.jpg)
ព្រះអង្គម្ចាស់ក្សត្រី នរោត្តម អរុណរស្មី ដែលសមាជិកហ៊្វុនស៊ិនប៉ិចចង់ឲ្យឡើងធ្វើប្រធានបក្ស។ ហេង ជីវ័ន
ភ្នំពេញៈ សមាជិកជាច្រើនរបស់គណបក្សហ៊្វុនស៊ិនប៉ិចគ្រោងស្នើឱ្យព្រះអង្គម្ចាស់ក្សត្រី នរោត្តម អរុណរស្មី ដែលជាព្រះអនុជរបស់ព្រះមហាក្សត្រ យាងមកធ្វើជាព្រះប្រធានគណបក្សជំនួសសម្ដេចក្រុមព្រះនរោត្តម រណឫទ្ធិ ដោយ ពួកគេអះអាងថា ព្រះអង្គរណឫទ្ធិដែលមិនអាចដឹកនាំបក្សបន្តទៀត បានសម្រេចព្រះទ័យឱ្យព្រះអង្គម្ចាស់នរោត្តម ចក្រាវុឌ្ឍ ធ្វើជាប្រធានស្តីទីគណបក្ស ខណៈសមាជិកភាគច្រើនមិនគាំទ្រព្រះអង្គម្ចាស់។
មន្ត្រីជាន់ខ្ពស់ម្នាក់របស់គណបក្សហ៊្វុនស៊ិនប៉ិច ដែលសុំមិនបញ្ចេញឈ្មោះ ដែលអះអាងថាខ្លួនជាអ្នកតំណាងឱ្យសមាជិក សមាជិកាទាំង ២៥ ខេត្ត/ក្រុង ប្រាប់ភ្នំពេញប៉ុស្ដិ៍កាលពីថ្ងៃទី ២៦ វិច្ឆិកា ថា សមាជិកសមាជិការបស់គណបក្សហ៊្វុនស៊ិនប៉ិចបានឯកភាពគ្នាគ្រោងដាក់សំណើទៅព្រះអង្គម្ចាស់ក្សត្រី អរុណរស្មី ដើម្បីយាងព្រះអង្គមកធ្វើជាព្រះប្រធាន គណបក្សហ៊្វុនស៊ិនប៉ិចជំនួសសម្ដេចក្រុមព្រះ នរោត្តម រណឫទ្ធិ វិញ។
លោកបានបន្តថា ការសម្រេចបែបនេះដោយសារសមាជិកបក្សទាំងអស់បានកត់សម្គាល់ថា សម្ដេចក្រុមព្រះ នរោត្តម រណឫទ្ធិ បាននិងកំពុងប្រឈួនខ្លាំង ដោយមិនអាចដឹកនាំគណបក្សបន្តទៀតបានទេ។ ចំណែកព្រះអង្គម្ចាស់នរោត្តម ចក្រាវុឌ្ឍ ក៏មិនអាចដឹកនាំគណបក្សបានដែរ ព្រោះព្រះអង្គមិនទាន់បានសិក្សាស៊ីជម្រៅលើបញ្ហានយោបាយថែមទាំងមិនទាន់មានបទពិសោធក្នុងវិស័យនយោបាយនេះដែរ។
លោកបញ្ជាក់ថា៖ «ក្រោមការដឹកនាំរបស់ព្រះអង្គម្ចាស់ ចក្រាវុឌ្ឍ កន្លងមកនេះព្រះអង្គបានបំផ្លាញរចនាសម្ព័ន្ធបក្សជាច្រើនបណ្ដេញសមាជិកបក្សចាស់ៗចោលបើកដៃឱ្យអ្នកផ្សេងអុកឡុកផ្ទៃក្នុងបក្ស ថែមទាំងបានរៀបចំផែនការលក់ទីស្នាក់ការបក្សជាបន្តបន្ទាប់។ ដូច្នេះមានតែព្រះអង្គម្ចាស់ក្សត្រី អរុណរស្មីទេដែលអាចដឹកនាំបន្តបាន ព្រោះព្រះអង្គក៏ធ្លាប់ដឹកនាំគណបក្សនេះកន្លងមកដែរ»។
ទោះយ៉ាងណាលោកមិនទាន់អាចបញ្ជាក់ពេលវេលាជាក់លាក់ថា ក្រុមសមាជិកនឹងត្រូវដាក់សំណើសុំយាងព្រះអង្គម្ចាស់នរោត្តម អរុណរស្មី មកធ្វើជាព្រះប្រធានគណបក្សហ៊្វុនស៊ិនប៉ិច នៅពេលណានោះទេ។
លោក សុ ផាន់ណា សមាជិកគណបក្សហ៊្វុនស៊ិនប៉ិចប្រចាំខេត្តសៀមរាបថ្លែងថា លោកបានឮពាក្យចចាមអារ៉ាមនេះដែរ ប៉ុន្ដែលោកនឹងមិនជំទាស់ទៅលើការដាក់ស្នើឱ្យព្រះអង្គម្ចាស់ក្សត្រី អរុណរស្មី យាងមកធ្វើជាព្រះប្រធានគណបក្សម្ដងទៀតនោះទេ ព្រោះព្រះអង្គក៏ធ្លាប់ដឹកនាំគណបក្សនេះពីមុនមកដែរ។
លោកបញ្ជាក់ថា៖ «បើគេស្នើអ៊ីចឹងហើយ ខ្ញុំក៏មិនជំទាស់ដែរ ព្រោះបើមតិភាគច្រើនគាត់គិតថា ព្រះអង្គម្ចាស់ក្សត្រី អរុណរស្មី មានសមត្ថភាពគ្រប់គ្រាន់ក្នុងការដឹកនាំបក្សនេះ ហើយកន្លងមកក៏គាត់ធ្លាប់ដឹកនាំយើងទាំងអស់គ្នាដែរ គឺឃើញថាមិនមានបញ្ហាអ្វីកើតឡើងទេ»។
ព្រះអង្គម្ចាស់ក្សត្រី នរោត្តម អរុណរស្មី បានមានព្រះបន្ទូលនៅថ្ងៃទី ២៦ វិច្ឆិកាថា ព្រះអង្គមិនមានព្រះទ័យចូលប្រឡូកក្នុងវិស័យនយោបាយវិញទេ។ ប៉ុន្ដែព្រះអង្គជំរុញឱ្យសមាជិកសមាជិកាគណបក្សហ៊្វុនស៊ិនប៉ិចទាំងអស់ គួរតែនាំគ្នារួបរួមគ្នា ស្រឡាញ់គ្នា រាប់អានគ្នា ធ្វើការងារជាមួយគ្នា។ ជាពិសេសថ្នាក់ដឹកនាំជាន់ខ្ពស់ក្នុងបក្សត្រូវប្រើចិត្តធម៌ និងអត់ឱនឲ្យគ្នាទៅវិញទៅមកឱ្យបានច្រើនចៀសវាងការបែកបាក់សាមគ្គី។
ព្រះអង្គម្ចាស់មានព្រះបន្ទូលថា សព្វថ្ងៃនេះព្រះអង្គមានព្រះទ័យចង់ឃើញសមាជិកបក្សចេះរួបរួមគ្នាធ្វើការជាធ្លុងមួយ ដើម្បីបម្រើជាតិកម្ពុជាឱ្យមានការរីកចម្រើនបន្ថែមទៀត។ ចំណែកព្រះអង្គផ្ទាល់សុំត្រឹមតែនៅក្បែរព្រះកាយ សម្ដេចយាយ សម្តេចម៉ែ ដើម្បីបម្រើទ្រង់ ក៏ដូចជាចង់បញ្ចេញកម្លាំងព្រះកាយមួយចំនួនជួយដល់ប្រជាពលរដ្ឋនៅទីឆ្ងាយៗផងដែរ។
ព្រះអង្គម្ចាស់ក្សត្រី អរុណរស្មី បានបញ្ជាក់ថា៖ «បញ្ហាខ្ញុំនាពេលនេះគឺខ្ញុំចង់ទៅបម្រើរាស្ត្រដោយផ្ទាល់តាមមូលដ្ឋានដោយធ្វើការងារជាលក្ខណៈមនុស្សធម៌ និងចង់នៅជិតព្រះកាយសម្ដេចម៉ែ ដើម្បីបម្រើទ្រង់។ ចំណែកការងារនយោបាយ ឬគណបក្សនេះ ខ្ញុំទុកឱ្យសម្ដេចក្រុមព្រះជាអ្នកចាត់ចែង។ បើមិនអ៊ីចឹងទេ គឺសមាជិកទាំងអស់ គាត់ជាអ្នកធ្វើជាអ្នកដឹកនាំទៅ ខ្ញុំសុំនៅឆ្ងាយពីនយោបាយ»។
ព្រះអង្គម្ចាស់នរោត្តម ចក្រាវុឌ្ឍ ព្រះប្រធានស្ដីទីគណបក្សហ៊្វុនស៊ិនប៉ិចពីម្សិលមិញនៅមិនទាន់អាចទាក់ទងដើម្បីសុំការបញ្ជាក់ជុំវិញករណីនេះបានទេ៕
