ភ្នំពេញៈ អាជ្ញាធរជាតិប្រយុទ្ធប្រឆាំងគ្រឿងញៀនកាលពីថ្ងៃព្រហស្បតិ៍ម្សិលមិញបានបើកឲ្យប្រើប្រាស់មជ្ឈមណ្ឌលសម្របសម្រួលសុវត្ថិភាពទន្លេមេគង្គនៅក្រសួងមហាផ្ទៃដែលមជ្ឈមណ្ឌលនេះនឹងដើរតួនាទីសំខាន់សម្រាប់ប្រទេសទាំង ៦ នៅក្នុងមហាអនុតំបន់ទន្លេមេគង្គ ដើម្បីសហការគ្នាអនុវត្ដទប់ស្កាត់ បញ្ហាគ្រឿងញៀន។
ការបើកសម្ពោធមជ្ឈមណ្ឌលសម្របសម្រួលសុវត្ថិភាពទន្លេមេគង្គ Safe Mekong Coordination Center (SMCC) នេះមានការចូលរួមដោយលោក ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន, អគ្គលេខាធិការ អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន និងតំណាងអង្គទូត, តំណាងក្រសួងស្ថាប័ននានា,ប្រធានអនុប្រធានគណៈប្រតិភូសមាជិកប្រទេសទាំង ៦ រួមនឹងមន្ត្រីពាក់ព័ន្ធជាច្រើនរូប។
លោក មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា មជ្ឈមណ្ឌលសម្របសម្រួលសុវត្ថិភាពទន្លេមេគង្គនេះគឺជាឱកាសថ្មីមួយទៀតដែលប្រទេសទាំង ៦ នៅក្នុងមហាអនុតំបន់ទន្លេមេគង្គបានឯកភាពគ្នាក្នុងការពង្រឹង និងពង្រីកប្រសិទ្ធភាពការងារត្រួតពិនិត្យគ្រឿងញៀនឆ្លងកាត់ព្រំដែនតាមរយៈកិច្ចសហប្រតិបត្តិការ ផ្លាស់ប្តូរព័ត៌មាន រវាងមន្ត្រី អនុវត្តច្បាប់ជួរមុខដែលមកប្រចាំការនៅក្នុងមជ្ឈមណ្ឌលនេះ។
លោកបានថ្លែងថា៖ «អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនកត់សម្គាល់ឃើញថា បណ្តាប្រទេសជាសមាជិកបានកំពុងពង្រឹងកិច្ចសហប្រតិបត្តិការស៊ើបអង្កេត និងបង្ក្រាបបានទាន់ពេលវេលា និងដកហូតបានគ្រឿងញៀនជាច្រើនក្នុងពេលកន្លងមក»។
លោក ជួន សុវណ្ណ អគ្គស្នងការរងនគរបាលជាតិ និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងថាក្នុងនាមរាជរដ្ឋាភិបាលកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀនបានវាយតម្លៃខ្ពស់ចំពោះគំនិតផ្តួចផ្តើម និងការខិតខំ ប្រឹងប្រែងដ៏មានតម្លៃ និងសារៈសំខាន់យ៉ាងខ្លាំងពីសំណាក់ប្រទេស ចិន ថៃ ភូមា និងឡាវនាពេលកន្លងមកក្នុងការបង្កើតបាននូវយន្តការសម្របសម្រួលសម្រាប់បម្រើឱ្យការងារប្រយុទ្ធប្រឆាំងគ្រឿងញៀននៅក្នុងប្រទេសមហាអនុតំបន់ទន្លេគង្គទាំង ៦ និងការទប់ស្កាត់ ជាពិសេសការផលិត ការចរាចរគ្រឿងញៀនខុសច្បាប់គ្រប់ប្រភេទនៅក្នុងតំបន់ត្រីកោណមាសទាំងមូលផងដែរ។
លោកបានថ្លែងថា៖ «អ្វីដែលជាលក្ខណពិសេសនៃមជ្ឈមណ្ឌលសម្របសម្រួលសុវត្ថិភាពទន្លេមេគង្គរបស់យើងគឺការចាត់តាំងមន្ត្រីអនុវត្តច្បាប់នៃប្រទេសជាសមាជិកទាំង ៦ ឱ្យមកធ្វើការជាមួយគ្នាចែករំលែកព័ត៌មាន និងបទពិសោធឱ្យគ្នាទៅវិញទៅមកបានភ្លាមៗទាន់សភាពការណ៍ ធ្វើការសិក្សាស្វែងយល់ពីទីតាំងភូមិសាស្ត្រ និងបទពិសោធការងារធ្វើជាម្ចាស់ផ្ទះជាលក្ខណៈប្ដូរវេនម្ដងម្នាក់សំដៅពង្រឹងប្រសិទ្ធភាពក្នុងការអនុវត្តការងារ»។
លោក ជួន សុវណ្ណ បានថ្លែងថាបើទោះបីក្នុងរយៈពេលប៉ុន្មានឆ្នាំចុងក្រោយនេះប្រទេសកម្ពុជាក៏ដូចប្រទេសជាសមាជិកទាំងអស់បានខិតខំប្រឹងប្រែងយ៉ាងណាក្តី ក៏សង្កេតឃើញថាស្ថានភាពនៃការដាំដុះ ការផលិត ការចរាចរ និងការប្រើប្រាស់គ្រឿងញៀននៅក្នុងពិភពលោក ពិសេសក្នុងតំបន់ត្រីកោណមាសហាក់មិនមានសញ្ញាថយចុះនោះឡើយ ដែលបញ្ហានេះបានបង្កនូវផលលំបាក ជាច្រើនធ្វើឱ្យមានផលប៉ះពាល់ដល់សន្តិសុខ សណ្តាប់ធ្នាប់សង្គម និងការអភិវឌ្ឍព្រមទាំងសុខភាពរបស់ប្រជាពលរដ្ឋផងដែរ។
លោកបានថ្លែងថា៖ «មជ្ឈមណ្ឌលសម្របសម្រួលសុវត្ថិភាព ទន្លេមេគង្គនេះ គឺជាយន្តការអនុតំបន់មួយដ៏មានសារៈសំខាន់បំផុតដែលយើងត្រូវផ្តោតការយកចិត្តទុកដាក់ចំពោះការពង្រឹង និងបង្កើននូវប្រសិទ្ធភាពនៃយន្តការនេះឲ្យស្របទៅនឹងស្ថានភាពថ្មីនៃបញ្ហាគ្រឿងញៀននៅក្នុងតំបន់របស់យើង»៕