.jpg)
សមាជិកអតីតគណបក្សសង្គ្រោះជាតិដែលតុលាការរំលាយ និងសកម្មជនបក្សនេះកាលពីថ្ងៃព្រហស្បតិ៍ម្សិលមិញ បានរួមគ្នាបង្កើតគណបក្សនយោបាយថ្មីមួយឈ្មោះគណបក្ស «ខ្មែរស្រឡាញ់ជាតិ»។ ហេង ជីវ័ន
ភ្នំពេញៈ សមាជិកអតីតគណបក្សសង្គ្រោះជាតិដែលតុលាការរំលាយ និងសកម្មជនបក្សនេះកាលពីថ្ងៃព្រហស្បតិ៍ម្សិលមិញបានរួមគ្នាបង្កើតគណបក្សនយោបាយថ្មីមួយឈ្មោះគណបក្ស «ខ្មែរស្រឡាញ់ជាតិ» ជាអ្វីដែលពួកគេអះអាងថា ដើម្បីបន្តគោលជំហរអតីតគណបក្សសង្គ្រោះជាតិ និងដើម្បីចូលរួមការបោះឆ្នោតនាពេលខាងមុខ។
លោក តាន់ ទីន សមាជិកម្នាក់ក្នុងចំណោមស្ថាបនិក ៨ នាក់ ថ្លែងក្នុងសន្និសីទកាសែតកាលពីម្សិលមិញថា ការបង្កើតគណបក្សនេះធ្វើឡើងបន្ទាប់ពីក្រុមរបស់លោកបានចុះជួបជាមួយប្រជាពលរដ្ឋ និងសកម្មជនអតីតគណបក្សសង្គ្រោះជាតិ អ្នកស្នេហាជាតិ អ្នកប្រជាធិបតេយ្យ ហើយពួកគេសំណូមពរឲ្យមានការបង្កើតគណបក្សនយោបាយថ្មីមួយ។
លោកថ្លែងថា៖ «ដោយយើងទាំងអស់គ្នាយល់ឃើញថាស្ថានភាពនយោបាយនាពេលបច្ចុប្បន្នមានការធ្លាក់ចុះនូវសំឡេងដែលមាននិន្នាការប្រឆាំងជាមួយគណបក្សកាន់អំណាច និងការបែកបាក់យ៉ាងខ្លាំងរវាងអ្នកប្រកាន់លទ្ធិប្រជាធិបតេយ្យជាហេតុធ្វើឲ្យមានការព្រួយបារម្ភយ៉ាងខ្លាំងសម្រាប់យើងទាំងអស់គ្នា»។
យោងតាមសេចក្តីថ្លែងការណ៍គណបក្សនេះបង្កើតក្នុងគោលបំណងបន្តគោលដៅស្មារតីសង្គ្រោះជាតិ បង្កើតវប្បធម៌នយោបាយថ្មីបង្រួបបង្រួមអ្នកស្នេហាជាតិ និងអ្នកប្រជាធិបតេយ្យ ផ្សះផ្សាជាតិ និងតស៊ូមតិតាមគោលការណ៍លទ្ធិប្រជាធិបតេយ្យ។
លោក ខឺយ ស៊ីនឿន ស្ថាបនិកម្នាក់ទៀតបញ្ជាក់ថា ក្រុមស្ថាបនិកទើបតែដាក់ពាក្យសុំបង្កើតបក្សនេះនៅក្រសួងមហាផ្ទៃកាលពីព្រឹកម្សិលមិញ ហើយនិងបន្តធ្វើតាមនីតិវិធីដែលក្រសួងតម្រូវរួមមានការដាក់សមាសភាពថ្នាក់ដឹកនាំ ការបញ្ជូនសំឡេងគាំទ្រចំនួន ៤ ០០០ សំឡេង ជាដើម។
លោក ឯម សុវណ្ណារ៉ា អ្នកវិភាគនយោបាយ ថ្លៃងថា គណបក្សថ្មីនេះទំនងជាមានវាសនាមិនខុសពីគណបក្សនយោបាយក្រៅរដ្ឋាភិបាលផ្សេងទៀតទេគឺមិនទំនងទទួលបានការគាំទ្រពីពលរដ្ឋទេ។ «ខ្ញុំគិតថា ពួកគេមិនអាចកៀរគរ ឬមានប្រជាប្រិយភាពដែលទទួលបានការគាំទ្រពីប្រជាពលរដ្ឋទេ ពីព្រោះពេលអវត្តមានគណបក្សសង្គ្រោះជាតិនោះមានបក្សច្រើនគឺមាន ១៩ គណបក្ស ក្រៅពីគណបក្សកាន់អំណាច តែអត់ឃើញមានបក្សណាមានអាសនៈនៅសភាទេ»៕
វីដេអូ៖
