.jpg)
លោក អ៊ិត សំហេង ផ្ដល់បទសម្ភាសកាលពីម្សិលមិញ។ រូប ក្រសួងការងារ
ភ្នំពេញៈ ក្រសួងការងារ បណ្តុះបណ្តាលវិជ្ជាជីវៈកាលពីម្សិលមិញ បានប្រកាសជាផ្លូវការនូវសមាសភាពក្រុមប្រឹក្សាជាតិប្រាក់ឈ្នួលអប្បបរមាអាណត្តិទី ១ ដែលមានលោករដ្ឋមន្ត្រីជាប្រធាន រីឯតំណាងកម្មករនិយោជិត និងតំណាងនិយោជក ២ រូបជាអនុប្រធាន ខណៈកិច្ចប្រជុំពីការចរចាប្រាក់ឈ្នួលអប្បបរមាសម្រាប់ឆ្នាំ ២០២០ នឹងបន្តនៅដើមខែកញ្ញាឆ្នាំនេះទាក់ទងនឹងការកំណត់ពីតួលេខឲ្យបានច្បាស់លាស់។
កាលពីម្សិលមិញមានមន្ត្រីថ្នាក់ដឹកនាំក្រសួងការងារ តំណាងមកពីខាងកម្មករនិយោជិត និងភាគីនិយោជកប្រមាណជាង ៥០ នាក់ បានជួបពិភាក្សាគ្នាក្នុងការកំណត់សមាសភាព ការរៀបចំ និងការប្រព្រឹត្តទៅរបស់ក្រុមប្រឹក្សាជាតិប្រាក់ឈ្នួលអប្បបរមាអាណត្តិទី ១។
តាមសេចក្តីថ្លែងការណ៍រួមរបស់ក្រសួងការងារ ក្រោយកិច្ចប្រជុំបានបញ្ជាក់ថា សមាភាពនៃក្រុមប្រឹក្សាជាតិនេះមានលោក អ៊ិត សំហេង រដ្ឋមន្ត្រីក្រសួងការងារជាប្រធាន និងបានបោះឆ្នោតជ្រើសរើសអនុប្រធានចំនួន ២ រូបគឺមានលោក សោម អូន តំណាងអង្គការវិជ្ជាជីវៈរបស់កម្មករនិយោជិតដែលមានសំឡេងគាំទ្រ ៩ លើ ១៦ ចំណែកលោក ណាង សុធី តំណាងអង្គការវិជ្ជាជីវៈរបស់និយោជក មានសំឡេងគាំទ្រ ១៧ លើ ១៧។
សេចក្តីថ្លែងការណ៍នោះបានបន្តថា៖ «បានធ្វើបទបង្ហាញអំពីស្ថិតិសំខាន់ៗសម្រាប់ភាគីពាក់ព័ន្ធយកធ្វើជាមូលដ្ឋានក្នុងការប្រើប្រាស់លក្ខណវិនិច្ឆ័យទាំង ៧ ដែលជាធាតុចូលដ៏សំខាន់ក្នុងការចរចាប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ ២០២០ នឹងបន្តប្រជុំពិភាក្សានៅថ្ងៃ ៣ កញ្ញា ឆ្នាំ ២០១៩ និងថ្ងៃបន្តបន្ទាប់»។
លក្ខណវិនិច្ឆ័យទាំង ៧ ចំណុចក្នុងមាត្រា ៥ នៃច្បាប់ស្តីពីប្រាក់ឈ្នួលអប្បបរមារួមមាន លក្ខណវិនិច្ឆ័យបែបសង្គម (ស្ថានភាពគ្រួសារ អត្រាអតិផរណា និងការចំណាយក្នុងការរស់នៅ) និងលក្ខណវិនិច្ឆ័យបែបសេដ្ឋកិច្ច (ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ) ក៏ដូចជាបន្ទាត់ភាពក្រីក្រសម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលអប្បបរមានៅកម្ពុជា។
លោក អ៊ិត សំហេង រដ្ឋមន្ត្រីក្រសួងការងារបានថ្លែងថានេះគឺជាការប្រជុំក្រុមប្រឹក្សាជាតិលើកទី ១ ក្រោយពីបង្កើតឡើងដោយច្បាប់ស្តីអំពីប្រាក់ឈ្នួលអប្បបរមារបស់កម្ពុជាដែលចាប់ពីថ្ងៃនេះគឺមានលក្ខណៈពេញលេញដែលអាចពិភាក្សាគ្នា និងផ្តល់យោបល់លើការកំណត់ប្រាក់ឈ្នួលអប្បបរមាមុននឹងក្រសួងសម្រេចជាចុងក្រោយ។
យ៉ាងណាលោកមិនបានបញ្ជាក់ពីតួលេខនៃការកំណត់ប្រាក់ឈ្នួលអប្បបរមាក្នុងការចរចាទេដោយគ្រាន់តែអះអាងលោកបានកំណត់គោលដៅរួចហើយគឺចាប់ពីពេលនេះរហូតដល់មុនពិធីបុណ្យភ្ជុំបិណ្ឌនឹងសម្រេចឲ្យបាននូវតួលេខប្រាក់ឈ្នួលអប្បបរមាសម្រាប់ឆ្នាំ ២០២០។ លោកសង្ឃឹមថា ភាគីទាំងសងខាងនឹងប្រកាន់ជំហរពិភាក្សាលើតុចរចារហូតទាល់តែមានដំណោះស្រាយរួម។
លោកបញ្ជាក់ថា៖ «ការពិតទៅភាគីនីមួយៗគាត់សុទ្ធតែមានទិន្នន័យផ្ទាល់ដែលមានការសិក្សាដែរ។ អ៊ីចឹងនៅខាងមុខនេះយើងនឹងយកទិន្នន័យទាំងអស់មកជជែកវែកញែកជាមួយគ្នាហើយផ្ទៀងផ្ទាត់មើលថាតើវាមានគម្លាតខុសគ្នាយ៉ាងម៉េច ? ហើយចុងក្រោយបានយើងយកទិន្នន័យទាំងអស់នេះបូក ចែក ដកទៅដើម្បីឲ្យវាចេញជាតួលេខថាតើប្រាក់ឈ្នួលអប្បបរមានៅឆ្នាំ ២០២០ អាចកំណត់បានត្រឹមប៉ុនណា?» ។
រាជរដ្ឋាភិបាលកម្ពុជាបានដាក់ចេញនូវគោលនយោបាយដំឡើងប្រាក់ឈ្នួលអប្បបរមាដល់កម្មករនិយោជិតក្នុងវិស័យកាត់ដេរជារៀងរាល់ឆ្នាំចាប់ពីឆ្នាំ ២០១៤ មក ខណៈប្រាក់ឈ្នួលអប្បបរមាក្នុងឆ្នាំនេះមានចំនួន ១៨២ ដុល្លារក្នុង ១ ខែ។
លោក សោម អូន ប្រធានសហព័ន្ធសហជីពកម្មករកម្ពុជា និងលោក ណាង សុធី តំណាងអង្គការវិជ្ជាជីវៈរបស់និយោជកដែលសុទ្ធតែជាអនុប្រធានក្រុមប្រឹក្សាជាតិប្រាក់ឈ្នួលអប្បបរមាអាណត្តិទី ១ មិនអាចសុំការអត្ថាធិប្បាយបានទេកាលពីម្សិលមិញ។
លោក ប៉ាវ ស៊ីណា ប្រធានសហព័ន្ធសហជីពចលនាកម្មករកម្ពុជាបានថ្លែងថា បើទោះជាមានការលើកឡើងពីការចរចាប្រាក់ឈ្នួលពេលនេះល្អប្រសើរក្ដី ប៉ុន្តែលោកមើលឃើញថា វានៅមានភាពយ៉ាប់យឺននៅឡើយ ខណៈស្ថានភាព EBA នៅមិនទាន់ច្បាស់លាស់ ហើយរដ្ឋាភិបាលបានកាត់បន្ថយចំនួនថ្ងៃឈប់សម្រាករបស់កម្មករដល់ទៅ ៦ ថ្ងៃធ្វើឲ្យបាត់បង់ប្រយោជន៍កម្មករជាច្រើន។
លោកបានបន្តថាការដំឡើងប្រាក់ឈ្នួលអប្បបរមាសម្រាប់ឆ្នាំខាងមុខនេះគួរដំឡើងឲ្យដល់ ១៥ ភាគរយ ឬស្មើប្រមាណ ២៧ ដុល្លារសម្រាប់កម្មករម្នាក់ដើម្បីជាការប៉ះប៉ូវ ព្រោះការរកឃើញរបស់លោកតួលេខនេះទើបសមអាចដោះស្រាយជីវភាពរបស់ពួកគេបច្ចុប្បន្នបាន។
លោកបញ្ជាក់ថា៖ «ខ្ញុំមើលឃើញថា ទន្ទឹមនឹងការស្នើសុំដំឡើងប្រាក់ឈ្នួល ១៥ ភាគរយយកទៅពិភាក្សានេះខ្ញុំក៏សង្ឃឹមថា ភាគីទាំងអស់នឹងពិចារណាបន្ថែមទៀតជុំវិញការពិភាក្សានៃការបន្ថែមផលប្រយោជន៍ទាក់ទងទៅនឹងបញ្ហា ដូចជាការដោះស្រាយការធ្វើដំណើររបស់កម្មករប្រកបដោយសុវត្ថិភាពស្របពេលថ្មីៗនេះបញ្ហាគ្រោះថ្នាក់មានការកើតឡើងជាបន្តបន្ទាប់»៕
