ភ្នំពេញៈ ថ្នាក់ដឹកនាំ និងសមាជិកនៃសហភាពសហព័ន្ធយុវជនកម្ពុជាប្រមាណជា ១៣០០ នាក់បានប្រមូលផ្ដុំគ្នានៅក្នុងពិធីបើកមហាសន្និបាតនៅសណ្ឋាគារសុខាភ្នំពេញកាលពីម្សិលមិញដែលជាការប្រជុំ ២ ថ្ងៃដើម្បីសរុបការងារឆ្នាំ ២០១២-២០១៨ និងទិសដៅការងារឆ្នាំ ២០១៨-២០២០ និងការបោះឆ្នោតជ្រើសតាំងសមាជិក និងការអនុម័តលើការកែប្រែលក្ខន្តិកៈនៃសហភាពសហព័ន្ធយុវជនកម្ពុជាផងដែរ។
លោក សាយ ឈុំ ប្រធានព្រឹទ្ធសភាជាអធិបតីក្នុងការបើកសន្និបាតកាលពីម្សិលមិញបានថ្លែងទៅកាន់អង្គប្រជុំថា សមិទ្ធផលរបស់សហភាពសហព័ន្ធយុវជនកម្ពុជានាពេលកន្លងមកបានចូលរួមក្នុងសកម្មភាពសង្គម សេដ្ឋកិច្ច នយោបាយ ដោយធ្វើឡើងមិនប្រកាន់និន្នាការនយោបាយ។
លោក សាយ ឈុំ ថ្លែងថា៖ «ខ្ញុំបានសង្កេតឃើញថា ស.ស.យ.ក បានដើរតួនាទីយ៉ាងសំខាន់ក្នុងចលនាយុវជន ដើម្បីចូលរួមក្នុងសកម្មភាពក្នុងសង្គម សេដ្ឋកិច្ច នយោបាយ ចូលរួមអនុវត្តគោលនយោបាយនានារបស់រាជរដ្ឋាភិបាលកម្ពុជានៅតាមវិស័យ និងគ្រប់មូលដ្ឋាននៅទូទាំងប្រទេស និងព្រមទាំងបានចូលរួម ចំណែកពិសេសក្នុងការលើកស្ទួយ មោទនភាពជាតិ និងកិត្យានុភាពជាតិនៅលើឆាកអន្តរជាតិ។ បានផ្តល់នូវផលប្រយោជន៍ដោយផ្ទាល់ដល់យុវជន និងសង្គមកម្ពុជាដោយមិនប្រកាន់និន្នាការនយោបាយ និងជីវភាពសង្គមហើយ ស.ស.យ.ក គឺជាវេទិកាដ៏ទូលំទូលាយសម្រាប់យុវជនទាំងអស់គ្នាចូលរួមក្នុងគោលដៅលើកកម្ពស់សុខភាពយុវជន ការសិក្សា និងការរកការងារធ្វើ»។
លោក មាស នី អ្នកវិភាគ និងជាអ្នកឃ្លាំមើលផ្នែកអភិវឌ្ឍន៍សង្គមបានអះអាងថាការរើសអើង និងប្រកាន់និន្នាការនយោបាយនៅតែមាន។
លោកថ្លែងថា៖ «នៅពេលដែលយើងបង្ខំគេឲ្យចូលរួមជាមួយយើងហើយបញ្ឆេះយុវជនឲ្យឈ្លោះគ្នាឲ្យស្អប់យុវជនក្រុមដទៃទៀត ហើយយើងឃើញករណីទាំងនេះកើតឡើងជាញឹកញាប់នៅតាមមូលដ្ឋាន»។
ស.ស.យ.ក មានគោលដៅដើម្បីប្រមូលផ្តុំយុវជនគ្រប់ទិសទីជាមហាកម្លាំងសាមគ្គីក្នុងការរួមចំណែកកសាងប្រទេសកម្ពុជា៕