សៀមរាបៈ សមាជិកសភាម៉ាឡេស៊ី Larry Sng បានមកដល់ខេត្តសៀមរាប កាលពីថ្ងៃពុធ ខណៈការមកដល់របស់លោកត្រូវបានរិះគន់ដោយអង្គការក្រៅរដ្ឋាភិបាលមួយ ថា ជាកិច្ចខិតខំប្រឹងប្រែងរបស់ ទីក្រុងគូឡាឡាំពួក្នុងការ«ប្រើឥទ្ធិពលទៅលើច្បាប់កម្ពុជា»។
ស្ថានទូតម៉ាឡេស៊ី ក្នុងរាជធានីភ្នំពេញ កាលពីថ្ងៃទី ៣០ ខែមករា បានស្នើសុំ«កិច្ចសហប្រតិបត្តិការពីក្រសួងការបរទេស និងកិច្ចសហប្រតិបត្តិការអន្តរជាតិ ក្នុងព្រះរាជាណាចក្រកម្ពុជា និងអាជា្ញធរពាក់ព័ន្ធរបស់កម្ពុជាដោះលែងជនជាតិម៉ាឡេស៊ីទាំង ៤៧ នាក់ដែលត្រូវបានឃុំខ្លួន»។
ទោះយ៉ាងណាក្តី មន្រ្តីស៊ើបអង្កេតសិទ្ធិមនុស្សជាន់ខ្ពស់ នៅអង្គការអាដហុក លោក សឹង សែនករុណា បានរិះគន់កិច្ចខិតខំប្រឹងប្រែងការទូត របស់រដ្ឋាភិបាលម៉ាឡេស៊ី ពីព្រោះ«គ្មានរដ្ឋាភិបាលដទៃណា គួរមានឥទ្ធិពលលើច្បាប់កម្ពុជាទេ»។
លោក សែនករុណា បានប្រាប់ភ្នំពេញប៉ុស្តិ៍កាលពីថ្ងៃពុធថា៖ «ពេលខ្លះ កម្ពុជានិរទេសឧក្រិដ្ឋជនបរទេស ហើយយើងមិនដែលដឹងថា តើពួកគេ ទទួលបានយុត្តិធម៌ នៅក្នុងប្រទេសកំណើតរបស់ពួកគេ ឬអត់នោះទេ»។
ប៉ុន្តែ Sng បានច្រានចោលការអះអាងនេះ។ លោកបានថ្លែងថា៖ «យើងគោរពច្បាប់របស់ប្រទេស ហើយយើងមកទីនេះ ដើម្បីស្វែងយល់អំពីស្ថានភាពរបស់អ្នកជាប់ឃុំទាំងនោះ ដើម្បីឲ្យយើងអាចពាំនាំស្ថានភាពនេះទៅប្រាប់[ក្រសួងការបរទេសវិញ] និងរដ្ឋាភិបាលរបស់យើង ដើម្បីពិនិត្យមើលជម្រើសប្រភេទណា ដែលអាចមាននៅក្នុងស្ថានភាពដូចនេះ។
លោកបានថ្លែងបន្តថា៖ «ដូច្នេះ វាជាភាពបន្ទាន់ ដែលរដ្ឋាភិបាលម៉ាឡេស៊ី និងកម្ពុជា ត្រូវពិភាក្សាគ្នាជាប់ជានិច្ច ដើម្បីឲ្យយើងអាចយល់អំពីស្ថានភាពនេះប្រសើរឡើង និងផ្តល់ជំនួយប្រភេទណា ថាតើផ្នែកច្បាប់ឬដំបូន្មានទៅអ្នកជាប់ឃុំទាំងនោះ ដើម្បីឲ្យពួកគេ អាចទទួលបាន ការជំនុំជម្រះដោយយុត្តិធម៌… ឬនាំពួកគេត្រឡប់ទៅប្រទេសម៉ាឡេស៊ីវិញ អាស្រ័យលើការសម្រេចរបស់អាជ្ញាធរកម្ពុជា»។
លោក Sng តំណាងរាស្រ្តសម្រាប់ក្រុង Julau នៅក្នុងរដ្ឋ Sarawak ជាកន្លែងដែលអ្នកជាប់ឃុំ ៤៤ នាក់ក្នុងចំណោមអ្នកជាប់ឃុំ ៤៧ នាក់ មានស្រុកកំណើតនៅទីនោះ បានថ្លែងថា លោកកំពុងចុះទៅពន្ធនាគារខេត្តបន្ទាយមានជ័យ នៅក្នុងឋានៈជាផ្លូវការរបស់លោក ដើម្បីវាយតម្លៃស្ថានភាព ដែលក្រុមនោះ កំពុងប្រឈម និងដើម្បីដឹងថា តើពួកគេ មកប្រទេសកម្ពុជាដូចម្តេច។
លោក Sng បានថ្លែងបន្ទាប់ពីកិច្ចប្រជុំថា៖ «ខ្ញុំបានប្រាប់[អ្នកដែលជាប់ឃុំ] កុំឲ្យបារម្ភ ដោយសារទាំងអាជ្ញាធរម៉ាឡេស៊ី និងអាជ្ញាធរកម្ពុជា កំពុងធ្វើការងារយ៉ាងជិតស្និទ្ធ ដើម្បីធានាឲ្យមានការដោះលែងពួកគេ»។
លោក Sng បានថ្លែងបន្តថា មុនពេលជួបពួកគេម្នាក់ម្តងៗ តំណាងម្នាក់ ពីស្ថានទូម៉ាឡេស៊ី និងរូបលោក បានផ្តល់«ការលើកទឹកចិត្ត និងក្តីសង្ឃឹម ទៅអ្នកជាប់ឃុំទាំងនោះថា រដ្ឋាភិបាលម៉ាឡេស៊ី កំពុងខិតខំអស់ពីសមត្ថភាពដើម្បីធានាឲ្យមានការដោះលែងពួកគេ»។
គណៈប្រតិភូបានត្រឡប់ទៅទីក្រុងគូឡាឡាំពួនៅថ្ងៃទី ១៤ ខែកុម្ភៈ ដើម្បីជួបឧបនាយករដ្ឋមន្រ្តីម៉ាឡេស៊ីលោក Muhyiddin Yassin និងសមាជិកគ្រួសារដើម្បី«ស្វែងរកភាពច្បាស់លាស់បន្ថែមទៀត ពី[ក្រសួងការបរទេស]អំពីចំណាត់ការអ្វី ដែលត្រូវធ្វើឡើងតាមរយៈច្រកការទូត»។
លោក Sng បានប្រាប់អ្នកយកព័ត៌មានថា អ្នកជាប់ឃុំទាំងនោះ«ត្រួវបានយកចិត្តទុកដាក់យ៉ាងល្អ និងទទួលបានអាហារយ៉ាងល្អ»។
លោកបានបន្ថែមថា ប្រធានពន្ធនាគារខេត្តបន្ទាយមានជ័យ បានគោរពចំពោះបែបបទនៃការទទួលទានអាហាររបស់អ៊ិស្លាម ដោយទិញអាហារសម្រាប់អ្នកជាប់ឃុំ ម៉ូស្លីម ពីលុយហោប៉ៅខ្លួនឯង ប៉ុន្តែអ្នកជាប់ឃុំមួយចំនួន មានស្បែកកន្ទួល និងក្រម៉រ ដោយតម្រូវឲ្យមានគ្រូពេទ្យអម ដើម្បីចេញវេជ្ជបញ្ជា។
អ្នកជាប់ឃុំទាំងនោះ បានអះអាងថា ពួកគេ ត្រូវបានលួងលោមឲ្យមកប្រទេសកម្ពុជា ដោយទីភ្នាក់ងារជ្រើសរើសពលកររបស់ចិនមួយ ដែលសន្យាថា នឹងផ្តល់ប្រាក់ខែខ្ពស់ សម្រាប់ការងារលក់គ្រឿងអេឡិចត្រូនិក ឬនៅក្នុងឧស្សាហកម្មបដិសណ្ឋារកិច្ច។
បន្ទាប់ពីទីភ្នាក់ងារនេះ មិនគោរពតាមការសន្យារបស់ខ្លួន ក្រុមនេះ ដោយសារតែស្ថិតនៅក្នុងស្ថានភាពលំបាកបានចាប់ផ្តើមធ្វើការឲ្យអង្គការមួយ ដែលមានការពាក់ព័ន្ធនឹងការជួញដូរមនុស្ស។ នេះបើយោងតាម លោក Mohd Azra មន្រ្តីពិសេសរបស់ លោក Nurul Izzah Anwar តំណាងរាស្រ្តសម្រាប់ទីក្រុង Permatang Pauh រដ្ឋ Penang។
Azra បន្ទាប់ពីមានសំណើពីសមាជិកគ្រួសារ បានចុះជួបអ្នកឃុំខ្លួនទាំងនោះ ដល់ពន្ធនាគារខេត្តបន្ទាយមានជ័យបន្ទាប់ពីពួកគេ ត្រូវបានផ្ទេរចេញពីប៉ោយប៉ែត ជាកន្លែងដែលពួកគេបានធ្វើការនៅថ្ងៃបុណ្យណូអែល។
ជនជាតិចិន ៨ នាក់ក៏ត្រូវបានចាប់ខ្លួនផងដែរ នៅក្នុងការចុះបង្ក្រាបចំនួនពីរ ដូចគ្នានោះ ប៉ុន្តែត្រូវបានដោះលែង ដោយសារអាជ្ញាធរនិយាយថា ពួកគេ គ្រាន់តែបម្រើការជាចុងភៅ សម្រាប់ប្រតិបត្តិរបស់ក្រុមនោះ។
សេចក្តីថ្លែងការណ៍របស់ស្ថានទូតម៉ាឡេស៊ី បានថ្លែងថា «ក្រុមហ៊ុនក្លែងក្លាយមួយ ដែលបើកដោយជនជាតិចិន បានជ្រើសរើសជនជាតិម៉ាឡេស៊ី ៤៧ នាក់នោះ»៕