.jpg)
សមាជិករដ្ឋសភានៅក្នុងកិច្ចប្រជុំពេញអង្គកាលពីថ្ងៃម្សិលមិញ។ រូបថត ហ្វេសប៊ុក
ភ្នំពេញៈ រដ្ឋសភាបានបោះឆ្នោតអនុម័តជាឯកច្ឆន្ទលើសេចក្តីព្រាងច្បាប់ស្តីពីរបបសន្តិសុខសង្គមដែលមាន ១១ ជំពូក និង ១០៧ មាត្រា។ ច្បាប់នេះធ្វើក្នុងគោលបំណងដើម្បីធានាឲ្យមានសមធម៌សាគ្គីធម៌សង្គម និងដើម្បីលើកកម្ពស់សុខុមាលភាព និងជីវភាពរបស់ប្រជាពលរដ្ឋ។
សេចក្តីព្រាងច្បាប់ស្តីពីរបបសន្តិសុខសង្គមត្រូវបានអនុម័តដោយមានសំឡេងគាំទ្រពីសមាជិករដ្ឋសភាចំនួន ១០៥ លើ ១០៥ សំឡេងកាលពីព្រឹកម្សិលមិញ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានថ្លែងនៅក្នុងកិច្ចប្រជុំពេញអង្គរដ្ឋសភានៅមុនពេលដែលរដ្ឋសភាធ្វើការអនុម័តសេចក្តីព្រាងច្បាប់នេះថា សេចក្តីព្រាងច្បាប់ស្តីពីរបបសន្តិសុខសង្គមនេះពិតជាមានសារៈសំខាន់បំផុតសម្រាប់បុគ្គលដែលស្ថិតក្នុងវិស័យសាធារណៈ បុគ្គលដែលស្ថិតក្នុងវិស័យឯកជន និងបុគ្គលស្វ័យនិយោជន៍ទទួលបាននូវរបបសន្តិសុខផ្នែកប្រាក់សោធនផ្នែកថែទាំសុខភាពផ្នែកហានិភ័យការងារ និងផ្នែកនិកម្មភាពការងារចូលរួមចំណែកក្នុងការលើកកម្ពស់ជីវភាព ភាពថ្លៃថ្នូរ និងភាពសុខដុមរមនាក្នុងសង្គម។
លោកបានថ្លែងថា៖ «សេចក្តីព្រាងច្បាប់ស្តីពីរបបសន្តិសុខសង្គមនេះមានគោលបំណងបង្កើតឱ្យមានរបបសន្តិសុខសង្គមនៃព្រះរាជាណាចក្រកម្ពុជាតាមគោលការណ៍សាមគ្គីធម៌ និងសមធម៌សង្គមដែលរួមមាន ៤ ផ្នែកគឺផ្នែកប្រាក់សោធនផ្នែកថែទាំសុខភាពផ្នែកហានិភ័យការងារ និង ផ្នែកនិកម្មភាពការងារសម្រាប់បុគ្គលដែលស្ថិតក្នុងវិស័យ សាធារណៈ បុគ្គលដែលស្ថិតក្រោមច្បាប់ស្តីពីការងារ គិតរួមទាំងបុគ្គលិកផ្លូវអាកាស នាវាសមុទ្រ និងអ្នកបម្រើតាមផ្ទះ ព្រមទាំងបុគ្គលស្វ័យនិយោជន៍»។
លោកបានឲ្យដឹងទៀតថាសេចក្តីព្រាងច្បាប់ស្តីពីរបបសន្តិសុខសង្គមនេះត្រូវបានដាក់ឆ្លងកិច្ចប្រជុំជាបន្តបន្ទាប់ដូចជា កិច្ចប្រជុំកម្រិតបច្ចេកទេសរបស់ក្រសួង សិក្ខាសាលាពិគ្រោះយោបល់ជាមួយក្រុមអ្នកជំនាញផ្នែកច្បាប់ជាតិ ដៃគូអភិវឌ្ឍន៍ និងជាពិសេស ភាគី និយោជក និងសហជីព និង កិច្ចប្រជុំអន្តរក្រសួងដោយបានពិនិត្យនិង ពិភាក្សាយ៉ាងល្អិតល្អន់មុននឹងដាក់ចូលក្នុងកិច្ចប្រជុំពេញអង្គគណៈរដ្ឋមន្ត្រី។
លោក សំហេង ថ្លែងថា៖ «រាជរដ្ឋាភិបាលកម្ពុជាបានអនុវត្តដោយជោគជ័យនូវរបបសន្តិសុខសង្គមផ្នែកហានិភ័យការងារផ្នែកថែទាំ សុខភាពសម្រាប់កម្មករនិយោជិតក្នុងវិស័យឯកជន និងផ្នែកថែទាំសុខភាពសម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជនដែលបច្ចុប្បន្នមានចំនួនប្រមាណជាជាង ២ លាននាក់ព្រមទាំងបានផ្តល់សេវាថែទាំសុខភាពតាមរយៈមូលនិធិសមធម៌សុខាភិបាលសម្រាប់កម្មករនិយោជិតក្រៅប្រព័ន្ធជាអាទិ៍កម្មករស៊ីក្លូ កម្មករម៉ូតូកង់បី កីឡាករ កីឡាការិនី មន្ត្រីក្រុមប្រឹក្សាឃុំ-សង្កាត់ និងមន្ត្រីថ្នាក់ដឹកនាំភូមិ ប្រមាណជាជាង ៧ ម៉ឺននាក់។
លោក ឈាង វុន ប្រធានគណៈកម្មការការបរទេស និងសហប្រតិបត្តិការអន្តរជាតិ ឃោសនាការ និងព័ត៌មានរដ្ឋសភាបានថ្លែងនៅក្នុងអង្គប្រជុំរដ្ឋសភាថា៖ «ច្បាប់របស់យើងនេះគឺជាច្បាប់ដ៏សែនមានសារៈសំខាន់ដើម្បីដោះស្រាយបញ្ហាសង្គម ប្រទេសទាំងអស់ដែលគេគិតពីផលប្រយោជន៍របស់ប្រជាពលរដ្ឋជាពិសេសប្រជាពលរដ្ឋដែលមានប្រាក់ចំណូលទាបដែលជីវភាពមានកម្រិតតែងតែធ្វើច្បាប់មួយចំនួនការពារការងាររស់នៅរបស់គាត់ ការពារនិងដោះស្រាយបញ្ហា ភាពក្រីក្រនៃជីវភាពរបស់គាត់»។
លោក វន ពៅ ប្រធានសមាគមប្រជាធិបតេយ្យ និងសេដ្ឋកិច្ចក្រៅប្រព័ន្ធវិញបានថ្លែងថា រាជរដ្ឋាភិបាលមិនបានបើកទូលាយឲ្យមានការពិភាក្សាស៊ីជម្រៅជាមួយអង្គការសង្គមស៊ីវិល និងស្ថាប័នពាក់ព័ន្ធនៅមុនរដ្ឋសភាអនុម័តនោះទេ៕
