The Phnom Penh Post Search

Search form




Logo of Phnom Penh Post newspaper Phnom Penh Post - សមាជិក​ព្រឹទ្ធសភា ហុង សុខហួរ ត្រូវ​បាន​ចាប់​ខ្លួន​បញ្ជូន​ទៅ​តុលាការ

សមាជិក​ព្រឹទ្ធសភា ហុង សុខហួរ ត្រូវ​បាន​ចាប់​ខ្លួន​បញ្ជូន​ទៅ​តុលាការ

Content image - Phnom Penh Post
សមាជិក​ព្រឹទ្ធសភា​​មកពី​គណបក្ស​ សម រង្ស៊ី លោក ហុង សុខហួរ ត្រូវ​បាន​កង​កម្លាំង​ចម្រុះ​ដ៏ច្រើន ចាប់​ក្រៀក​ ស្លាប​សេក វ៉ៃខ្នោះកាលពីព្រឹកមិញ។ រូបថត សហការី

សមាជិក​ព្រឹទ្ធសភា ហុង សុខហួរ ត្រូវ​បាន​ចាប់​ខ្លួន​បញ្ជូន​ទៅ​តុលាការ

ភ្នំពេញ៖ សមាជិក​ព្រឹទ្ធសភា​​មកពី​គណបក្ស​ សម រង្ស៊ី លោក ហុង សុខហួរ ដែល​ត្រូវ​បាន​ចោទ​ថា «ក្បត់​ជាតិ» ដោយ​លោក​នាយក​រដ្ឋ​មន្ត្រី ហ៊ុន សែន កាល​ពី​ថ្ងៃ​ពីរ​ថ្ងៃ​មុន ត្រូវ​បាន​ចាប់​ខ្លួន​ហើយ នៅ​ម៉ោង​ប្រមាណ​ជា ៦ ព្រឹក​ថ្ងៃ​សៅរ៍​នេះ នៅ​គេហដ្ឋាន​​ របស់​តំណាង​រាស្ត្រ​គណបក្ស​សង្រ្គោះ​ជាតិ​ម្នាក់។

លោក ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ បាន​បញ្ជាក់​ប្រាប់​ភ្នំពេញ ប៉ុស្តិ៍ ភ្លាមៗ​ថា «វាជា​ការ​ពិត សមត្ថកិច្ច​បាន​ធ្វើ​ការ​ចាប់​ខ្លួន​​​គាត់រួច​​ហើយ។ ពួក​យើង​នឹង​បញ្ជូន​គាត់ ទៅ​តុលាការ ហើយ​ចំពោះ​ការ​ចោទ​ប្រកាន់ អាស្រ័យ​លើ​ការ​សម្រេច​របស់​តុលាការ»។

សមត្ថកិច្ច​បាន​ធ្វើ​ការ​ឡោម​ព័ទ្ធ​ផ្ទះ​របស់ លោក យន្ត ថា​រ៉ូ តំណាងរាស្ត្រ​គណបក្ស​សង្គ្រោះ​ជាតិ មណ្ឌល​ខេត្ត​បន្ទាយ​មានជ័យ ​ស្ថិត​នៅ​ផ្ទះ​លេខ​១០៦A ផ្លូវ​២០១១ ភូមិ​គោក​ឃ្លាង សង្កាត់​ភ្នំពេញ​ថ្មី ខណ្ឌ​សែន​សុខ តាំង​ពី​ល្ងាច​ថ្ងៃ​សុក្រ​មិ្សល​មិញ មុន​ពេល​ឈាន​ដល់​ការ​ចាប់​ខ្លួន​នៅ​ព្រឹក​ព្រលឹម​នេះ។

លោក ហុង សុខហួរ ត្រូវ​បាន​កង​កម្លាំង​ចម្រុះ​ដ៏ច្រើន ចាប់​ក្រៀក​ ស្លាប​សេក វ៉ៃខ្នោះ នាំ​ចេញ​ពី​គេហដ្ឋាន និង​បាន​ចាប់​បញ្ជូន​ចូល​ក្នុង​រថយន្ត SUV។

សមាជិក​ព្រឹទ្ធសភា​រូប​នេះ បាន​ធ្វើ​លាក់​ខ្លួន ចាប់​តាំង​ពី​លោក​នាយក​រដ្ឋមន្ត្រី ហ៊ុន សែន បញ្ជារ​ឲ្យ​ចាប់​ខ្លួន​លោក​ភ្លាមៗ ក្នុង​សុន្ទរកថា​មួយ​កាល​ពី​ព្រឹក​ថ្ងៃ​ព្រហស្បតិ៍ សប្តាហ៍​នេះ ដោយ​ចោទ​ថា លោក​បាន​ប្រព្រឹត្ត​អំពើ​​ក្បត់​ជាតិ​ដោយសារ​តែ​គាត់​​បាន​បង្ហោះ​ សន្ធិសញ្ញា​ «​ក្លែង​ក្លាយ​» លើ​បណ្តាញ​សង្គម​ដែល​ទាក់ទង​នឹង​ព្រំដែន​កម្ពុជា​-វៀតណាម​។

សូម​បញ្ជាក់​ថា ខណៈ​ដែល​លោក ហុង សុខហួរ នៅ​មាន​អភ័យ​ឯកសិទ្ធិ ជា​តំណាង​រាស្ត្រ​ព្រឹទ្ធសភា មន្ត្រី​ប៉ូលិស​ជាន់​ខ្ពស់ បាន​ប្រាប់​ភ្នំពេញ ប៉ុស្តិ៍​កាល​ពី​ម្សិល​មិញ​ថា ដីកា​តាម​ចាប់​ខ្លួន​ត្រូវ​បាន​បញ្ជូន​ទៅ​គ្រប់​ខេត្ត ក្រុង​អស់​ហើយ គឺ​ប៉ុន្មាន​ម៉ោង​បន្ទាប់​ពី​ការ​បញ្ជារ​របស់​លោក​នាយក​រដ្ឋ​មន្ត្រី ហើយ​​ថា លោក សុខហួរ នឹង​ត្រូវ​បាន​ចាប់​ខ្លួន​ភ្លាមៗ ទោះ​ជា​មាន​អភ័យឯក​សិទ្ធិ​ក៏​ដោយ ព្រោះ​ជា​បទល្មើស​ព្រហ្មទណ្ឌ​ជាក់​ស្តែង។

មាត្រា ១០៤ នៃ​រដ្ឋធម្មនុញ្ញ​កម្ពុជា​ថ្លែង​ថា៖​ «សមាជិក​ព្រឹទ្ធសភា​មាន​អភ័យ​ឯកសិទ្ធិ​តំណាងរាស្រ្ត​​។ គ្មាន​សមាជិក​ព្រឹទ្ធសភា​ណា​ត្រូវ​បាន​​កាត់​ទោស ឃុំ​ខ្លួន ឬ​ចាប់​ខ្លួន​ដោយសារ​តែ​មតិយោបល់​ដែល​សម្តែង​ចេញ​ក្នុង​ការ​អនុវត្ត​ករណីយ​ កិច្ច​របស់​ខ្លួន​ទេ​»។ ករណី​លើក​លែង​គឺ​បទល្មើស​ជាក់ស្តែង​។ មាត្រា ៨០ ប្រើ​ភាសា​ដូច​គ្នា​ទាក់ទង​នឹង​សមាជិក​រដ្ឋសភា។

ក្នុង​ស្ថាប័ន​ព្រឹទ្ធសភា​ ​សំឡេង​​របស់​គណបក្ស​ប្រជាជន​មាន​លើស​ពី ២ ភាគ ៣ គឺ​មិន​លំបាក​ទេ​​​ដើម្បី​ដក​អភ័យ​ឯកសិទ្ធិ​ ផ្តន្ទាទោស ដែល​អាច​នឹង​ធ្វើ​ឡើង​នា​ពេល​ខាង​មុខ។ ព្រឹទ្ធសភា​អាច​កោះ​ប្រជុំ​សមាជិក​ ព្រឹទ្ធសភា​បាន ​លុះត្រាតែ​មាន​សំណើ​ពី​ក្រសួង​យុត្តិធម៌​៕

អត្ថបទគួរចាប់អារម្មណ៍