.jpg)
លោក វឌ្ឍនាសាប៊ុង ក្នុងកិច្ចប្រជុំចោទសួរលោក ស៊ុន ចាន់ថុល ពីការធ្វើផ្លូវ ម្សិលមិញនាវិមានសន្តិភាព។ រូបថត William Guang
ភ្នំពេញៈ ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង ជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ពីម្សិលមិញបានកោះហៅលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនមកសាកសួរជុំវិញបញ្ហាធ្វើផ្លូវរួចទើបបានដាក់លូ ធ្វើលូរួច ទើបបានធ្វើផ្លូវ និងបញ្ហាក្រុមហ៊ុនដឹកជញ្ជូនដែលដឹកលើសទម្ងន់បំផ្លាញផ្លូវ។
ជំនួបសួរដេញដោលនេះគណៈប្រតិភូក្រសួងសាធារណការ និងដឹកជញ្ជូន ដែលដឹកនាំដោយលោក ស៊ុន ចាន់ថុល បានចូលមកបំភ្លឺ និងធ្វើបទបង្ហាញនានាជុំវិញវឌ្ឍនភាព និងសមិទ្ធផលរបស់ក្រសួងក្រោមក្របខ័ណ្ឌរបស់ឧត្តមក្រុមប្រឹក្សាពិគ្រោះ និងផ្ដល់យោបល់នៅទីស្ដីការនាយករដ្ឋមន្ត្រីដោយមានសមាជិក និងតំណាងគណបក្សចំនួន ១៧ គណបក្សចូលរួមស្ដាប់។
លោក សុខសុវណ្ណ វឌ្ឍនាសាប៊ុង បានដាក់ចេញនូវសំណួរជាច្រើនជុំវិញបញ្ហាធ្វើផ្លូវថ្នល់ពុំមានគុណភាពអំពើកិបកេងក្នុងការសាងសង់ផ្លូវថ្នល់បញ្ហាធ្វើផ្លូវខាងមុខខូចផ្លូវខាងក្រោយ។ ការធ្វើផ្លូវរួចបានកាយផ្លូវដាក់លូ បញ្ហារថយន្តធុនធំដឹកលើសទម្ងន់បំផ្លាញផ្លូវបំផ្លាញប្រយោជន៍សាធារណៈ ដើម្បីចំណេញតែក្រុមហ៊ុន និងបញ្ហាមួយចំនួនទៀតក្រោមសមត្ថកិច្ចនៃការគ្រប់គ្រងរបស់ក្រសួងសាធារណការ និងដឹកជញ្ជូន។
បើតាមមេបក្សរូបនេះថាលោកបានចោទជាសំណួរជុំវិញបញ្ហាក្រុមហ៊ុនដឹកជញ្ជូន និងរថយន្តធុនធំដែលដឹកលើសទម្ងន់បំផ្លាញផ្លូវ ដោយសារមន្ត្រីទទួលខុសត្រូវនៅប្រចាំទីតាំងជញ្ជីងថ្លឹងរថយន្ត នោះប្រព្រឹត្តអំពើពុករលួយ ដែលជារឿយៗរដ្ឋទទួលចំណូលតិចពីក្រុមហ៊ុន។ រីឯមន្ត្រីឃុបឃិតគ្នា ដើម្បីទទួលផលប្រយោជន៍ពីបុគ្គល និងបក្ខពួកប៉ុន្ដែបានបំផ្លាញផលប្រយោជន៍សាធារណៈទាំងមូល ខណៈតម្លៃអាជ្ញាបណ្ណដែលរដ្ឋផ្ដល់ឲ្យបានចំណូលតែ ២០ លានរៀលក្នុង ១ ឆ្នាំ តែរដ្ឋខាតបង់រាប់រយលានដុល្លារសម្រាប់ធ្វើផ្លូវឡើងវិញ។
លោកបញ្ជាក់ថា៖ «យើងបានសួរនាំគាត់ច្រើនសំណួរជុំវិញបញ្ហាធ្វើផ្លូវថ្នល់ពុំមានគុណភាពអំពើកិបកេងក្នុងការសាងសង់ផ្លូវថ្នល់បញ្ហាធ្វើផ្លូវខាងមុខ ខូចផ្លូវខាងក្រោយ ការធ្វើផ្លូវរួចបានកាយផ្លូវដាក់លូ។ បញ្ហារថយន្តធុនធំដឹកលើសទម្ងន់បំផ្លាញផ្លូវ ប៉ុន្ដែលោករដ្ឋមន្ត្រីក៏ទទួលស្គាល់ពីការខ្វះចន្លោះទាំងនេះ ហើយគាត់សន្យាដោះស្រាយឲ្យបានឆាប់ និងចាត់វិធានការមន្ត្រីខិលខូចមួយចំនួននោះ»។
នៅចំពោះមុខសមាជិកឧត្តមក្រុមប្រឹក្សាពិគ្រោះ និងផ្តល់យោបល់ពីម្សិលមិញ លោក ស៊ុន ចាន់ថុល ថ្លែងថាបញ្ហាធ្វើផ្លូវរួចទើបបានដាក់លូ ធ្វើលូរួច ទើបបានធ្វើផ្លូវកន្លងមកនេះដោយសារកញ្ចប់ថវិកាមានកម្រិតពោលគឺរដ្ឋគ្មានថវិកាគ្រប់គ្រាន់ក្នុងការធ្វើទាំងលូ និងធ្វើផ្លូវព្រមគ្នាទេ ទើបធ្វើផ្លូវជាមុនសិន។ រហូតទទួលបានថវិកាបន្ថែម ទើបធ្វើលូតាមក្រោយទៀត។ ប៉ុន្ដែសព្វថ្ងៃនេះ ក្រសួងកំពុងដោះស្រាយ និងមានការវិវឌ្ឍល្អប្រសើរហើយ។
លោក ចាន់ថុល បន្តថា ចំពោះព័ត៌មានដែលថាមានមន្ត្រីប្រព្រឹត្តអំពើពុករលួយតាមទីតាំងជញ្ជីងថ្លឹងរថយន្តដឹកលើសទម្ងន់នេះ លោកបានទទួលស្គាល់ថា ពិតជាមានមែន។ ប៉ុន្ដែលោកបាន និងកំពុងធ្វើការកែទម្រង់ ក៏ដូចជាចាប់ឲ្យអស់មន្ត្រីបំពានច្បាប់ ដកតំណែងអ្នកថ្លឹងរថយន្តដែលទទួលសំណូកពីបទល្មើសដោយគ្រោងនឹងបង្កើតជញ្ជីងឆ្លាតវៃបន្ថែម ដើម្បីដោះស្រាយបញ្ហានេះឲ្យទាន់ពេលវេលា។
លោករដ្ឋមន្ត្រីក៏បានសន្យាទទួលយកចំណុចខ្វះចន្លោះទាំងនេះ និងធានាថា នឹងធ្វើការកែប្រែឲ្យបានឆាប់ៗបំផុត។ ដោយឡែកចំពោះបញ្ហាធ្វើផ្លូវខាងមុខ ខូចផ្លូវខាងក្រោយនេះលោកបានបង្ហាញពីកង្វល់ និងសុំពេលបន្ថែម ដើម្បីដោះស្រាយជាបន្តបន្ទាប់។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថា ប្រសិនបើរដ្ឋាភិបាលចង់កែលម្អគុណភាពផ្លូវ និងកាត់បន្ថយអំពើពុករលួយនៅក្នុងវិស័យសាងសង់ផ្លូវនេះ គេត្រូវពិនិត្យទៅលើទិដ្ឋភាពច្បាប់ស្ដីពីលទ្ធកម្មសាធារណៈ នីតិវិធីលទ្ធកម្មសាធារណៈនៅក្នុងគម្រោងសាងសង់មានចែងនៅក្នុងច្បាប់ស្ដីពីផ្លូវថ្នល់ ហើយក៏ជ្រុងមួយដ៏សំខាន់នៅក្នុងច្បាប់ស្ដីពីលទ្ធកម្មសាធារណៈដែរ។ ដូច្នេះដើម្បីកែទម្រង់បញ្ហានេះគេត្រូវពិនិត្យទៅលើច្បាប់ និងគោលនយោបាយជាមុនសិន។
លោកបន្តថា ប្រសិនបើមានច្បាប់ល្អ និងការអនុវត្តល្អគឺគម្រោងសាងសង់ និងគុណភាពផ្លូវក៏ល្អប្រសើរដែរ ប៉ុន្ដែជាក់ស្ដែងច្បាប់ស្ដីពីលទ្ធកម្មកម្ពុជានាពេលនេះ គួរតែធ្វើវិសោធនកម្មត្រង់ចំណុចខ្លះ ដើម្បីបើកច្រកឲ្យមានការចូលរួមក្នុងការតាមដានទៅលើគម្រោងសាងសង់ហេដ្ឋារចនាសម្ព័ន្ធសាធារណៈឲ្យបានល្អ។
លោកថា៖ «យើងមើលឃើញកង្វះខាតការចូលរួមឃ្លាំមើលលទ្ធកម្មសាធារណៈ និងគម្រោងសាធារណៈហើយយើងក៏តែងតែបណ្ដែតបណ្ដោយការខ្វះចន្លោះនៃការអនុវត្តច្បាប់ដែលធ្វើឲ្យមន្ត្រីខិលខូចមានឱកាសក្នុងការប្រព្រឹត្តអំពើពុករលួយ កិបកេងគុណភាពផ្លូវថ្នល់ និងយើងក៏តែងបណ្ដោយឲ្យមានបទល្មើសដឹកលើសទម្ងន់ដែលនាំឲ្យឆាប់ខូចផ្លូវ។ ដូច្នេះក្រសួងត្រូវតែបើកឱកាសឲ្យអ្នកជំនាញឃ្លាំមើលសកម្មភាពការអនុវត្តច្បាប់របស់មន្ត្រី និងត្រូវធ្វើវិសោធនកម្មច្បាប់ស្ដីពីលទ្ធកម្មសាធារណៈ»។
លោក ប៉ាល់ ចន្ទតារា អ្នកនាំពាក្យ និងជារដ្ឋលេខាធិការក្រសួងសាធារណការ និងដឹកជញ្ជូនថ្លែងថា សមាជិកឧត្តមក្រុមប្រឹក្សាពិគ្រោះ និងផ្តល់យោបល់បានសួរដេញដោលច្រើនសំណួរជុំវិញវឌ្ឍនភាព និងការអនុវត្តការងាររបស់ក្រសួងសាធារណការមួយចំនួន ប៉ុន្ដែលោក ស៊ុន ចាន់ថុល បានឆ្លើយបំភ្លឺជូនរួចរាល់អស់ហើយ។
លោកបន្តថា ជុំវិញការចោទសួរពីបញ្ហាធ្វើផ្លូវកន្លងមកនេះគឺដោយសារកាលពីដំបូងឡើយ រដ្ឋាភិបាលចង់បែងចែកថវិកាពង្រីកគម្រោងធ្វើផ្លូវឲ្យបានច្រើនគម្រោង រហូតដល់ជនបទដោយមិនទាន់គិតគូរពីគុណភាពនៅឡើយ ដោយមិនបានដូចនូវអ្វីដែលហៅថា ស្ដង់ដាទេ។ ប៉ុន្ដែក្នុងដំណាក់កាលនេះ ក្រសួងចាប់ផ្ដើមគិតគូរពីគុណភាពផ្លូវគុណភាពការងាររបស់មន្ត្រី និងពង្រឹងការអនុវត្តច្បាប់។
លោកបានបញ្ជាក់ថា៖ «ចំពោះការរិះគន់ថា មានមន្ត្រីដែលបម្រើការងារនៅតាមទីតាំងជញ្ជីងថ្លឹងរថយន្តបានប្រព្រឹត្តភាពមិនប្រក្រតីនោះ គឺពេលនេះ យើងបានធ្វើការកែទម្រង់អស់ហើយតាមរយៈការផ្លាស់ប្ដូរសមាសភាពការងារ។ ប្ដូរពីកន្លែង ១ ទៅកន្លែង ១ ទៀតដោយបានរៀបចំរចនាសម្ព័ន្ធថ្មីហើយ។ កាលពីមុនយើងពិតជាមានកន្លែងខ្វះចន្លោះ តែឥឡូវនេះយើងបានរៀបចំល្អហើយ»៕
វីដេអូ៖
