.jpg)
ទិដ្ឋភាពសាលប្រជុំសភាសហភាពអឺរ៉ុបកាលពីម្សិលមិញ។ រូបថត ហ្វេសប៊ុកលោក សម រង្ស៊ី
ភ្នំពេញៈ សភាសហភាពអឺរ៉ុបពីម្សិលមិញបានធ្វើការថ្កោលទោសការចាប់ខ្លួន និងការចោទប្រកាន់អ្នកនយោបាយបក្សប្រឆាំង និងអ្នកសារព័ត៌មាននៅក្នុងប្រទេសកម្ពុជា, អ៊ូហ្គង់ដា និងមីយ៉ាន់ម៉ា។
បើតាមលទ្ធផលប្រជុំរបស់សមាជិកសភាសហភាពអឺរ៉ុបបានឲ្យដឹងកាលពីយប់មិញថា កម្ពុជាត្រូវតែទម្លាក់រាល់បទចោទប្រកាន់ប្រឆាំងនឹងអ្នកនយោបាយបក្សប្រឆាំងលោក កឹម សុខា។ ជាមួយគ្នានេះដែរសមាជិកសភាសហភាពអឺរ៉ុបក៏បានទាមទារឲ្យអាជ្ញាធរកម្ពុជាធ្វើការទម្លាក់បទចោទប្រកាន់ទៅលើលោក សម រង្ស៊ីផងដែរ។
ទោះជាយ៉ាងណាលោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថាបើទោះបីជាសភាសហភាពអឺរ៉ុបធ្វើការសម្រេចបែបណាក៏ដោយ ក៏វាមិនគ្របដណ្តប់មកលើអធិបតេយ្យភាពរបស់កម្ពុជានោះដែរ។
លោកស្រី Federica Mogherini តំណាងជាន់ខ្ពស់របស់សហភាពអឺរ៉ុប សម្រាប់កិច្ចការការបរទេសដែលជាបុគ្គលចុងក្រោយគេបានថ្លែងនៅក្នុងកិច្ចប្រជុំសភាអឺរ៉ុបកាលពីម្សិលមិញលោកស្រីបានអំពាវនាវឱ្យរដ្ឋាភិបាលកម្ពុជាផ្លាស់ប្តូរនិន្នាការ និងចាប់ផ្តើមការសន្ទនាជាមួយអ្នកនយោបាយបក្សប្រឆាំងឡើងវិញ។
លោកស្រីថ្លែងថា៖ «កាលពីឆ្នាំទៅវាបានបោះជំហានថយក្រោយយ៉ាងខ្លាំង សម្រាប់ប្រជាធិបតេយ្យដ៏ផុយស្រួយរបស់កម្ពុជាដែលមានគណបក្សគ្រប់គ្រងតែមួយមាននិន្នាការផ្តាច់ការនិយមដែលចាក់ឫសកាន់តែជ្រៅនៅក្នុងប្រទេសហើយកន្លែងសម្រាប់គណបក្សប្រឆាំង និងអង្គការសង្គមស៊ីវិលមិនត្រឹមតែថយចុះប៉ុណ្ណោះទេគឺត្រូវបានបិទតែម្តង»។
លោកស្រីបន្ថែមថា៖ «ការបោះឆ្នោតសកលកាលពីខែកក្កដាក្រោយការរំលាយគណបក្សប្រឆាំងដ៏ធំ គឺគណបក្សកាន់អំណាចបានឈ្នះអាសនៈសភាទាំងអស់។ ការបោះឆ្នោតនោះបានកើតឡើងនៅក្នុងបរិយាកាសតឹងតែងបំផុតគឺវាមិនតំណាងឱ្យឆន្ទៈលទ្ធិប្រជាធិបតេយ្យរបស់ប្រជាពលរដ្ឋកម្ពុជាទេ»។
លោកស្រីលើកឡើងថា៖ «ដូច្នេះហើយស្ថានការណ៍នោះគឺមិនមានលក្ខណៈប្រសើរទេ ហើយឥឡូវនេះយើងកំពុងគិតអំពីលទ្ធភាពនៃការចាត់វិធានការបន្ថែមដូចដែលលោកអ្នកដឹងស្រាប់ហើយថា វានឹងតម្រូវឱ្យមានក្រុមប្រឹក្សាមួយដើម្បីធ្វើការសម្រេចចិត្តរួមគ្នាលើបញ្ហានេះ»។
លោកស្រី Mogherini បន្តថាសហភាពអឺរ៉ុបបានគាំទ្រដល់ប្រទេសកម្ពុជា ចាប់តាំងពីបញ្ចប់សង្គ្រាមមកម្ល៉េះ ហើយពេលនេះសហភាពអឺរ៉ុបនៅតែគាំទ្រដល់ប្រទេសកម្ពុជាក្នុងការបង្កើតការងារ និងការបណ្ដុះបណ្ដាលវិជ្ជាជីវៈ។
លោកស្រីថ្លែងថា៖ «យើងចង់ឱ្យភាពជាដៃគូនេះនៅបន្តដើម្បីបន្តផ្តល់ផលប្រយោជន៍ដល់ប្រជាជនកម្ពុជា ប៉ុន្តែវាច្បាស់ណាស់ថា រដ្ឋាភិបាលកម្ពុជាត្រូវតែផ្លាស់ប្តូរនិន្នាការបច្ចុប្បន្ននេះចេញ បើមិនដូច្នេះទេ វានឹងមិនអាចទៅរួចឡើយ»។
លោកស្រី Mogherini ស្វាគមន៍ចំពោះការដោះលែងលោក កឹម សុខា ឲ្យនៅក្រៅឃុំបណ្តោះអាសន្នជាអ្វីដែលលោកស្រីបានលើកឡើងថាជាជំហានវិជ្ជមានទី ១ ទោះបីនៅមានលក្ខខណ្ឌដាក់កំហិតមួយចំនួនក្តី។
លោកស្រីបញ្ជាក់ថា៖ «ឥឡូវនេះយើងរំពឹងថានឹងមានការទម្លាក់ចោលរាល់ការចោទប្រកាន់ទាំងអស់ និងដកចេញនូវការដាក់កំហិតទាំងអស់លើរូបគាត់ដែរ ហើយយើងចង់ឲ្យនាយករដ្ឋមន្ត្រី និងមេដឹកនាំគណបក្សប្រឆាំងទាំងអស់ ចាប់ផ្តើមធ្វើការចរចាឆ្ពោះទៅមុខ»។
លោកស្រីបានទទូចឱ្យរដ្ឋាភិបាលកម្ពុជាទម្លាក់ចោលរាល់ការចោទប្រកាន់ដែលនៅសល់ទាំងអស់ជាអ្វីដែលលោកស្រីហៅថា «ជារឿងនយោបាយ» ប្រឆាំងនឹងសកម្មជនទាំងនោះ និងដកបម្រាមលើសកម្មភាពនយោបាយរបស់សមាជិកគណបក្សប្រឆាំងជាន់ខ្ពស់ទាំង ១១៨ រូប។
លោកស្រីក៏បានអំពាវនាវឱ្យរដ្ឋាភិបាលផ្តល់អាសនៈក្រុមប្រឹក្សាឃុំ សង្កាត់ដល់អតីតគណបក្សសង្គ្រោះជាតិឡើងវិញដែលបានជាប់ឆ្នោតកាលពីខែមិថុនាឆ្នាំមុនដែលមុខតំណែងទាំងនោះត្រូវបានបែងចែកទៅឲ្យគណបក្សដទៃ បន្ទាប់ពីគណបក្សសង្គ្រោះជាតិត្រូវបានរំលាយកាលពីខែវិច្ឆិកាឆ្នាំមុន។
លោកស្រីថ្លែងថា៖ «យើងក៏សូមអំពាវនាវដល់រដ្ឋាភិបាលកម្ពុជាផងដែរ ឲ្យធានាដល់អ្នកនយោបាយដែលនិរទេសខ្លួន សកម្មជនសង្គមស៊ីវិល និងអ្នកការពារសិទិ្ធមនុស្សទាំងអស់ឲ្យវិលត្រឡប់វិញដោយសុវត្ថិភាពដែលពួកគេបានរត់ភៀសខ្លួនចេញពីប្រទេស ដើម្បីគេចចេញពីការចាប់ខ្លួន»។
លោក សម រង្ស៊ី អតីតមេដឹកនាំគណបក្សប្រឆាំងក៏បានដឹកនាំមនុស្សមួយក្រុមទៅចូលរួមកិច្ចប្រជុំរបស់សភាសហភាពអឺរ៉ុបនេះផងដែរ។
ទោះយ៉ាងណាលោក សុខ ឥសាន អ្នកនាំពាក្យគណបក្សកាន់អំណាចថ្លែងថា បើទោះបីជាសភាសហភាពអឺរ៉ុបសម្រេចបែបណាក៏ដោយគឺមិនប៉ះពាល់ដល់កម្ពុជាទេ។
លោកថ្លែងថា៖ «សេចក្តីសម្រេចគឺជាសិទ្ធិរបស់ពួកគេដែលនៅក្រៅកម្ពុជា។ វាមិនគ្របដណ្តប់ទៅលើឯករាជភាព និងអធិបតេយ្យភាពរបស់កម្ពុជាទេព្រោះតុលាការកំពូលបានរំលាយអតីតបក្សប្រឆាំង មិនមានអ្វីអាចត្រឡប់ក្រោយវិញទេ។ បើមិនដូច្នោះទេតើយើងអាចទុកតុលាការកំពូលរបស់កម្ពុជានៅកន្លែងណា?»។
លោកថា៖ «បរិបទកម្ពុជាគឺនៅកម្ពុជា។ សភាអឺរ៉ុបមិនអាចគ្រប់គ្រងកម្ពុជា សភាកម្ពុជា និងតុលាការ»។
លោកបន្តថាសេចក្តីសម្រេចរបស់សហភាពអឺរ៉ុបធ្វើឡើងដោយអ្នកនយោបាយ។ «វាចម្រុះ វាមានលក្ខណៈសេដ្ឋកិច្ច វាចម្រុះជាមួយនយោបាយ ដើម្បីដាក់សម្ពាធមកលើកម្ពុជា។ តើឯណាទៅជាសិទ្ធិមនុស្ស ប្រជាធិបតេយ្យ? ពួកគេជាសមាជិកសភា ប៉ុន្តែពួកគេមិនយល់ច្បាប់នេះ ពួកគេគ្រាន់តែប្រើអំណាច ដើម្បីដាក់សម្ពាធទៅលើប្រទេសតូច និងទន់ខ្សោយ»។
ប៉ុន្តែលោក ព្រាប កុល នាយកប្រតិបត្តិនៃអង្គការតម្លាភាពកម្ពុជាថ្លែងថា ប្រសិនបើចំណុចទាំងអស់ត្រូវបានអនុម័ត វានឹងមានផលប៉ះពាល់។
លោកបន្តថា៖ «ភាសាដែលប្រើនៅក្នុងសំណើដំណោះស្រាយគឺខ្លាំងណាស់ជាមួយនឹងលក្ខខណ្ឌ និងការទាមទាររឹងមាំ។ ប្រសិនបើចំណុចទាំងអស់នោះត្រូវបានអនុម័តនៅក្នុងទម្រង់បច្ចុប្បន្ន វាច្បាស់ណាស់នឹងមានបច្ច័យទៅលើទំនាក់ទំនងរវាងកម្ពុជា និងសហភាពអឺរ៉ុបនៅក្នុងទាំងវិស័យពាណិជ្ជកម្មជំនួយហិរញ្ញវត្ថុ និងកិច្ចសហប្រតិបត្តិការទ្វេភាគី»។
លោកថ្លែងថាទោះយ៉ាងណារដ្ឋាភិបាលកម្ពុជាត្រូវបានផ្តល់ឲ្យនូវឱកាសឆ្លើយតបទៅនឹងការទាមទារទាំងនោះដើម្បីចៀសពីផលប៉ះពាល់អវិជ្ជមាននៅក្នុងរយៈពេលមធ្យម និងរយៈពេលវែង៕ NS/PS
