.jpg)
សមាជិកអតីត CNRP ២ នាក់ ដែលត្រូវបានចាប់ខ្លួនបញ្ជូនទៅតុលាការពីបទប្រមាថព្រះមហាក្សត្រ។ រូបថត ហ្វេសប៊ុក
បាត់ដំបងៈ សមាជិកនៃអតីតគណបក្សសង្គ្រោះជាតិខេត្តបាត់ដំបង ២ នាក់ ត្រូវបានសមត្ថកិច្ចឃាត់ខ្លួនកាលពីថ្ងៃសៅរ៍ និងអាទិត្យ និងបញ្ជូនមកសាលាដំបូងរាជធានីភ្នំពេញពាក់ព័ន្ធនឹងការប្រមាថចំពោះអង្គព្រះមហាក្សត្រ។
អ្នកដែលត្រូវបានចាប់ខ្លួនទាំង ២ មានឈ្មោះ គង់ ប៊ុនហ៊ាង អាយុ ៦៦ ឆ្នាំ និងឈ្មោះ ហង្ស សេង អាយុ ៦៩ ឆ្នាំ។ អ្នកទាំង ២ រស់នៅឃុំកំពង់ព្រះ និងឃុំអន្លង់វិល ស្រុកសង្កែ ខេត្តបាត់ដំបង និងជាអតីតសមាជិកគណៈកម្មការប្រតិបត្តិបក្សប្រចាំខេត្តបាត់ដំបង។ លោក គង់ ប៊ុនហ៊ាង ត្រូវបានឃាត់ខ្លួននៅល្ងាចថ្ងៃសោរ៍ ចំណែកលោក ហង្ស សេង ត្រូវបានឃាត់ខ្លួននៅព្រឹកថ្ងៃអាទិត្យ។ នេះបើតាមលោក ឌឹម សារឿន អតីតសមាជិកក្រុមប្រឹក្សាខេត្តបាត់ដំបងនៃអតីតគណបក្សសង្គ្រោះជាតិ។
លោក ឌឹម សារឿន និយាយថា លោកមិនច្បាស់អំពីមូលហេតុនៃការឃាត់ខ្លួនទេ ដោយសារតែអ្នកទាំង ២ មិនបានធ្វើសកម្មភាពអ្វីក្រោយគណបក្សសង្គ្រោះជាតិត្រូវបានរំលាយ ហើយអ្នកទាំង ២ មិនមែនជាអ្នកសកម្មលើបណ្ដាញសង្គមទេ។
លោក លឹម ពុទ្ធីឡា ស្នងការរងផែនការងារព្រហ្មទណ្ឌនៃស្នងការដ្ឋាននគរបាលខេត្តបាត់ដំបងបានបញ្ជាក់ថា ពិតជាមានការចាប់ខ្លួនមនុស្សទាំង ២ នាក់នេះមែន ហើយបញ្ជូនមករាជធានីភ្នំពេញកាលពីថ្ងៃអាទិត្យ។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិមិនអាចសុំការបញ្ជាក់បានទេកាលពីម្សិលមិញ ប៉ុន្តែលោកបានថ្លែងប្រាប់វិទ្យុអាស៊ីសេរីថា អ្នកទាំង ២ ត្រូវបានចាប់តាមដីកាពាក់ព័ន្ធនឹងការប្រមាថចំពោះអង្គព្រះមហាក្សត្ស។
លោក គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់ថា អ្នកទាំង ២ ត្រូវបានបញ្ជូនមកដល់តុលាការហើយ ដោយលោកព្រះរាជអាជ្ញា សេង ហៀង កំពុងសាកសួរ។
យោងតាមរដ្ឋធម្មនុញ្ញជំពូក ២ មាត្រា ៧ បានចែងយ៉ាងច្បាស់ថា អង្គព្រះមហាក្សត្រ មិនអាចនរណារំលោភបំពានបានឡើយ។ កាលពីឆ្នាំ ២០១៨ មាត្រា ៤៣៧ នៃក្រមព្រហ្មទណ្ឌត្រូវបានធ្វើវិសោធនកម្មដោយចែងលម្អិតអំពីបទ «ប្រមាថចំពោះអង្គព្រះមហាក្សត្រ»។ យោងតាមមាត្រា ៤៣៧ (ស្ទួន) អ្នកប្រមាថចំពោះអង្គព្រះមហាក្សត្រត្រូវផ្ដន្ទាទោសដាក់ពន្ធនាគារពី ១ ឆ្នាំទៅ ៥ ឆ្នាំ និងពិន័យប្រាក់ពី ២ លានទៅ ១០ លានរៀល៕
