The Phnom Penh Post Search

Search form




Logo of Phnom Penh Post newspaper Phnom Penh Post - សម្បត្តិ​បេតិកភណ្ឌ​ថ្មី ១៩ បាន​ចុះ​បញ្ជី​រួច​ក្នុង​កិច្ច​ប្រជុំ​លើក​ទី៣៧

សម្បត្តិ​បេតិកភណ្ឌ​ថ្មី ១៩ បាន​ចុះ​បញ្ជី​រួច​ក្នុង​កិច្ច​ប្រជុំ​លើក​ទី៣៧

សម្បត្តិ​បេតិកភណ្ឌ​ថ្មី ១៩ បាន​ចុះ​បញ្ជី​រួច​ក្នុង​កិច្ច​ប្រជុំ​លើក​ទី៣៧

130625_05a
ប្រតិភូកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៧ ថតរូបនៅវិមានសន្តិភាព

ភ្នំពេញៈ កិច្ច​ប្រជុំ​នៃ​គណៈ​កម្មាធិការ​បេតិកភណ្ឌ​ពិភពលោក​លើក​ទី៣៧ នៅ​រាជធានី​ភ្នំពេញ ដែល​កម្ពុជា ជា​ម្ចាស់​ផ្ទះ​រហូត​មក​ដល់​ពេល​នេះ​បាន​ពិនិត្យ​និង​ចុះ​បញ្ជី​សម្បត្តិ​បេតិកភណ្ឌ​ពិភពលោក​ថ្មី​ចំនួន​១៩ រួច​ហើយ ដែល​ច្រើន​ជាង​ពាក់​កណ្តាល​នៃ​សម្បត្តិ​បេតិភណ្ឌ​ដែល​បាន​ដាក់​ស្នើ​សុំ​ចុះ​បញ្ជី​ជា​សម្បត្តិ​បេតិភណ្ឌ​ពិភពលោក​ខណៈ​កិច្ច​ប្រជុំ​នេះ​នឹង​បញ្ចប់​នៅ​ថ្ងៃ​ព្រហស្បតិ៍​សប្តាហ៍​នេះ។

ក្នុង​ចំណោម​សម្បត្តិ​បេតិភណ្ឌ ទាំង​១៩​ដែល​ត្រូវ​បាន​ជ្រើសរើស​ពី​ចំនួន​សរុប ៣១​ដែល​ទទួល​បាន​ការ​តែង​តាំង​សម្រាប់​ការ​ពិចារណា ហើយ​មាន​៥​ក្នុង​ចំណោម​នោះ​គឺជា​សម្បត្តិ​បេតិកភណ្ឌ​ធម្មជាតិ​និង​១៤​ដទៃ​ទៀត​គឺជា​សម្បត្តិ​បេតិកភណ្ឌ​វប្បធម៌​។ នេះ​បើ​តាម​លោក​ឧប​នាយក​រដ្ឋ​មន្រ្តី សុខ អាន​ប្រធាន​គណៈ​កម្មាធិការ​បេតិកភណ្ឌ​ពិភពលោក​លើក​ទី៣៧ ថ្លែង​ឲ្យ​ដឹង។

សម្បត្តិ​បេតិកភណ្ឌ​ដែល​ត្រូវ​បាន​ជ្រើស​រើស​នោះ​រួម​មាន​ចំនួន ៨ កន្លែង នៅ​តំបន់​អាស៊ី​ប៉ាស៊ីហ្វិក ៧​កន្លែង​នៅ​តំបន់​អឺរ៉ុប ២ កន្លែង​នៅ​តំបន់​អាហ្វ្រិក មួយ​កន្លែង​នៅ​តំបន់​អាមេរិក​ឡាទីន តំបន់ Caribbean និង​នៅ​តំបន់​អារ៉ាប់។

លោក សុខ អាន បាន​ថ្លែង​នៅ​ក្នុង​សន្និសីទ​កាសែត​កាល​ពី​ម្សិលមិញ​ថា ៖ «ឆ្នាំ​នេះ​យើង​បាន​ចុះ​បញ្ជី​មិន​ច្រើន​ទេ​ប៉ុន្តែ​សម្បត្តិ​បេតិកភណ្ឌ​ទាំង​១៩​កន្លែង ដែល​ត្រូវ​បាន​ចុះ​បញ្ជី​គឺ​សំខាន់​ខ្លាំង​ណាស់​»។

ខណៈ​ប្រទេស​សាមី​នីមួយៗ មាន​ការ​ទទួល​ខុស​ត្រូវ​ចំពោះ​ការ​ថែរក្សា​សម្បត្តិ​វប្បធម៌​ដែល អង្គការ​យូណេស្កូ​ចុះ​បញ្ជី​ប្រទេស​មួយ​ចំនួន​ដែល​ស្ថិត​ក្នុង​ស្ថានភាព​អភិវឌ្ឍ​តិច​តួច​ប្រឈម​នឹង​បញ្ហា​នៃ​ថវិកា​ចំណាយ​ក្នុង​ការ​ថែរក្សា​តំបន់​បេតិកភណ្ឌ​នេះ​ខណៈ​ប្រទេស​អភិវឌ្ឍន៍​ប្រហែល​ជា​មិន​ប្រឈម​នឹង​បញ្ហា​អ្វី​ទេ​។ នេះ​បើ​តាម​លោក Kishore Rao នាយក​នៃ​មជ្ឈមណ្ឌល​បេតិកភណ្ឌ​ពិភពលោក​របស់​អង្គការ​យូណេស្កូ។

លោក Kishore Rao បាន​ថ្លែង​បន្ត​ថា ៖ «​យើង​ទាំង​អស់​គ្នា​ដឹង​ថា តំបន់​ជា​ច្រើន​នៅ​ក្នុង​ចំណោម​តំបន់​ទាំង​នេះ ប្រទេស​អភិវឌ្ឍន៍​តិច​តួច​កំពុង​ខ្វះ​ធនធាន​ទាំង​នេះ​និង​សមត្ថភាព​គ្រប់​គ្រង​ដើម្បី​ឲ្យ​អាច​ធានា​នូវ​ការ​អភិរក្ស​តំបន់​នេះ​ប្រកប​ទៅ​ដោយ​ប្រសិទ្ធភាព។ នោះ​គឺជា​អ្វី​ដែល​សន្និសីទ​យក​មក​ពិភាក្សា​ភាព​ជា​ដៃ​គូ​អន្តរជាតិ​និង​ជា​សកល​ដើម្បី​គាំទ្រ​ការ​អភិរក្ស​នៃ​តំបន់​ដែល​ត្រូវ​ចាត់​ទុក​ថា ជា​បេតិកភណ្ឌ​រួម​របស់​មនុស្ស​ជាតិ​»។

លោក សុខ អាន បាន​ថ្លែង​ថា​៖ «បញ្ហា​នយោបាយ​មិន​ពាក់​ព័ន្ធ​នឹង​សេចក្តី​សម្រេច​ដែល​ធ្វើ​ឡើង​ដោយ​គណៈ​កម្មាធិការ​ដែល​ជ្រើស​រើស​មិន​ចុះ​បញ្ជី​ទីក្រុង​ចាស់​នៃ​រាជធានី​ហ៊្សេរុយ​សាឡឹម ជា​សម្បត្តិ​បេតិកភណ្ឌ​ពិភពលោក​ទេ។

លោក សុខ អាន ថ្លែង​បន្ត​ថា​៖ «យើង​ព្យាយាម​ឲ្យ​អ្នក​រាល់​គ្នា​ផ្តោត​ទៅ​លើ​បញ្ហា​បច្ចេកទេស​ពី បេតិកភណ្ឌ និង​បញ្ចៀស​ការ​និយាយ​អំពី​នយោបាយ​នៅ​ក្នុង​គណៈ​កម្មាធិការ​បេតិកភណ្ឌ ពិភពលោក។ ខ្ញុំ​គិត​ថា នេះ​ជា​ទស្សនវិជ្ជា មិន​ពាក់​ព័ន្ធ​នឹង​នយោបាយ​ទេ»៕ PS

អត្ថបទគួរចាប់អារម្មណ៍