ភ្នំពេញៈ គណៈសង្ឃនាយកនៃព្រះរាជាណាចក្រកម្ពុជាបានប្រកាសគាំទ្រសេចក្ដីសម្រេចរបស់ថេរសភាខេត្តសៀមរាប ដើម្បីឱ្យចាប់ផ្សឹកព្រះតេជគុណ លួន សុវ៉ាត ដែលកំពុងរងការចោទប្រកាន់ថាបានសេពមេថុនធម្មជាមួយស្ដ្រីភេទ។ ការប្រកាសរបស់ស្ថាប័នកំពូលសង្ឃនេះស្របពេលព្រះតេជគុណ លួន សុវ៉ាត ជាសង្ឃធ្វើសកម្មភាពខាងការងារសង្គមបានបដិសេធការចោទប្រកាន់នេះ។
កាលពីថ្ងៃទី ១០ ឧសភា សម្ដេចព្រះសង្ឃនាយកនៃព្រះរាជាណាចក្រកម្ពុជា នន្ទ ង៉ែត បានចេញប្រកាសប្រគេនទៅកាន់ព្រះមេគណទាំង ២៥ រាជធានី-ខេត្តថា ការសម្រេចរបស់ថេរសភានៅខេត្តសៀមរាបគឺមានតម្លាភាព យុត្តិធម៌ និងត្រឹមត្រូវតាមពុទ្ធវិន័យ ហើយគណៈសង្ឃនាយកឯកភាពទាំងស្រុងឱ្យព្រះតេជគុណ លួន សុវ៉ាត លាចាកសិក្ខាបទពីភេទបព្វជិត។
ប៉ុន្តែមកដល់ពេលនេះបុគ្គល លួន សុវ៉ាត ពុំទាន់បានចេញមុខមកអនុវត្តតាមសេចក្ដីសម្រេចរបស់ថេរសភាខេត្តនោះឡើយ ពោលគឺបានគេចខ្លួនបាត់តែម្ដង។ ផ្អែកលើមូលដ្ឋាននេះគណៈសង្ឃនាយកស្នើឱ្យព្រះមេគណគ្រប់រាជធានី-ខេត្តទូទាំងប្រទេសចូលរួមសហការជាមួយអាជ្ញាធរពាក់ព័ន្ធក្នុងដែនសមត្ថកិច្ចរបស់ខ្លួន ដើម្បីអនុវត្តនូវសេចក្ដីសម្រេចរបស់ថេរសភាខេត្តសៀមរាបឱ្យបានម៉ឺងម៉ាត់ និងមានប្រសិទ្ធភាពខ្ពស់។
ការប្រកាសរបស់គណៈសង្ឃនាយកនេះស្របពេលព្រះតេជគុណ លួន សុវ៉ាត បានបញ្ជាក់ថា ព្រះអង្គកំពុងស្ថិតនៅក្នុងទីកន្លែងមានសុវត្ថិភាពមួយ ដើម្បីភៀសខ្លួនពីការតាមចាប់ផ្សឹក ខណៈព្រះអង្គបានចាត់ទុកការចោទប្រកាន់ថា ព្រះអង្គបានសេពមេថុនធម្មជាមួយស្ដ្រីភេទគឺជារឿងនយោបាយដែលបង្កើតឡើងពីអ្នកស្អប់ព្រះអង្គដែលបានរៀបចំឱ្យមានការកាត់តរូបភាព និងសំឡេង ដើម្បីមួលបង្កាច់ និងលាបពណ៌ព្រះអង្គ។
ព្រះអង្គ លួន សុវ៉ាត ដែលធ្លាប់ទទួលបានពានរង្វាន់ពីអន្តរជាតិក្នុងនាមជាអ្នកការពារសិទ្ធិមនុស្សបានសរសេរបង្ហោះនៅតាមហ្វេសប៊ុកថា ការចោទប្រកាន់នេះគឺដោយសារព្រះអង្គគឺជាសកម្មជនដ៏ល្បីឈ្មោះម្នាក់នៅក្នុងប្រទេស និងក្រៅប្រទេសក្នុងនាមជាអ្នកធ្វើការងារសង្គមពាក់ព័ន្ធនឹងរឿងដីធ្លី សិទ្ធិមនុស្ស នយោបាយ និងការពារព្រៃឈើជាដើមដែលធ្វើឱ្យអ្នកមានអំណាចមួយចំនួនក្ដៅក្រហាយ និងមិនសប្បាយចិត្ត។
កាលពីថ្ងៃទី ៣ មិថុនា ថេរសភាខេត្តសៀមរាបបានចេញប្រកាសមួយថា ថេរសភាខេត្តបានបើកកិច្ចប្រជុំ និងស្ដាប់វីដេអូសារសំឡេងសន្ទនារៀបរាប់ពីសេចក្ដីស្នេហាយ៉ាងស៊ីជម្រៅរវាងភិក្ខុ លួន សុវ៉ាត ជាមួយស្ដ្រីជាម្ដាយ និងកូនស្រីព្រមទាំងបានស្ដាប់កំណត់ហេតុបំភ្លឺរបស់កូនស្រី ១ រូប និងបានសន្មតថា ព្រះអង្គ លួន សុវ៉ាត ពិតជាបានសេពមេថុនធម្មជាមួយស្ដ្រីភេទពិតប្រាកដមែនដែលទោសកំហុសនេះគឺត្រូវតែលាចាកសិក្ខាបទជាសង្ឃ។ ប្រសិនបើនៅតែបន្តស្លៀកស្បង់ចីវរទៀតគឺចាត់ទុកថា ព្រះអង្គ លួន សុវ៉ាត ប្រព្រឹត្តក្លែងភេទដែលសមត្ថកិច្ចពាក់ព័ន្ធត្រូវតែចាត់វិធានការទៅតាមផ្លូវច្បាប់។
លោក ស៊ឹង សែនករុណា អ្នកនាំពាក្យសមាគមអាដហុកបានលើកឡើងថា តាមសត្យានុម័តនៅក្នុងច្បាប់គឺករណីចោទប្រកាន់នេះ គួរតែធ្វើការស៊ើបអង្កេតឱ្យបានច្បាស់លាស់មុនមានសេចក្ដីសម្រេចឱ្យផ្សឹកព្រះអង្គ លួន សុវ៉ាត ហើយថេរសភាខេត្តសៀមរាបមិនគួរជឿលើវីដេអូដែលជាការសន្ទនាមួយដែលត្រូវបានបង្ហោះឡើងពីជនអនាមិកនោះទេ។
លោក ស៊ឹង សែនករុណា បានថ្លែងថា៖«អ៊ីចឹង! ការសម្រេចនេះគឺធ្វើឡើងលឿនពេក នេះតាមអ្វីដែលយើងមើលឃើញ ហើយគួរធ្វើការងារឱ្យបានច្បាស់លាស់ ចាំសម្រេច»៕