.jpg)
សមាជិកព្រឹទ្ធសភាលើកដៃអនុម័តសេចក្ដីព្រាងច្បាប់ស្ដីពីវិធានទប់ស្កាត់កូវីដ ១៩ ក្នុងកិច្ចប្រជុំពេញអង្គនៅថ្ងៃនេះ។ រូបថត ព្រឹទ្ធសភា
ភ្នំពេញៈ សមាជិកព្រឹទ្ធសភា ៣៩ រូប ដែលមានវត្តមាននៅវិមានព្រឹទ្ធសភាក្នុងសម័យប្រជុំពេញអង្គនៅថ្ងៃទី ១១ ខែ មីនា ឆ្នាំ ២០២១ នេះ បានអនុម័តជាឯកច្ឆន្ទនូវសេចក្ដីព្រាងច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដោយគ្មានការកែប្រែ។
សេចក្ដីព្រាងច្បាប់នេះមាន ៦ ជំពូក និង ១៨ មាត្រា រៀបចំឡើងដើម្បីកំណត់គោលបំណង វិសាលភាព និងវិធានការ ទោសប្បញ្ញត្តិ និងសមត្ថកិច្ចដែលត្រូវអនុវត្ត។ គោលដៅនៃច្បាប់នេះគឺដើម្បីការពារអាយុជីវិតប្រជាពលរដ្ឋ សុខភាពសាធារណៈ សណ្ដាប់ធ្នាប់សាធារណៈ ព្រមទាំងការកាត់បន្ថយឲ្យបានជាអតិបរមានូវផលប៉ះពាល់នៃជំងឺឆ្លងចំពោះវិស័យសង្គម សេដ្ឋកិច្ចនៅកម្ពុជា។ នេះបើតាមសេចក្ដីប្រកាសព័ត៌មានរបស់ព្រឹទ្ធសភា។
លោក កើត រិទ្ធ រដ្ឋមន្ត្រីក្រសួងយុត្តិធម៌ បានថ្លែងក្នុងវិមានព្រឹទ្ធសភាថា ច្បាប់នេះធ្វើឡើងក្នុងបរិបទដែលពិភពលោក និងកម្ពុជាកំពុងរងគ្រោះពីការរាតត្បាតនៃជំងឺកូវីដ ១៩។ ប្រទេសខ្លះបានបង្កើតច្បាប់ថ្មី ហើយប្រទេសខ្លះប្រើច្បាប់ចាស់របស់ខ្លួនដោយធ្វើការកែប្រែវិធានការថ្មីឲ្យស្របទៅតាមស្ថានភាព ហើយក៏មានប្រទេសមួយចំនួនបានដាក់វិធានការតឹងរ៉ឺងបំផុតដើម្បីទប់ស្កាត់ជំងឺនេះ។
លោកថ្លែងថា៖ «ប្រទេសណាដែលអាចអនុវត្តវិធានការទប់ស្កាត់បានតឹងរ៉ឹងជាងគេ ប្រទេសនោះអាចគ្រប់គ្រងការឆ្លងរាលដាល ហើយបច្ចុប្បន្ន ប្រទេសនោះអាចស្រាកស្រាន្តពីការឆ្លងរាលដាលធ្ងន់ធ្ងរនៃជំងឺនេះ។ ប្រទេសខ្លះចាប់ផ្ដើមប្រើច្បាប់គ្រាអាសន្ន ប្រទេសខ្លះប្រើប្រាស់វិធីសាស្ត្របិទខ្ទប់ប្រទេសក្នុងរយៈពេលមួយកំណត់»៕
