ភ្នំពេញៈ នៅក្នុងទិវានារីអន្តរជាតិ ៨ មីនា ឆ្នាំ ២០២១ នេះសម្តេចព្រះវររាជមាតាជាតិខ្មែរ នរោត្តម មុនីនាថ សីហនុ បានកត់សម្គាល់ថា ការចូលរួមរបស់ស្ត្រីនៅក្នុងកិច្ចការសាធារណៈ នយោបាយ និងឯកជនកាន់តែមានភាពប្រសើរឡើងជាបន្តបន្ទាប់ ខណៈដែលលោកនាយករដ្ឋមន្ត្រី ហ៊ុន សែន បានជំរុញឱ្យបន្តពង្រឹងសាមគ្គីភាព និងឯកភាពជាតិ ថែរក្សាសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងហិរញ្ញវត្ថុ។
ជាមួយគ្នានេះសម្តេចម៉ែក៏បានសម្តែងការកោតសរសើរ និងគាំទ្រដល់ក្រសួងកិច្ចការនារីដែលបានលើកយកប្រធានបទ «ស្ត្រី និងការអភិវឌ្ឍក្នុងបរិការណ៍កូវីដ១៩» សម្រាប់ប្រារព្ធទិវានារីអន្តរជាតិ ៨ មីនា ឆ្នាំ ២០២១ នេះ។
ក្នុងព្រះរាជសារអបអរសាទរខួបលើកទី ១១០ នៃទិវានារីអន្តរជាតិ ៨ មីនានេះ សម្តេចម៉ែបានកត់សម្គាល់ឃើញថា ការចូលរួមរបស់ស្ត្រីនៅក្នុងកិច្ចការសាធារណៈ នយោបាយ និងឯកជន កាន់តែមានភាពប្រសើរឡើងជាបន្តបន្ទាប់។ ស្ត្រី និងក្មេងស្រីទទួលបានការអនុវត្តនូវសិទ្ធិពេញលេញ និងកាលានុវត្តភាពក្នុងការអភិវឌ្ឍចំណេះដឹង ជំនាញបច្ចេកទេស និងធនធានរបស់ខ្លួនដែលជាមូលដ្ឋានគ្រឹះនៃសិទ្ធិមនុស្សជាសកលភាពជាដៃគូក្នុងការរស់នៅក្នុងគ្រួសារ និងសង្គមប្រកបដោយសមភាព និងសមធម៌ និងការចូលរួមប្រកបដោយសក្តានុពលនៅក្នុងបរិបទនៃការវិវឌ្ឍថ្មីរបស់សង្គម។
សម្តេចម៉ែមានបន្ទូលថា៖ «ខ្ញុំសូមសរសើរ និងគាំទ្រ ក្រសួងកិច្ចការនារី និងក្រុមប្រឹក្សាជាតិកម្ពុជា ដើម្បីស្ត្រីដែលបាននិងកំពុងខិតខំប្រឹងប្រែងជំរុញការលើកកម្ពស់សមភាពយេនឌ័រ ដើម្បីស្ត្រីបានទទួលនូវកិច្ចការពារ សិទ្ធិ និងផលប្រយោជន៍ តាមរយៈការកែប្រែឥរិយាបថសង្គមឱ្យទទួលស្គាល់ និងចាត់ទុកស្ត្រីជាដៃគូដ៏សំខាន់ក្នុងការអភិវឌ្ឍគ្រួសារ និងសង្គម ដោយជួយជំរុញការកសាង និងអភិវឌ្ឍសមត្ថភាពស្ត្រីក៏ដូចជាការផ្តល់ឱកាសឱ្យស្ត្រីចូលរួមប្រកបដោយសមធម៌ក្នុងគ្រប់ការងារ និងក្នុងគ្រប់វិស័យ» ។
ចំណែកសារលិខិតរបស់លោកនាយករដ្ឋមន្ត្រី ហ៊ុន សែន នៅថ្ងៃ ៨ មីនានេះបានសរសេរថា ប្រធានបទស្ត្រី និងការអភិវឌ្ឍក្នុងបរិការណ៍កូវីដ១៩បង្ហាញអំពីការចូលរួមយ៉ាងសកម្មរបស់ស្ត្រីក្នុងកិច្ចអភិវឌ្ឍន៍នៅគ្រប់កម្រិត គ្រប់វិស័យ និងគ្រប់កាលៈទេសៈស្របតាមយុទ្ធសាស្ត្រចតុកោណ ដំណាក់កាលទី ៤ ដែលស្ត្រីជាឆ្អឹងខ្នងនៃសេដ្ឋកិច្ច និងសង្គមជាតិ។
លោកនាយករដ្ឋមន្ត្រីស្នើដល់គ្រប់ក្រសួងស្ថាប័នពាក់ព័ន្ធ ដៃគូអភិវឌ្ឍន៍ សង្គមស៊ីវិល និងវិស័យឯកជនព្រមទាំងប្រជាពលរដ្ឋគ្រប់រូបរួមគ្នាផ្តោតការយកចិត្តទុកដាក់ទៅលើចំណុចអាទិភាពសំខាន់ៗមួយចំនួនដូចជា បន្តពង្រឹងសាមគ្គីភាព និងឯកភាពជាតិ ថែរក្សាសន្តិភាពស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងហិរញ្ញវត្ថុបន្តជំរុញចលនាជាតិប្រយុទ្ធនឹងជំងឺកូវីដ១៩ ដើម្បីធានាសុខុមាលភាព ជីវភាពប្រក្រតីរបស់ប្រជាជន និងការអភិវឌ្ឍសង្គមសេដ្ឋកិច្ច។ «ពង្រីកវិសាលភាពគ្របដណ្តប់នៃប្រព័ន្ធគាំពារសង្គម រួមទាំងសុខុមាលភាពស្ត្រី និងក្មេងស្រីជាមួយនឹងការអនុវត្តនូវរាល់កម្មវិធីជំនួយសង្គមនានា។ បន្តពង្រឹងភាពអង់អាចផ្នែកសេដ្ឋកិច្ចដល់ស្ត្រីតាមរយៈការបង្កើនការយល់ដឹង និងអភិវឌ្ឍអាជីវកម្មដល់ស្ត្រី ការអភិវឌ្ឍអាជីវកម្ម ខ្នាតមីក្រូ ខ្នាតតូច និងមធ្យម ពង្រឹងកម្មវិធីបណ្តុះបណ្តាលវិជ្ជាជីវៈ និងបរិយាប័ន្នហិរញ្ញវត្ថុ។ល»។
លោកស្រី មាស សាអ៊ីម អនុប្រធានផ្នែកស្ត្រី និងកុមារនៃសមាគមអាដហុក ថ្លែងថា អង្គការសង្គមស៊ីវិលមានប្រធានបទរួមគ្នាក្នុងការអបអរសាទរខួបទី១១០ ទិវានារីអន្តរជាតិ ៨ មីនា ឆ្នាំ ២០២១ នេះដែលប្រធានបទនោះគឺ «លទ្ធិប្រជាធិបតេយ្យពិតប្រាកដនាំឱ្យមានប្រព័ន្ធគាំពារសង្គម និងយុត្តិធម៌សម្រាប់ស្ត្រី និងទាំងអស់គ្នា»។
លោកស្រីពន្យល់ថា បើសិនជាមានលទ្ធិប្រជាធិបតេយ្យពិតប្រាកដវាអាចនឹងនាំឱ្យមានប្រព័ន្ធគាំពារសង្គម ដែលមិនសម្រាប់តែស្ត្រីនោះទេ គឺយុត្តិធម៌សម្រាប់ទាំងអស់គ្នា និងអត្ថប្រយោជន៍រួមសម្រាប់ទាំងអស់គ្នា។ «ស្ត្រីធ្វើការងារច្រើនខ្ញុំអាចថា ច្រើនជាងបុរសប្រសិនបើគាត់ធ្វើការងារទាំងខាងក្រៅ និងខាងក្នុង ហើយគាត់ត្រូវមើលថែទាំកូនទៀត អ៊ីចឹងគឺគាត់ហ្នឹងហើយជាគ្រូដំបូង។ ដោយសារតែបញ្ហាទាំងអស់នេះហើយ ដែលស្ត្រី អត់អាចលើកឡើងនូវសិទ្ធិសេរីភាពបញ្ចេញមតិ កង្វល់ និងបញ្ហាប្រឈមរបស់គាត់ អ៊ីចឹងសេរីភាពរបស់ពួកកាត់ និងភាពរីកចម្រើនរបស់សង្គមក៏វាអត់មានទៅតាមហ្នឹងដែរ»៕