំណាងរាស្ត្រគណបក្សប្រឆាំងនៅក្នុងការបោះឆ្នោតជាតិនាឆ្នាំនេះមុនពេលគណបក្សរបស់លោកត្រូវបានរំលាយថ្លែងថា កាលពីថ្ងៃសៅរ៍នគរបាលថៃបានចូលបន្ទប់របស់លោកដើម្បីពិនិត្យឯកសារអ្នកគាំទ្របក្សប្រឆាំងកម្ពុជា ប៉ុន្តែលោកមិនបាននៅផ្ទះទេពេលនោះ។
លោកថ្លែងពីម្សិលមិញថា៖ «ក្នុងរយៈកាលប៉ុន្មានថ្ងៃនេះក្នុងទីក្រុងបាងកក មានការប៉ុនប៉ងបំភិតបំភ័យធ្ងន់ធ្ងរមកលើសកម្មជនរបស់យើងដែលកំពុងស្នើសុំសិទ្ធិជ្រកកោននយោបាយ»។
លោកបន្តថា៖ «កម្លាំងប្រដាប់អាវុធរបស់ថៃនៅតែប្រចាំការតាមដាននៅពេលយើងទៅក្រៅ និងត្រឡប់មកវិញ។ ពួកគេឈប់ឡានមួយនៅទីនោះ និងបន្តឃ្លាំមើលយើង»។ លោកអះអាងថា រថយន្តដែលប្រចាំការនៅមុខអាផាតមិនរបស់លោកគឺមានស្លាកលេខយោធា។
លោកបានថ្លែងទៀតថា៖ «ពួកគេពិនិត្យសព្វគ្រប់ សូម្បីតែទូរស័ព្ទរបស់យើង... ហើយពួកគេពិនិត្យរកឯកសារដូចជាលិខិតឆ្លងដែន។ បន្ទាប់ពីពួកគេពិនិត្យរួច ពួកគេថតរូបជាភ័ស្តុតាង។ ពួកគេបានចាកចេញទៅវិញដោយសារយើងមានឯកសារគ្រប់គ្រាន់»។
តាមតួលេខ គឺមានចំនួនផ្សេងគ្នា ប៉ុន្តែបើតាមចំនួនប៉ាន់ប្រមាណជាង ១០០ នាក់កំពុងលាក់ខ្លួននៅក្នុងប្រទេសថៃ ហើយពាក់កណ្តាលនៃពួកគេកំពុងសុំសិទ្ធិជ្រកកោនជាជនភៀសខ្លួន។
លោក ម៉ាស់ បានថ្លែងថា ចំនួននេះគឺជិត ២០០ នាក់ហើយប្រមាណ ៦០ ភាគរយនៃពួកគេបានចាប់ផ្តើមដំណាក់កាលទីមួយនៃការស្វែងរកសិទ្ធិជ្រកកោនពីអង្គការសហប្រជាជាតិ។
អតីតតំណាងរាស្ត្រគណបក្សសង្គ្រោះជាតិលោក ឡុង បុត្តា បានថ្លែងថា ពួកគេជាង ១០ នាក់បានស្វែងរកសិទ្ធិជ្រកកោននៅប្រទេសអូស្ត្រាលី ឬនូវែលសេឡង់។
ការធ្វើបត្យាប័នអ្នកស្រី សំ សុខា ដែលជាជនភៀសខ្លួនកម្ពុជាដែលត្រូវបានកាត់ទោសកំបាំងមុខឲ្យជាប់ពន្ធនាគារ ២ ឆ្នាំពាក់ព័ន្ធនឹងករណីគប់ស្បែកជើងទៅលើស្លាកគណបក្សកាន់អំណាច បានធ្វើឲ្យមានការភ័យខ្លាចកាន់តែខ្លាំងឡើងថា រដ្ឋាភិបាលនឹងស្វែងរកការបញ្ជូនសកម្មជនគណបក្សប្រឆាំងត្រឡប់មកវិញ។
ការចុះទៅត្រួតពិនិត្យរបស់នគរបាលថៃត្រូវបានបញ្ជាក់ដោយអតីតចៅសង្កាត់គណបក្សសង្គ្រោះជាតិម្នាក់ ដែលកាលពីដំបូងបានគេចខ្លួនទៅប្រទេសថៃ ប៉ុន្តែបានត្រឡប់មករាជធានីភ្នំពេញវិញ។ ថ្លែងដោយសុំមិនបញ្ចេញឈ្មោះ លោកបានបញ្ជាក់ថា លោកបានទាក់ទងជិតស្និទ្ធជាមួយសហការីនៅទីក្រុងបាងកកដែលត្រូវបានចុះត្រួតពិនិត្យដោយអាជ្ញាធរថៃផងដែរ។
លោកបានថ្លែងថា៖ «ពួកគេបាននិយាយជាមួយខ្ញុំអំពីបញ្ហានេះពួកគេនិយាយថា ពួកគេពិតជាបារម្ភ... ពួកគេភ័យខ្លាចការបញ្ជូនមកវិញហើយចាប់ដាក់ពន្ធនាគារ»។
លោកបន្តថា៖ «ពួកគេនិយាយថា នគរបាលថៃមកពិនិត្យថាតើទិដ្ឋាការរបស់ពួកគេផុតកំណត់ឬអត់? ពួកគេតឹងរ៉ឹងណាស់ នៅពេលទិដ្ឋាការរបស់ពួកគេផុតកំណត់»។ លោកបន្តថា ភាគច្រើនបំផុតនៃសហការីរបស់លោកគឺប្រើទិដ្ឋាការទេសចរណ៍ដែលមានរយៈពេល ២ ខែ។ ដោយឥឡូវនេះ ត្រឡប់មកប្រទេសកម្ពុជាវិញ លោកក៏បារម្ភផងដែរអំពីសុវត្ថិភាពរបស់លោក។
លោកបានថ្លែងថា៖ «ប្រសិនបើពួកគេមិនចូលចិត្តយើង ពួកគេអាចធ្វើអ្វីមួយដើម្បីចោទប្រកាន់យើង»។
អ្នកនាំពាក្យរដ្ឋាភិបាលថៃលោក Werachon Sukondhaptipak មិនបានឆ្លើយតបសំណើសុំអត្ថាធិប្បាយកាលពីម្សិលមិញ ខណៈមន្ត្រីក្រសួងការបរទេសថៃដទៃៗទៀតមិនអាចទាក់ទងបាន។
អ្នកនាំពាក្យនគរបាលជាតិលោក គៀត ច័ន្ទថារិទ្ធ ថ្លែងថា នគរបាលកម្ពុជាមិនបានស្នើសុំបត្យាប័នអ្នកស្រី សំ សុខា ទេ ប៉ុន្តែអាជ្ញាធរកម្ពុជាតាមដានដោយយកចិត្តទុកដាក់។
លោកបានថ្លែងថា៖ «យើងមិនស្នើសុំទេ ប៉ុន្តែតាមដាន នៅពេលយើងដឹងថា អាជ្ញាធរថៃចាប់ខ្លួនគាត់ដោយសាររស់នៅខុសច្បាប់ ហើយបញ្ជូនត្រឡប់មកវិញ យើងរង់ចាំទទួលគាត់ នគរបាលពួកគេមានបច្ចេកទេសរបស់ពួកគេ»។
លោក ច័ន្ទថារិទ្ធ បានថ្លែងបន្តថា៖ «យើងមិនស្នើសុំ ប៉ុន្តែយើងកំពុងតាមដាន វាជាជំនាញមួយ»។
នៅពេលសួរថាតើអាជ្ញាធរកម្ពុជាស្នើសុំរដ្ឋាភិបាលថៃពិនិត្យមន្ត្រីគណបក្សសង្គ្រោះជាតិដែលកំពុងលាក់ខ្លួនឬអត់ លោក ចាន់ថារិទ្ធិ បដិសេធមិនឆ្លើយសំណួរត្រង់។
លោកបានថ្លែងថា៖ «អ្នកគួរតែយល់ហើយថា ប្រទេសថៃជាប្រទេសសេរី មិនមែនជាប្រទេសកុម្មុយនីស្ត ប្រសិនបើយើងពាក់ព័ន្ធនឹងរឿងនយោបាយ ឬសិទ្ធិមនុស្ស ពួកគេនឹងមិនចាប់ឲ្យយើងទេ ពួកគេនឹងមិននិយាយជាមួយយើងលើបញ្ហានោះ»។
លោកបន្តថា៖ «ប្រសិនបើវាជាករណីហេតុផលនយោបាយ ថៃពួកគេនឹងមិនធ្វើការជាមួយយើងទេ យើងយល់អំពីគោលនយោបាយរបស់ពួកគេហើយយើងនឹងមិននិយាយទៅកាន់ពួកគេអំពីរឿងនយោបាយ។ យើងមិនថោកនិយាយទៅពួកគេ»។
ទោះយ៉ាងណាក្តីលោក ច័ន្ទថារិទ្ធ បានថ្លែងថា ការពិនិត្យទៅលើមន្ត្រីគណបក្សសង្គ្រោះជាតិគឺគ្រាន់តែជា «ការអនុវត្តច្បាប់»។
«ប្រទេសថៃក្នុងទសវត្សរ៍ចុងក្រោយ ប្រទេសរបស់ពួកគេអភិវឌ្ឍ... ដូច្នេះកម្មករ ឬ បរទេសទៅប្រទេសថៃច្រើនប្រសិនបើយើងប្រៀបធៀបមកកម្ពុជា យើងមិនអាចប្រៀបធៀបតែមួយផ្នែកជាមួយថៃបានទេ ដូចជាពលករខុសច្បាប់ ដូច្នេះថៃពួកគេមានវិធានការផ្ទាល់ខ្លួនរបស់ពួកគេចំពោះការពង្រឹងច្បាប់ ដូចពលករកម្ពុជារបស់យើង ពួកគេបញ្ជូនមកកម្ពុជាវិញរាប់ពាន់នាក់»។
លោកបានបន្ថែមថា៖ «វាជាគោលនយោបាយរបស់ពួកគេដើម្បីគ្រប់គ្រងប្រជាជននៅក្នុងប្រទេសរបស់ពួកគេ ប្រសិនបើអ្នកចង់ដឹងជាងនេះ សូមសួរថៃខ្លួនឯង»។
លោកស្រី ចក់ សុភាព នៅមជ្ឈមណ្ឌលសិទ្ធិមនុស្សកម្ពុជាបានថ្លែងថា «នៅក្នុងបរិបទនយោបាយកម្ពុជាបច្ចុប្បន្នមនុស្សជាច្រើនត្រូវបានឃុំខ្លួន ដោយសារតែការប្រើប្រាស់សេរីភាពនៃការបញ្ចេញមតិ និងសេរីភាពនៃការប្រមូលផ្តុំដោយសន្តិវិធី និងការធ្វើទុក្ខបុកម្នេញជាការសោកស្តាយណាស់គឺជាការពិតមួយ»។ លោកស្រីបានថ្លែងបន្តថា៖ «នេះជាដំណើរវិវឌ្ឍន៍គួរឲ្យបារម្ភ»។
ការភ័យខ្លាចរបស់លោកស្រីត្រូវបានបន្ទរដោយ Andrea Giorgetta នាយកប្រចាំអាស៊ីនៃសហព័ន្ធអន្តរជាតិដើម្បីសិទ្ធិមនុស្ស (FIDH) ដែលជាអ្នកឃ្លាំមើលសិទ្ធិមនុស្សសកលបានថ្លែងថា៖ «ការពិតដែលប្រទេសថៃទំនងជាសកម្មក្នុងការស្វែងរកសកម្មជននយោបាយកម្ពុជាដែលសុំសិទ្ធិជ្រកកោននៅក្នុងដែនដីរបស់ខ្លួនដើម្បីនិរទេសពួកគេមកប្រទេសកម្ពុជាគឺជាបញ្ហាស៊ីជម្រៅមួយ និងឆ្លុះបញ្ចាំងពីការមិនគោរពច្បាប់អន្តរជាតិទាំងស្រុងរបស់របបយោធាថៃ»។
លោកបន្តថា៖ «កិច្ចសហប្រតិបត្តិការនយោបាយខ្លាំងឡើងរវាងទីក្រុងបាងកក និងទីក្រុងភ្នំពេញក៏មានន័យផងដែរថា សកម្មជននយោបាយថៃដែលស្វែងរកសិទ្ធិជ្រកកោនក្នុងប្រទេសកម្ពុជា ឥឡូវនេះអាចប្រឈមមុខនឹងការនិរទេសត្រឡប់ទៅប្រទេសថៃវិញ បន្ទាប់ពីមានការព្រមព្រៀងគ្នារវាងរដ្ឋាភិបាល ផ្តាច់ការទាំង ២»៕ PS
.jpg)
