ភ្នំពេញៈ ឥស្សរជននយោបាយដែលជាសមាជិករដ្ឋសភាលោក ឡូយ សុផាត ថ្លែងកាលពីថ្ងៃពុធថា កម្ពុជាប្រាកដជាមានហានិភ័យខ្ពស់ក្នុងការផ្គត់ផ្គង់ស្បៀងអាហារក្នុងស្រុក បើគ្មានវិស័យកសិកម្មទ្រទ្រង់សេដ្ឋកិច្ចក្នុងវិបត្តិជំងឺកូវីដ ១៩ នេះទេ។ ជាមួយគ្នានេះតំណាងកសិករចង់ឱ្យមានការផ្សព្វផ្សាយទីផ្សារផលិតផលកសិកម្ម និងបច្ចេកទេសកសិកម្មឱ្យបានទូលំទូលាយ។
ក្នុងវេទិកាកសិករថ្នាក់ជាតិលើកទី៩ ក្រោមប្រធានបទ «កសិករខ្នាតតូចក្នុងបរិបទកូវីដ ១៩» នៅសណ្ឋាគារកាំបូឌីយ៉ាណា រាជធានីភ្នំពេញកាលពីថ្ងៃទី ២១ តុលា លោក ឡូយ សុផាត សមាជិករដ្ឋសភា និងជាប្រធានគណៈកម្មការផែនការវិនិយោគកសិកម្ម អភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភាថ្លែងថា ប្រសិនបើគ្មានវិស័យកសិកម្ម ទ្រទ្រង់សេដ្ឋកិច្ចកម្ពុជាទេក្នុងវិបត្តិជំងឺកូវីដ ១៩ កម្ពុជាអាចនឹងមានបញ្ហា។
លោក សុផាត ថ្លែងថា៖ «របត់សង្គមដល់ពេលដែលត្រូវគិតគូរពីចំណេះដឹង បើសិនយើងមានចំណេះដឹងតិចជាងគេ យើងមិនអាចពង្រីកវិស័យកសិកម្មកម្ពុជាបានទេ។ ក្នុងវិបត្តិកូវីដ១៩ បើគ្មានវិស័យកសិកម្មទ្រទ្រង់សេដ្ឋកិច្ចទេ កម្ពុជាយើងប្រាកដជាមានហានិភ័យខ្ពស់ក្នុងការផ្គត់ផ្គង់ស្បៀងអាហារក្នុងស្រុកដែលមានបន្លែ ត្រី សាច់ ជាដើម»។
បើតាមលោក ឡូយ សុផាត កសិករទូទៅ ជាពិសេសកសិករខ្នាតតូចគួរតែមានការផ្លាស់ប្តូរទស្សនៈទម្លាប់របស់កសិករ ការផលិតការកែច្នៃ។ ពិសេសបណ្តុះបណ្តាល ចំណេះដឹង ជំនាញ និងបច្ចេកទេសកែច្នៃឱ្យអស់លទ្ធភាពសម្រាប់គ្រប់ផលិតផលដែលអាចកែច្នៃបានដើម្បីបង្កើនតម្លៃបន្ថែមទៅលើផលិតផលតាមតម្រូវការទីផ្សារ។
លោក សុង សារ៉ន ប្រធានសហព័ន្ធស្រូវអង្ករកម្ពុជាឱ្យដឹងថា ក្នុងពេលមានកូវីដ ១៩ វិស័យកសិកម្មមួយចំនួនពិតជាទទួលរងផលប៉ះពាល់ក្នុងការប្រកួតប្រជែងមែន។ ប៉ុន្តែមួយចំនួននៅមានលទ្ធភាពធ្វើបាន ហេតុនេះវាជាឱកាសសម្រាប់វិស័យកសិកម្មរៀបចំខ្លួនក្នុងការប្រកួតប្រជែងក៏ដូចជានាំចេញ។
លោក សុង សារ៉ន បន្ថែមថានៅក្នុងបរិបទសព្វថ្ងៃទំនិញមួយចំនួនដូចជា ការផលិតកែច្នៃនៅកម្ពុជាមិនទាន់បានធ្វើឡើងល្អប្រសើរនៅឡើយ។ ទំនិញនោះរងផលប៉ះពាល់ខ្លាំងទាក់ទងតម្លៃ។
លោក សារ៉ន ថ្លែងថា៖ «ទំនិញដែលយើងបានធ្វើល្អប្រសើរមានដូចជា ស្រូវ អង្ករ ព្រោះមានរោងចក្រកែច្នៃ វេចខ្ចប់មានសម្ទុះក្នុងការនាំចេញមានការកើនឡើងតម្លៃមានភាពល្អប្រសើរ។ ប៉ុន្តែទំនិញមួយចំនួនក្នុងវិស័យកសិកម្មយើង ដែលមិនមានលទ្ធភាពកែច្នៃគឺយើងត្រូវនាំចេញ វត្ថុធាតុដើម នាំឱ្យទទួលរងប៉ះពាល់ខ្លាំង ដូចជាស្វាយ និងស្វាយចន្ទីជាដើម»។
បើតាមអ្នកជំនួញរូបនេះ កសិករខ្នាតតូចដែលមានដីតិចជាង ១ ហិកតា មិនអាចបន្តធ្វើស្រែបានទេក្នុងវិបត្តិកូវីដ ១៩ គួរតែរៀបចំការប្រមូលផ្តុំជាសហគមន៍ ដើម្បីដាំនូវកសិផលផ្សេងៗដូចជា បន្លែ ឬដំណាំណាដែលអាចបង្វែរជាទឹកប្រាក់លឿន ជាពិសេសដំណាំដែលមានការប្រើប្រាស់ទឹកតិច ព្រោះការធ្វើស្រែគឺត្រូវការទឹកច្រើនដែលនាំឱ្យជួបបញ្ហាមួយចំនួន។
ទោះយ៉ាងណាលោកស្រី យ៉ាន់ ស្រីយ៉ាត តំណាងកសិករស្ត្រីឆ្នើមលើកឡើងថា ព័ត៌មានទីផ្សារផលិតផលកសិកម្ម និងបច្ចេកទេសកសិកម្មមិនទាន់មានការផ្សព្វផ្សាយឱ្យទូលំទូលាយទៅដល់កសិករនៅឡើយ ជាពិសេសកសិករខ្នាតតូច។ ក្រោយពីការទទួលរងផលប៉ះពាល់ដោយកូវីដ ១៩ ទៅលើដំណាំកសិកម្មរបស់កសិករខ្នាតតូចក៏នៅមានបញ្ហាប្រឈមបន្ថែមទាក់ទងនឹងអាកាសធាតុផងដែរ។
លោកស្រីនិយាយថា៖ «យើងគួរតែមានការពង្រឹងការសិក្សាស្វែងយល់ពីគ្នាទៅវិញទៅមករវាងកសិករ និងកសិករ និងអ្នកពាក់ព័ន្ធនានាដើម្បីពង្រឹងសមត្ថភាពបន្សុំាទៅនឹងការប្រែប្រួលអាកាសធាតុ ដើម្បីកាត់បន្ថយផលប៉ះពាល់ដែលបណ្តាលមកពីគ្រោះមហន្តរាយនៃការប្រែប្រួលអាកាសធាតុនាពេលបច្ចុប្បន្ន និងទៅអនាគត»។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា ថ្លែងថាសម្រាប់វេទិកានៃអង្គការមិនមែនរដ្ឋាភិបាលស្តីពីកម្ពុជាគឺជាអង្គការ សមាជិកភាព ដែលបច្ចុប្បន្នមានអង្គការជាតិ និងអន្តរជាតិចំនួន ៩៦ ជាសមាជិក និងមានលេខាធិការដ្ឋានចំនួន ៨។ មានអង្គការជាតិ និងអន្តរជាតិចំនួន ៣៩២ កំពុងធ្វើការយ៉ាងសកម្មជាមួយកសិករ និងស្ថាប័នរដ្ឋ និងដៃគូអភិវឌ្ឍន៍ផ្សេងៗ។
លោកថ្លែងថា៖ «យើងបានធ្វើការយ៉ាងសកម្មជាមួយប្រជាកសិករ សភាជាតិ រាជរដ្ឋាភិបាល ដៃគូអភិវឌ្ឍន៍ វិស័យឯកជន និងស្ថាប័នសិក្សាស្រាវជ្រាវក្នុងការកសាង សមត្ថភាពចែករំលែកព័ត៌មាន។ ការសិក្សា ស្រាវជ្រាវ ការអនុវត្តនៅទីវាលជាក់ស្តែង និងការជជែកពិភាក្សាអំពីការអនុវត្ត និងការអភិវឌ្ឍគោលនយោបាយត្រង់ទៅត្រង់មកជាមួយតំណាងស្ថាប័នពាក់ព័ន្ធទាំងនៅថ្នាក់ជាតិ និងថ្នាក់ក្រោមជាតិ ដើម្បីរួមចំណែករកដំណោះស្រាយសមស្របសំដៅឆ្ពោះទៅរកការសម្រេចបាននូវការអភិវឌ្ឍ ប្រកបដោយសមធម៌ បរិយាប័ន្ន និងចីរភាព»៕
វីដេអូ៖