ភ្នំពេញៈ តំណាងរាស្ត្របម្រុងចំនួន ៣៨ រូបបានចូលស្បថកាន់តំណែង បន្ទាប់ពីរដ្ឋសភាដែលមាន ៧៧ សំឡេងរបស់គណបក្សប្រជាជនកម្ពុជា ប្រកាសទទួលស្គាល់ និងផ្តល់សុពលភាពជាតំណាងរាស្ត្រដល់ពួកគេ កាលពីម្សិលមិញ ដើម្បីចូលមកជំនួសតំណាងរាស្ត្រដែលលាលែងទៅកាន់តំណែងក្នុងរដ្ឋាភិបាល ខណៈអ្នកវិភាគលើកឡើងថានេះគឺជាការបែងចែកអំណាច។
លោក ហេង សំរិន ប្រធានរដ្ឋសភាថ្លែងក្នុងពិធីបើកសម័យប្រជុំលើកទី ១ ពីម្សិលមិញថាយោងតាមសេចក្តីសម្រេចចុះថ្ងៃទី ១២ ខែកញ្ញា ឆ្នាំ ២០១៨ របស់ គ.ជ.ប. និងយោងលិខិតចុះថ្ងៃទី ១២ ខែកញ្ញា ឆ្នាំ ២០១៨ របស់គណបក្សប្រជាជនកម្ពុជា និងយោងតាមការសម្រេចរបស់គណៈកម្មាធិការអចិន្រៃ្តយ៍រដ្ឋសភាដែលប្រជុំកាលពីថ្ងៃចន្ទទី ១៧ ខែកញ្ញាឆ្នាំ ២០១៨ រដ្ឋសភាសូមប្រកាសសុពលភាពបេក្ខជនជាប់ឆ្នោតជាតំណាងរាស្ត្រនៃនីតិកាលទី ៦ ដែលមាន ៣៨ រូប។
លោកបានបញ្ជាក់ថា៖ «ខ្ញុំសូមប្រកាសជាឱឡារិកថា ឈ្មោះបេក្ខជនជាប់ឆ្នោតជាតំណាងរាស្ត្រនីតិកាលទី ៦ ដែលគណៈកម្មាធិការជាតិរៀបចំការបោះឆ្នោត បានបញ្ជូនមកចំនួន ៣៨ រូបត្រូវបានសម្រេចអំពីសុពលភាពនៃអាណត្តិរបស់សមាជិកនីមួយៗនៅថ្ងៃពុធទី ១៩ ខែកញ្ញា ឆ្នាំ ២០១៨។ សូមអបអរសាទរ»។
លោក សុខ ឥសាន អ្នកនាំពាក្យគណបក្សប្រជាជនមានប្រសាសន៍ថា ការដាក់បញ្ចូលតំណាងរាស្ត្ររបស់គណបក្សប្រជាជនទាំង ៣៨ រូបនេះមិនមែនជាឈាមថ្មី និងមិនមែនអ្នកថ្មីទេសុទ្ធតែអ្នកនៅក្នុងសកម្មភាព និងចលនានយោបាយយូរមកហើយ។
លោកថ្លែងថា៖ «អ្នក ៣៨ ចេញទៅជួររាជរដ្ឋាភិបាល ឬស្ថាប័នណាផ្សេងក្រៅពីរដ្ឋសភាដូច្នេះអ្នកនៅលេខរៀងបន្តបន្ទាប់នៅក្នុងមណ្ឌលជាមួយគ្នាត្រូវឡើងមកជំនួសហើយវាជាស្វ័យប្រវត្តិមិនបានគិតថា ជាយុវជន ឬមិនយុវជនទេ ដូច្នេះនេះគឺជាការអនុវត្តត្រឹមត្រូវតាមនីតិវិធីដែលមានចែងនៅក្នុងច្បាប់បោះឆ្នោតជ្រើសតាំងតំណាងរាស្ត្រ»។
អ្នកវិភាគនយោបាយ និងជាប្រធានអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ មានប្រសាសន៍ថា៖ «[ការដាក់បញ្ចូលអ្នកថ្មី] វាជួយកុំឲ្យមានការងារច្រើនដោយសារគាត់ជារដ្ឋមន្ត្រីផង និង ជាតំណាងរាស្ត្រផងវាអាចធ្វើឲ្យខ្វះចន្លោះដូច្នេះវាអាចកាត់បន្ថយនូវទំនាស់ផលប្រយោជន៍រវាងតួនាទីជានីតិប្បញ្ញតិ្ត និងនៅនីតិប្រតិបត្តិ...ចៀសមិនរួចទេការបែងចែកលាភសក្ការៈ និងអំណាច»។
តំណាងរាស្ត្រដែលជាឈាមថ្មីរបស់គណបក្សប្រជាជនកម្ពុជាទាំង ៣៨ រូបជាឥស្សរជនដែលនឹងត្រូវទទួលស្គាល់ជាតំណាងរាស្ត្រថ្មីរួមមាន ខេត្តបាត់ដំបង គឺលោក ភូ ពុយ លោក សៀង ស៊ុតថង កំពង់ចាម គឺលោក ម៉ា ឈឿន លោក អ៊ី សំអុល លោកស្រី ស្រី គីមឆយ លោកស្រី ខុន ស៊ុនអេង និងលោកស្រី កុល ធារិន កំពង់ឆ្នាំង មាន លោកស្រី កែ ច័ន្ទមុនី លោក ឌួង សុវ៉ាង កំពង់ស្ពឺ លោក អ៊ូ សំអួន លោក សំ រិទ្ធី លោក ជួន វន កំពង់ធំ លោកស្រី លឹម ផល្លា កណ្តាលលោក ង៉ោ សុវណ្ណ លោក អ៊ុក ដាមរី លោក សុះ មុះសិន លោក ជឹម សុខខុន លោក ទី សុគន្ធ ក្រចេះលោកស្រី ស៊ុន សាភឿន ភ្នំពេញលោក សួន រិនឌី លោក ឃុត ចាន់ដារ៉ា លោកស្រី ម៉ក់ វណ្ណស៊ីថា លោកស្រី ម៉ាណ ណាវី ព្រៃវែង លោក ជាម ប៉េអា លោក ទេព សាម៉នជីវ័ន លោក ថោង វរលក្ខណ៍ លោក ខៀវ ភារិទ្ធ ពោធិ៍សាត់ លោក សារី កោសល្យ លោក រ៉ូហ្វី អូស្មាន លោក ខូយ សុខា ព្រះសីហនុ លោក នេន ម៉ាល័យ លោក តាក វណ្ណថា តាកែវ លោក អ៊ុត សុខ កែប លោក ងួន បៀន ឧត្តរមានជ័យ លោក នៅ សំ និងខេត្តត្បូងឃ្មុំ លោក យិន ប៊ុនណាង និងលោក សន សារ៉ាណា។
ឥស្សរជនដែលសុំឈប់ពីសមាជិកសភារួមមានលោក អង្គ វង្សវឌ្ឍានា លោក សក់ សេដ្ឋា លោក ខៀវ កាញារីទ្ធ លោក ហង់ ជួនណារ៉ុន លោក វេង សាខុន លោក ប៉ាន សូរស័ក្តិ លោក លូ គឹមឈន់ លោក អ៊ុក រ៉ាប៊ុន លោក ត្រាំ អ៊ីវតឹក លោក ឆាយ ថន លោកស្រី ខេង សំរ៉ាដា លោក រិន វីរៈ លោក ថោង ខុន...ដែលឥស្សរជនទាំងនោះជាមន្ត្រីជើងចាស់ក្នុងរដ្ឋាភិបាលចាស់ផងដែរ៕